Sambilileni Icebo ca kwa Lesa
Cinshi Cikacitika pa Bushiku bwa Bupingushi?
Ici cipande cilelanda pa mepusho ayo nalimo mufwaisha ukwishiba kabili cilemulanga napo mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.
1. Bushe Ubushiku bwa Bupingushi ni cinshi?
Nga fintu icikope cili ku kulyo cilelangilila, abengi batontonkanya ukuti pa Bushiku bwa Bupingushi, abantu abengi nga nshi bakesa ku cipuna ca kwa Lesa ku kupingulwa ukulingana ne fyo balecita kale, bamo bakalambulwa no bumi bwa ku muulu, e lyo bambi bakaya mu kulunguluka mu mulilo wa pe. Lelo Baibolo ilanga ukuti ico Ubushiku bwa Bupingushi bukeshila, kupususha abantu ku lufyengo. (Amalumbo 96:13) Lesa alisonta Yesu ukuba Kapingula uukaleta umulinganya ku bantunse.—Belengeni Esaya 11:1-5; Imilimo 17:31.
2. Bushe Ubushiku bwa Bupingushi bukaleta shani umulinganya?
Ilyo umuntu wa kubalilapo Adamu, apondokele Lesa ku mufulo fye, alengele abana bakwe bonse ukubembuka, ukulacula no kulafwa. (Abena Roma 5:12) Pa kufumyapo ulu lufyengo, Yesu akabuusha iminshipendwa ya bantu abafwa. Ibuuku lya Ukusokolola lilanda ukuti ici cikacitika mu myaka 1,000 ilyo Yesu Kristu akalateka.—Belengeni Ukusokolola 20:4, 11, 12.
Abakabushiwa tabakapingwilwe pa fyo bacitile ilyo tabalafwa, lelo bakapingulwa ukulingana ne fyo bakacita ilyo ifyaba mu “fimfungwa” ifyalandwapo mwi buuku lya Ukusokolola icipandwa 20 fikasokololwa. (Abena Roma 6:7) Umutumwa Paulo alandile ukuti pa bantu abakabuushiwa no kukwata ishuko lya kusambilila pali Lesa pakaba “abalungama na bashalungama.”—Belengeni Imilimo 24:15.
3. Finshi fikacitika mu Bushiku bwa Bupingushi?
Abafwile ukwabula ukwishiba Yehova Lesa no kumubombela bakabuuka pa kuti bakapeelwe ishuko lya kwaluka no kucita ifisuma. Nga bacita ifisuma, “bakabuukila ku mweo.” Lelo bamo abakabuuka bakakaana ukusambilila inshila sha kwa Yehova. Aba bena “bakabuukila ku bupingushi.”—Belengeni Yohane 5:28, 29; Esaya 26:10; 65:20.
Ilyo imyaka 1,000 iya Bushiku bwa Bupingushi ikapwa, Yehova akaba nalenga abantu aba cumfwila ukuba abapwililika nga filya fine abantunse ba kubalilapo bali. (1 Abena Korinti 15:24-28) Ala mwandini, ili isubilo lisuma nga nshi ku bantunse aba cumfwila! Ilyo kukaba ubwesho bwa kupelekeshako, Lesa akafumya Satana Kaseebanya mu cilindi cabula impela, umo akaba nakakwa pa myaka 1,000. Satana na kabili akafwaya ukufumya abantu kuli Yehova. Abakakaana ukumumfwila bakekala umuyayaya pano calo.—Belengeni Esaya 25:8; Ukusokolola 20:7-9.
4. Bushiku nshi bumbi ubwa bupingushi ubukaletela abantunse ifisuma?
Baibolo na kabili ilabomfya ishiwi lya kuti “ubushiku bwa bupingushi” lintu ilelanda pa cili no kucitika icikafumyapo buno bwikashi. Ubu bushiku bwa bupingushi bukesa mu kupumikisha nga filya Ilyeshi lya mu nshiku sha kwa Noa lyaishile, ilyaonawile inkulo yonse iya bantu ababipa. Nomba ubonaushi ubwa “bantu abashipepa” ubupaleme nga nshi bukalenga abantu abasuma ukwikala mwi sonde ilipya “umukaba ubulungami.”—Belengeni 2 Petro 3:6, 7, 13.
Nga mulefwaya ukwishibilapo na fimbi, belengeni pa mabula 213 ukufika ku 215 mu citabo citila Bushe Cinshi Baibolo Isambilisha? icalembwa ne Nte sha kwa Yehova.
[Icikope pe bula 16]
“Ubupingushi bwa Kulekelesha,” ukulingana na Gustave Doré, 1832-1883
[Abatusuminishe]
Engravings by Doré