Amepusho Ukufuma Ku Babelenga
Bushe Goge wa ku Magoge uo balandapo mwi buuku lya kwa Esekiele nani?
Pa myaka iingi, twalelondolola mu mpapulo shesu ukuti Goge wa ku Magoge e shina Satana Kaseebanya apeelwe ilyo ba mutamfishe ku muulu. Ico twalelondolwela ifi, ni co ibuuku lya Ukusokolola lilanga ukuti Satana Kaseebanya e utungulula abasansa abantu ba kwa Lesa. (Ukus. 12:1-17) E ico twalemona ukuti Goge lifwile ukuba lishina na limbi ilya kwa Satana.
Lelo pa numa ya kumona ifyo amalembo yambi yalanda pali Goge wa ku Magoge, calengele ukuti tutontonkanye pa fyo twalelondolola kale. Moneni ifyo Yehova alanda pali Goge ilyo alandile pa nshita Goge bakamucimfya, atile: “Nkakupeela ku fyuni ifiswango ukuti fikakulye, ifyuni fya misango yonse iya mapindo, na ku finama fya mpanga.” (Esek. 39:4) Na kabili Yehova atile: “Muli ubo bushiku e mo nkapeela Goge incende, apa kushiikwa mu Israele . . . Kulya e ko bakashiika Goge ne bumba lyakwe.” (Esek. 39:11) Lelo bushe “ifyuni ifiswango ne finama fya mpanga” kuti fyalya shani icibumbwa ca mupashi? Kabili bushe Satana kuti ‘bamushiika’ shani pano calo? Baibolo yalilanda fye apabuuta tuutu ukuti Satana bakamukaka pa myaka 1,000, tabakamulye ku fyuni nelyo ukumushiika.—Ukus. 20:1, 2.
Baibolo yalitweba ukuti pa mpela ya myaka 1,000, Satana akakakulwa ukufuma mu cilindi cabula impela, no “kuyalufya inko sha mu tupinda tune utwe sonde, ishitwa Goge na Magoge, ku kushilonganikila ukulwa inkondo.” (Ukus. 20:8) Nomba bushe Satana kuti alufya shani Goge nga ca kuti e Goge wine? Kanshi “Goge” uo balandapo mu kusesema kwa kwa Esekiele na mwi buuku lya Ukusokolola te Satana.
Inga kanshi Goge wa ku Magoge nani? Pa kuti twasuke ici cipusho, tulingile ukwishiba abakasansa abantu ba kwa Lesa abo amalembo yalandapo. Baibolo yalanda ukuti abakasansa abantu ba kwa Lesa te ‘Goge wa ku Magoge’ epela, lelo ne “mfumu ya ku kapinda ka ku kuso” e lyo ne “shamfumu sha pe sonde.” (Esek. 38:2, 10-13; Dan. 11:40, 44, 45; Ukus. 17:14; 19:19) Bushe ici calola mu kuti aba bonse bakasansa abantu ba kwa Lesa pa nshita shalekanalekana? Awe nakalya. Baibolo ilanga ukuti uku, kukaba fye kusansa kumo. Mulandu nshi twalandila ifi? Pantu Amalembo yalanda ukuti inko shonse isha pe sonde shikemina abantu ba kwa Lesa, ne ci e cikalenga inkondo ya Armagedone ikatendeke.—Ukus. 16:14, 16.
Aya Amalembo ayalanda pa fyo abantu ba kwa Lesa bakabemina, yalalanga apabuuta tuutu ukuti Goge wa ku Magoge, te Satana iyo, lelo ni nko ishikomana akapi no kwimina abantu ba kwa Lesa. Bushe “imfumu ya ku kapinda ka ku kuso” e ikatungulula ishi nko? Tatwaishiba bwino bwino. Lelo cimoneka kwati e ikatungulula, pantu Yehova alanda pali Goge ukuti: “Ukesa ukufuma ku cifulo cobe, ukufuma ku kapinda ka ku kuso ukutali sana, iwe pamo ne nko ishingi, bonse abendela pali bakabalwe, ibumba ilikalamba, kabili ibumba lya bashilika ilikalamba.”—Esek. 38:6, 15.
Kasesema Daniele uwaliko pa nshita imo ine na Esekiele, alandile pa mfumu ya ku kapinda ka ku kuso ati: “Kukaba ilyashi ilikaisakamika, ukufuma ku kabanga na ku kapinda ka ku kuso, kabili ikafuma ne cipyu icikalamba ku kulofya abengi no kubonaula. Kabili ikashimpa amatenti ya iko ayapala isano pa kati ka bemba mukalamba no lupili Lwayemba ulwa mushilo; awe no kufwa e fyo ikafwa, kabili takwakabe uwa kuyafwa.” (Dan. 11:44, 45) Ifi Kasesema Daniele alandile fyalipalana sana ne fyalembwa mwi buuku lya kwa Esekiele ilyalanda pa fyo Goge akacita.—Esek. 38:8-12, 16.
Cinshi cikacitika ilyo inko shikasansa abantu ba kwa Lesa? Ibuuku lya kwa Daniele lyatila: “Mu nshita ilya akema [ilyo armagedone ikatendeka] Mikaele [Yesu Kristu], cilolo mukalamba uwimininako abana ba bantu bobe [ukutula 1914]. Kabili kukaba ne nshita ya kucula iya kuti tayatala aibako ukutula pa kubapo kwa luko ukufika ku nshita ilya [ubucushi bukalamba]. Na mu nshita ilya abantu bobe bakapusuka, onse uwasangwa nalembwa mwi buuku.” (Dan. 12:1) Ifi Yesu akacita fyalilembwa na mu Ukusokolola 19:11-21.
Nomba bushe “Goge na Magoge” uo balandapo pa Ukusokolola 20:8 nani? Ilyo kukaba ubwesho bwa kulekeleshako pa mpela ya myaka 1,000, abakapondokela Yehova bakaba fye kwati ni ‘Goge wa ku Magoge,’ inko ishikasansa abantu ba kwa Lesa pa mpela ya bucushi bukalamba. Kabili icintu cimo cine e cikacitikila amabumba yonse yabili, yakonaulwa umuyayaya! (Ukus. 19:20, 21; 20:9) Kanshi “Goge na Magoge” uwalembwa mwi buuku lya Ukusokolola, bantu bonse abakapondokela Lesa pa mpela ya myaka 1,000.
Apo twalitemwa sana ukusambilila Icebo ca kwa Lesa, tulafwaisha ukwishiba uukaba “imfumu ya ku kapinda ka ku kuso.” Nangu ca kuti tatwaishiba bwino uukatungulula inko ishikasansa abantu ba kwa Lesa, twalishiba ukuti: (1) Yesu akacimfya no konaula Goge wa ku Magoge na bashilika bakwe; na (2) Imfumu iileteka Yesu Kristu akapususha abantu ba kwa Lesa no kubengisha mu calo cipya umukaba umutende no mutelelwe.—Ukus. 7:14-17.