Bushe Yesu Aleitumpa mu Fikansa fya Calo?

ABALEMBELE amabuuku ya Mbila Nsuma balilondolola ifintu ifingi ifyacitike ilyo Yesu ali pano calo ifyali no kumulenga ukuitumpa mu fikansa fya calo. Ku ca kumwenako, ilyo fye Yesu abatishiwe, ninshi ali ne myaka nalimo 30, Satana Kaseebanya amwebele ukuti abe kateka wa calo conse. Inshita imbi, abantu balefwaya ukuti abe imfumu. E lyo pa nshita imbi na yo, abantu balefwaya ukumupatikisha ukuwamya imitekele. Bushe Yesu acitile shani? Natumfwe ifyacitike.

Kateka wa calo conse. Amabuuku ya Mbila Nsuma yatila Satana Kaseebanya apeele Yesu “amabufumu yonse aya pano calo” pa kuti abe kateka. Taleni tontonkanyeni ifyo Yesu ali no kucitila abantunse abalecula nga ca kutila alibomfeshe amaka yakwe ku kuteka icalo conse! Bushe kuti kwaba umuntu uwatemwa ukuba mu fikansa fya calo kabili uufwaya ukuwamya ifintu uwingakaana ukuba kateka? Yesu ena alikeene.—Mateo 4:8-11.

Imfumu. Mu nshiku sha kwa Yesu, abantu abengi balefwaya sana kateka uwali no kupwisha amafya bakwete mu mikalile ne mitekele. Ilyo abantu bamwene imibele iisuma iyo Yesu akwete, balefwaya ukuti na o aitumpe mu fikansa fya calo. Cinshi acitile? Yohane, uwalembeleko ibuuku lya Mbila Nsuma, atile: “Ilyo Yesu aishibe ukuti bali mupepi no kumwikata pa kuti bamubike pa bufumu, alifumineko aile na kabili eka ku lupili.” (Yohane 6:10-15) Ukwabula no kutwishika, Yesu alikeene ukuitumpa mu fikansa fya calo.

Uwa kuwamya imitekele. Umfweni ifyacitike ilyo kwashele inshiku ishinono ukuti Yesu bamwipaye. Abasambi ba baFarise, abashalefwaya ukulatekwa na bena Roma, e lyo na ba mu kabungwe ka kwa Herode, abatemenwe imitekele ya bena Roma baile kuli Yesu. Balefwaya ukumupatikisha ukuba mu fikansa fya calo. Baipwishe Yesu nga cali fye bwino ku baYuda ukulalipila imisonko ku bena Roma.

Marko alilanda ifyo Yesu abaswike, ukuti: “‘Mulandu nshi mulenjesesha? Ndeteleni indalama imo iya denari, imonepo.’ Na bo baliletele. E lyo abepwishe ati: ‘Bushe uyu umutwe ne fi balembapo fya kwa nani?’ Na bo bayaswike abati: ‘Fya kwa Kaisare.’ E lyo Yesu abebele ati: ‘Kanshi peeleni ifya kwa Kaisare kuli Kaisare, ne fya kwa Lesa kuli Lesa.’” (Marko 12:13-17) Icitabo citila Church and State—The Story of Two Kingdoms calandile pali Yesu ukuti: “Alikeene ukuitumpa mu fya calo ukuti abalubule ku mitekele yabipa, kabili alilangilile bwino bwino ifyo abantu balingile ukupeela kuli Kaisare na kuli Lesa.”

Nangu ca kutila Yesu taleitumpa mu fikansa fya calo, alebika amano ku bantu abalecula pa mulandu wa bupiina, ubufufuntungu, no lufyengo. Na kuba, Baibolo ilanga ukuti aleumfwila uluse abalecula. (Marko 6:33, 34) Na lyo line, Yesu tacitilepo icili conse pa kuti afumyepo ulufyengo, nangu ca kutila bambi balefwaya ukuti aitumpe mu fikansa fya calo.

Ifi ifya kumwenako fyatulanga fye apabuuta ukuti Yesu alikeene ukuitumpa mu fikansa fya calo. Inga Abena Kristu muno nshiku, bushe balingile ukuitumpa mu fikansa fya calo?