Pashanyeni Icitetekelo Cabo

Pa Kulanda ku Mfumu, Estere Alishipile, Alicenjele Kabili Aliipeeleshe

ESTERE aleenda fye panono panono ilyo alepalamina ku cipuna ca mfumu, kabili aali no mwenso nga nshi. Elenganyeni ifyo mwi sano lya mu Shushani mwatalele tondolo ilyo Estere aleingila. Mwalitalele ica kuti Estere aleumfwa fye icongo ca ntampulo shakwe ne congo ca fya kufwala fya bunamfumu ifyo afwele. Ilyo aleingila mwi sano, tapoosele amano ku kulolesha ku fyo isano lyalemoneka bwino, ku kutamba inceshi bayemfeshe nelyo ukulolesha palafu iyo bapangiile ne mikedari bafumishe ku Lebanone. Apoosele fye amano ku mwaume uwaikele pa cipuna ca bufumu, uwakwete amaka ya kumupingula ukwipaiwa nelyo ukukanaipaiwa.

Ilyo Estere alepalamina, imfumu yalemulolekesha kabili yamutambike inkonto ya golde. Nalimo kuti twamona kwati ifi imfumu yacitile tafyacindeme sana, lelo fyalengele ukuti Estere bemwipaya, pantu fyalangile ukuti balimubelele uluse pa mulandu acitile uwa kuyamona imfumu ukwabula ukuti imwite. Ilyo Estere apaleme ku cipuna ca mfumu, akumishe ku nkonto ya mfumu, ukulangilila ukuti alitashishe.—Estere 5:1, 2.a

Ifyo Imfumu Ahasuerusi yalemoneka fyalelanga fye ukuti ali mukankaala icine cine kabili alikwete sana amaka. Ifya kufwala ifyo imfumu sha bena Persia shalefwala pali ilya nshita fyali ifya mutengo nga nshi, nga ni muno nshiku kuti fyashitwa amamilioni ya ndalama ishingi. Lelo ifyo Ahasuerusi aloleshe Estere fyalangile ukuti tamufuliilwe, alimutemenwe. Amwebele ukuti: “Cinshi, we Estere namfumu, cinshi ulefwaya? Njeba nangu fye ni hafu wa bufumu—kuti nakupeela!”—Estere 5:3.

Estere alilangile kale kale ukuti ali ne citetekelo cakosa kabili ali uwashipa; aile ku mfumu pa kuti acingilile abantu bakwe abo balefwaya ukulofya. Ukufika pali iyi nshita, ifintu fyalyendele bwino, lelo amafya ayakalamba yali ku ntanshi. Tacayangwike ukulenga iyi mfumu ya cilumba ukusumina ukuti impanda mano iyo yacetekele sana yali iibi nga nshi kabili yamubepele fye pa kuti abantu ba kwa Estere babepaye. Bushe ali no kucita shani pa kuti imfumu isumine, kabili finshi twingasambilila ku citetekelo ca kwa Estere?

Alisalile Bwino “Inshita ya Kusosa”

Bushe Estere ali no kulondolwela imfumu ubwafya akwete pa menso ya bantu bonse abali mwi sano? Acita ifi nalimo nga aliseebenye imfumu, kabili Hamani impanda mano yakwe nga alikeene umulandu. Nomba cinshi Estere acitile? Imyaka iingi ku numa, umupashi wa kwa Lesa walengele Imfumu ya mano Solomone ukulemba ukuti: “Icintu conse calikwata inshita ya ciko, . . . inshita ya kwikala tondolo ne nshita ya kusosa.” (Lukala Milandu 3:1, 7) Mordekai, umwaume wa citetekelo, uwakushishe Estere, afwile alemufunda ukwishiba inshita ya kwikala tondolo ne nshita ya kusosa. Ukwabula no kutwishika, Estere alishibe ifyo cacindama ukusala bwino “inshita ya kusosa.”

Estere atile: “Nga ca kutila imfumu yamona ukuti cili fye bwino, lekeni imfumu ise pamo na Hamani lelo ku mutebeto uo imupekanishishe.” (Estere 5:4) Imfumu yalisumine kabili yalyebele na Hamani. Bushe mwamona ifyo Estere alandile ku mfumu mano mano? Ifi acitile fyalengele ukuti eseebanya umulume wakwe kabili fyalengele no kuti asale inshita iisuma iya kulondolwela umulume wakwe icalemucusha.

Estere afwile alipekenye bwino sana uyu mutebeto, afwile apekenye ifya kulya ifyo umulume wakwe atemenwe. Pali uyu mutebeto alibikilepo no mwangashi uusuma pa kuti imfumu isansamuke. (Amalumbo 104:15) Ahasuerusi alisansamwike, kabili ici calengele epushe Estere na kabili ico alefwaya ukuti amucitile. Bushe iyi e yali inshita ya kuti Estere asose?

Estere amwene ukuti tayali ni nshita ya kusosa. Lelo alaalike imfumu na Hamani ukuti bakaye na kabili ku mutebeto ubushiku bwakonkelepo. (Estere 5:7, 8) Cinshi ashalandile apa pene? Mwilaba ukuti abantu ba kwa Estere bonse bali no kubepaya ukulingana ne cipope ca mfumu. Kanshi alefwaya ukushininkisha ukuti inshita alalandilapo nailinga sana. E ico alilolelele ukuti asange inshita na imbi iisuma pa kuti alange umulume wakwe ukuti alimucindika nga nshi.

Abantu abengi tabatekanya, lelo ukutekanya kwalicindama nga nshi. Nangu ca kutila Estere alisakamikwe kabili alefwaisha ukulanda ifyali mu mutima wakwe, alitekenye no kulolela inshita iyalingile ukuti alande. Fingi twingasambilila ku fyo acitile. Bonse fye twalimonapo ifintu fimo ifyalubana ificitika ifyo twingafwaya ukulungika. Nga tulefwaya ukuti umuntu uo balashika imilimo iikalamba apwishe ubwafya bumo, tulingile ukupashanya Estere no kuba abatekanya. Amapinda 25:15 yatila: “Ukutekanya kuti kwanashanasha umutima wa mukalamba wa bashilika, no lulimi ulwanakilila kuti lwatoba ifupa.” Nga ca kutila twalolela inshita yalinga iya kulandilapo kabili twalanda mu bufuuke nga filya Estere acitile, kuti twapwisha ubwafya ubwakosa nge fupa. Bushe Yehova, Lesa wa kwa Estere alimupaalile pa fyo atekenye na pa fyo ali na mano?

Ukutekanya Kwalengele Ulufyengo Ukupwa

Ukutekanya kwa kwa Estere kwalengele ifintu ifyacindama ukucitika. Hamani afumine pa mutebeto wa kubalilapo ninshi “nasamwa . . . no kusansamuka nga nshi,” aishibe ukuti imfumu na namfumu balimutemenwe sana. Lelo ilyo Hamani alefuma pa mpongolo ye sano, amwene Mordekai, umuYuda uwakeene ukulamukontamina. Ico Mordekai alekaanina ukukontamina Hamani, te pa mulandu wa kuti tamucindike, lelo mulandu wa kuti kampingu yakwe tayalemusuminisha kabili talefwaya ukufulwisha Yehova Lesa. E ico Hamani “aishileba no bukali nga nshi.”—Estere 5:9.

Ilyo Hamani ashimikileko umukashi ne fibusa fyakwe pa fyo Mordekai alekaana ukumukontamina, bamwebele ukuti bapekanye icimuti icalepele amamita ukucila pali 22, no kulomba imfumu ukuti imupeele insambu sha kukulikilapo Mordekai. Hamani alitemenwe aya mano bamupandileko kabili ilyo line fye atendeke ukucita ifyo bamwebele.—Estere 5:12-14.

Nomba pali ubu bwine bushiku, Baibolo itila, “imfumu yafililwe ukumona utulo” e ico yasosele ukuti baibelengele ibuuku umwalembelwe imilandu ya Buteko. Mu fyo babelengele, mwali ne lyashi lya bantu abalefwaya ukwipaya Ahasuerusi. Alibukishe ili lyashi; kabili abalefwaya ukumwipaya balibekete no kubepaya. Nomba cali shani kuli Mordekai, uwacenjesheko imfumu Ahasuerusi ukuti abantu bamo balefwaya ukumwipaya? Ilyo line fye, imfumu yaipwishe ifyo Mordekai bamulambula. Bamwebele ukuti tapaba nangu cimo ico bacitila uyu muntu.—Estere 6:1-3.

Imfumu yalifulilwe nga nshi kabili yaipwishe nga kwali ababomfi ba kwi sano pa kuti bayafwe ukubombela pali uyu mulandu. Ku ca kupapusha, Hamani e walipo, aishile lucelocelo, nalimo pa mulandu wa kuti alefwaya imfumu imupeele insambu sha kwipaya Mordekai. Lelo ilyo Hamani talaeba imfumu ico aendeele, imfumu yamwipwishe ico bengacitila umuntu uo imfumu yatemenwe sana. Hamani alemona kwati e o imfumu yalelandapo. E ico atile: Uyo muntu bafwile ukumucindika sana, bafwile ukumufwika ica kufwala ca mfumu, kabili bamuninike pali kabalwe wa mfumu na bacilolo abakata bamupishe mu lubansa lwa mu Shushani no kulamulumbanya pa kuti abantu bonse bomfwe. Elenganyeni ifyo Hamani afulilwe ilyo aishibe ukuti uo bali no kucindika muli uyu musango ni Mordekai! Kabili Hamani wine e o imfumu yaebele ukuti e o apishe Mordekai mu Shushani no kulamulumbanya!—Estere 6:4-10.

Hamani alicitile ifyo imfumu yamwebele nangu ca kutila ici calengele ukuti apate sana Mordekai kabili ayangufyenye ukuya ku ng’anda ninshi nakalipa icine cine. Umukashi wakwe ne fibusa bamwebele ukuti ifyacitike fyalelanga ukuti ifintu fyali no kumubipila ku ntanshi; Mordekai umuYuda ali no kumucimfya.—Estere 6:12, 13.

Pa mulandu wa kutila Estere alitekenye no kulolelako ubushiku na bumbi ubwa kweba imfumu ifyali ku mutima, calengele ukuti amapange ya kwa Hamani yeshibikwe bwino no kuti aseebane. Yehova Lesa afwile e walengele imfumu ukukanasendama pali bulya bushiku. (Amapinda 21:1) E mulandu wine Icebo ca kwa Lesa citukoselesesha ukuba no mutima wa ‘kulindilila.’ (Mika 7:7) Nga tulelindilila, tukasanga ukuti Lesa e wakwata inshila ishisuma nga nshi isha kupwishishamo amafya yesu ukucila inshila shesu.

Alishipile pa Kulanda

Estere tatwalilile fye ukulolela pantu nalimo ici nga calengele imfumu ukukalipa; ilyo apekenye umutebeto walenga bubili, alyebele imfumu ifyali mu mutima. Nomba alandile shani? Ilyo bali pa mutebeto, imfumu yalipwishe Estere na kabili ico alefwaya ukuti imucitile. (Estere 7:2) Iyi nomba e yali inshita ya kuti Estere asose.

Estere afwile alipepele kuli Lesa mu mutalalila ilyo ashilaeba imfumu ukuti: “Nga cili fye bwino kuli imwe, mwe mfumu, kabili nga mwatemwa, ndelomba ukuti mundeke mbe no mweo no kuleka abantu bandi na bo babe no mweo.” (Estere 7:3) Nga mwamona, Estere aebele imfumu amashiwi ayalelanga ukuti alicindike ifyo imfumu yali no kupingula. Estere alipusene na Bashti, namfumu wa kubalilapo uwaseebenye umulume wakwe ku mufulo fye! (Estere 1:10-12) Cimbi ca kutila, Estere tasuushishe imfumu pali filya yacetekele sana Hamani. Lelo apaapete imfumu ukuti imucingilile pa kuti bemwipaya.

Ukwabula no kutwishika, ifyo Estere alombele fifwile fyalipapwishe imfumu. Nani engafwaya ukwipaya namfumu wakwe? Estere atwalilile ukusosa ukuti: “Nabatushitisha, ine na bantu bandi, ukuti batukufye, batwipaye no kutulofya. Abatushitisha ku kuba fye abasha baume na basha banakashi, nga natalelepo fye. Lelo ubu bucushi tabuweme pantu buli no kubipila imfumu.” (Estere 7:4) Estere alilandile pa bwafya ukwabula no kupita mu mbali, kabili atile akuba kubashitisha fye mu busha, nga talandilepo nangu cimo. Lelo ukulofya abaYuda bonse cali cintu icikalamba sana ico imfumu ishali no kulekapo fye.

Ifyo Estere acitile fitusambilisha pa nshila isuma iya kunashanashishamo bambi. Nga ca kutila mulefwaya ukweba umuntu uo mwatemwa nelyo uwapeelwa imilimo iikalamba pa bwafya bumo ubukalamba, kuti cawama ukutekanya, ukuba no mucinshi, kabili umufumacumi ilyo mulelanda no yo muntu.—Amapinda 16:21, 23.

Ahasuerusi aipwishe ukuti: “Nani uyu wine, kabili ali kwi uwapama ukucite ci?” Elenganyeni Estere nasonta Hamani ilyo alelanda ukuti: “Umuntu uulecita ici, uuletulwisha kabili umulwani, ni uyu Hamani umuntu umubi.” Hamani alyumfwile sana umwenso pantu taishibe ifyo imfumu yali no kumupingula. Elenganyeni ifyo icinso ca mfumu catendeke ukwaluka ku bukali, ilyo yailwike ukuti impanda mano iyo yacetekele yabomfeshe ubucenjeshi pa kuti imfumu isuminishe ifunde ilyali no kulenga umukashi yatemenwe ukwipaiwa! Imfumu yalikalipe sana ica kuti yakumpwike bukali bukali no kuya mwi bala pa kuti ubukali bucepeko.—Estere 7:5-7.

Ilyo Hamani bamusansalike, alyumfwile umwenso nga nshi kabili afukeme ku makasa ya kwa namfumu. Ilyo imfumu yabwelele no kusanga Hamani alepaapata Estere pa ca kwikalapo ca kwa namfumu, ubukali bwalicililenapo, pantu yamwene kwati alefwaya ukucenda Estere mu ng’anda ine iya mfumu. Ici calolele mu kuti Hamani nomba balamwipaya fye. Hamani balimusendele ninshi nabamufimba na ku mutwe. Lyena cilolo umo aebele imfumu ukuti Hamani alipekenye icimuti icikalamba apo alefwaya ukukulikila Mordekai. Ilyo line fye, Ahasuerusi atile Hamani wine e o bakulikile pali cilya cimuti.—Estere 7:8-10.

Muli cino calo umwafulisha ulufyengo, kuti twalatontonkanya kwati ulufyengo talwakatale alupwa. Bushe na imwe mwalibala amutontonkanyapo ifi? Estere atwalilile fye ukuba ne subilo, taletontonkanya ukuti calilaala calipwa ifintu tafyakawame. Ilyo inshita yalinga yafikile, alilandile ukwabula umwenso, kabili alicetekele ukuti Yehova e wali no kulungika ifintu. Ifi fine e fyo na ifwe tufwile ukulacita! Yehova taaluka. Na ino ine nshita, Yehova alikwata amaka aya kwishiba no kusokolola ubucenjeshi bwa bantu ababipa nga filya fine acitile kuli Hamani.—Amalumbo 7:11-16.

Aliipeeleshe pa Kuti Alandileko Yehova na Bantu Bakwe

Awe e fyo imfumu nomba yaishibe ukuti kanshi Mordekai talecingilila fye imfumu lelo e wakushishe na Estere. Ahasuerusi asontele Mordekai ukuba cilolo mukalamba, icifulo ico Hamani akwete. Ahasuerusi apeele Estere ing’anda ya kwa Hamani ukubikapo ne fyuma fyakwe fyonse, kabili Estere na o afipeele kuli Mordekai ukuti alefisakamana.—Estere 8:1, 2.

Apo nomba Estere na Mordekai balipuswike, bushe namfumu ali no kwikala fye? Awe, alitwalilile ukubombesha pa kuti apusushe na bambi. Pali iyi nshita, icipope ico Hamani afumishe ica kwipaya abaYuda bonse caleya cilepya fye ngo mulilo mu bufumu bonse ubwa Persia. Hamani alipendwile ukubomfya Puri pa kuti eshibe inshita yalingile iya kwipailapo abaYuda. (Estere 9:24-26) Pali no kupita imyeshi pa kuti ubu bushiku bufike, lelo bwalepalamina lubilo lubilo. Bushe pali ico Estere ali no kucitapo pa kuti abaYuda tababepeye?

Estere aliipeeleshe no kubika umweo wakwe mu kapoosa mweo na kabili. No yu wine muku aile ku mfumu ukwabula ukuti imwite. Uno muku, aile mu kupaapatilako abantu bakwe ku mfumu ninshi alelila, alelomba ukuti umulume wakwe aalule icipope ca kwipaya abaYuda bonse. Lelo amafunde ayo ishamfumu sha Persia yalepanga tabaleyalula nakalya. (Daniele 6:12, 15) E ico nomba imfumu yapeele Estere na Mordekai amaka ya kuti bapange amafunde yambi. Icipope cimbi califumine, icapeele abaYuda insambu sha kuilandwila. Inkombe sha pali bakabalwe shalibutukishe no kutwala ili lyashi ilisuma ku baYuda bonse mu buteko bwa Persia. AbaYuda abengi nomba balikwete isubilo. (Estere 8:3-16) Kuti twaelenganya ne fyo abaYuda mu fitungu fyonse batendeke ukupekanya ifyanso fya bulwi no kuipekanya ukulwa, kabili akukanaba ici cipope icipya nga tabacitile ifi. Lelo icacindama ca kuti, bushe “Yehova wa mabumba,” ali no kuba na bantu bakwe?—1 Samwele 17:45.

Ilyo ubushiku bwasalilwe bwafikile, abantu bakwa Lesa baliipekenye. Pali iyi nshita, abengi aba mu buteko bwa Persia bali ku lubali lwa baYuda, pantu ilyashi lyalifikile konse ukuti Mordekai umuYuda e wali nomba cilolo mukalamba. Yehova alengele abantu bakwe ukucimfya. Ukwabula no kutwishika, alishininkishe ukuti abantu bakwe bacimfya abalwani babo nakalya nakalya pa kuti bekabemina na kabili.b—Estere 9:1-6.

Na kabili, abana baume 10 aba kwa Hamani imbifi abatwalilila ukuba no mweo, ubumi bwa kwa Mordekai nga bwali mu kapoosa mweo kabili nga talebomba bwino umulimo wa kwangalila ing’anda ya kwa Hamani iyashele. E ico nabo bene balibepeye. (Estere 9:7-10) Kanshi ukusesema kwa mu Baibolo kwalifikilishiwe, pantu kale Lesa atile abena Amaleke bonse abali abalwani ba bantu bakwe bali no kulofiwa. (Amalango 25:17-19) Abana ba kwa Hamani bafwile bali pa balekelesheko ukwipaiwa mu luko lwa bena Amaleke.

Nangu ca kutila Estere ali umwaice, alibombele imilimo iikalamba nga nshi pamo nga, ukupanga amafunde ya mfumu ayakumine ifya nkondo no kwipaya bantalamisoka. Iyi milimo ifwile yalikosele sana. Lelo Yehova alefwaya abantu bakwe ukucingililwa pa kuti tabalobele; mu luko lwa bena Israele e mwali no kufuma Mesia uo batile akesa, kabili ni muli uyu wine fye epela e mo abantu bonse bali no kupusukila! (Ukutendeka 22:18) Ababomfi ba kwa Lesa aba muno nshiku balitemwa nga nshi pa kwishiba ukuti ilyo Mesia, Yesu, aishile pano calo, alikeenye abasambi bakwe ukulalwa inkondo.—Mateo 26:52.

Na lyo line, Abena Kristu balalwa ubulwi bwa ku mupashi; Satana alafwaisha ukonaula icitetekelo cesu kuli Yehova Lesa. (2 Abena Korinti 10:3, 4) Ala Estere aba ca kumwenako icisuma nga nshi! Nga filya acitile, shi na ifwe natulelanga ukuti twalikwata icitetekelo pa kuba abatekanya kabili abacenjela ilyo tulenashanasha bambi, ukuba abashipa, no kuipeelesha ukulandilako abantu ba kwa Lesa.

[Amafutunoti]

[Akabokoshi pe bula 28]

Amepusho Twingepusha Pali Estere

Mulandu nshi Mordekai asuminishishe Estere ukuupwa ku mwaume uushalepepa Lesa wa cine?

Tapaba icilanga ukuti ico Mordekai asuminishishe Estere ukuupwa ku mfumu ni co alefwaya ukuliilapo no kufwaya ukulumbuka nge fyo abasoma bamo balanda. Apo Mordekai ali muYuda uwali ne cishinka kuli Lesa, te kuti asuminishe Estere ukuupwa ku muntu uushalepepa Lesa wa cine pa mulandu fye wa kufwaya ukulumbuka. (Amalango 7:3) Mu nshimi sha kale isha baYuda, batila Mordekai alikeene ukuti Estere opwe kuli Ahasuerusi. Ukwabula no kutwishika, Mordekai na Estere, abali abasha mu buteko ubwaletekwa ne mfumu iya-afya iyo abantu balemona kwati ni lesa, tabakwate amaka ya kukaana ifyo imfumu yalefwaya ukucita. Mu kuya kwa nshita, calishilemoneka fye apabuuta tuutu ukuti Yehova abomfeshe icupo ca kwa Estere pa kuti apusushe abantu bakwe.—Estere 4:14.

Mulandu nshi mwi buuku lya kwa Estere mushabela ishina lya kwa Lesa ilya kuti Yehova?

Ukwabula no kutwishika, Mordekai e walembele ibuuku lya kwa Estere. Pa kubala, ili ibuuku nalimo balisungiile capamo ne fyalembwa fya buteko ifya bena Persia ilyo bashilalibweseshamo ku Yerusalemu. Ishina lya kwa Lesa ilya kuti Yehova, alilembwa muli ili ibuuku, abantu abalepepa balesa ba bena Persia nga balilyonawile. Lelo nangu cali ifi, te kuti tutwishike ukuti Yehova e walengele ifyaba muli ili ibuuku ukucitika. Icisuma ca kuti, ishina lya kwa Lesa e mo lyaba mwi buuku ilyo balembele pa kubala mu ciHebere. Mu fikomo ifyakonkana, cila cikomo citendekela ne cilembo icaba mwi shina lya kwa Lesa. Ili shina balilembele mu musango wa kuti uulebelenga kuti amona icilembo ca kubalilapo nelyo ica kulekelesha mu mashiwi yakonkene ifyalepanga ishina lya kwa Lesa (YHWH).

Bushe ifyalembwa mwi buuku lya kwa Estere filomfwana ne lyashi lya kale?

Abasuusha balakaana ifyalembwa mwi buuku lya kwa Estere. Lelo abasoma bamo balimona ukuti uwalembele ili ibuuku alishibe sana pa shamfumu sha bena Persia, ifya makuule, ne ntambi shabo. Cishinka ukuti Namfumu Estere tabamulumbula mu fyalembwa ifyabapo na ino nshita, lelo kwaliba na bambi aba ku bufumu abo bashalumbula. Na kabili, ifyalembwa filanga ukutila kwali umuntu uwe shina lya kuti Mardukâ, mu cina Persia, ishina ilipilibula ukuti Mordekai, uwali cilolo mu Shushani pa nshita ifyalembwa muli ili buuku fyalecitika.

[Akabokoshi pe bula 29]

Ukusesema Ukwafikilishiwe

Ilyo Mordekai na Estere balwishishe ukuti ifintu fiwame ku bantu ba kwa Lesa, bafikilishe ukusesema na kumbi ukwa mu Baibolo. Imyaka ukucila 1,200 ku numa, Yehova alengele Yakobo ukusobela ifyo umwana wakwe umo ali no kucita. Atile: “Benjamini akalalepaula ngo mumbulu. Ulucelo akalalya inama iyaipaiwa na ku cungulo akala-akanya ifyapokololwa.” (Ukutendeka 49:27) “Ulucelo,” e kutila ilyo ishamfumu sha bena Israele shatendeke ukuteka, mu batuntwike muli Benjamini mwasanshishe Imfumu Shauli na bashilika bambi aba maka abalelwilako abantu ba kwa Yehova. “Ku cungulo,” e kutila ilyo ishamfumu sha bena Israele shalekele ukuteka, Estere na Mordekai aba mu mukowa wa kwa Benjamini balicimfishe abalwani ba kwa Yehova. Kanshi kuti twatila, nabo bene balyakenye ifyapokololwa, pantu ifyuma ifingi ifya kwa Hamani fyapeelwe kuli bena.

[Icikope pe bula 25]

Estere alitashishe sana pa fyo imfumu yamubelele uluse

[Icikope pe bula 26, 27]

Estere alishipile no kusokolola amapange yabipa aya kwa Hamani

[Icikope pe bula 28, 29]

Estere na Mordekai batumine icipope ku baYuda bonse mu Buteko bwa Persia