AMASUKO KU MEPUSHO YA MU BAIBOLO
Bushe abantu bakatwalilila fye ukwikala ifi fine?
Bushe limo mutontonkanya ukuti tatwikala imyaka iingi pa calo?
Bushe mwalibala amutontonkanyapo nga ca kuti kwaliba ifyacila pa kwangala, ukwingila incito, ukuupa nelyo ukuupwa, ukukwata abana e lyo no kukota? (Yobo 14:1, 2) Baibolo ilanda ukuti na bantu aba mano sana nabo balafwaya ukwishiba icasuko kuli ici icipusho.—Belengeni Lukala Milandu 2:11.
Cinshi twabela pano calo? Mu kubalilapo, tufwile ukuyipusha atuti, Bushe twaishilebako shani? Abantu abengi nga batontonkanya sana pa fyo umubili na bongobongo yesu fyapangwa, basanga ukuti kwaliba Kabumba uwatubumbile. (Belengeni Amalumbo 139:14) Nga ca kuti kwaliba Kabumba uwatubumbile, ninshi kuti twatila kwaliba icalengele atubumbe. Kanshi nga twaishiba icalenga ukuti atubumbe, kuti twaba ne nsansa.
Cinshi Lesa abumbiile abantu?
Lesa alipaalile Adamu na Efa kabili alibapeele umulimo uusuma sana. Lesa alefwaya ukuti bakakwate abana, bakalenge icalo ukuba paradaise e lyo bakekale umuyayaya.—Belengeni Ukutendeka 1:28, 31.
Ubufwayo bwa kwa Lesa tabwafikilishiwa pantu Adamu na Efa balibembwike. Na lyo line, Lesa akafikilisha ubufwayo bwakwe. Baibolo itweba ukuti Lesa alafwaisha ukupususha abantu abamucetekela kabili akafikilisha ubufwayo bwakwe pano calo. E ico Lesa afwaya ukuti mukabe mu calo ilyo ubufwayo bwakwe bukafikilishiwa. (Belengeni Amalumbo 37:29) Nga mulefwaya ukuba mu calo ilyo Lesa akafikilisha ubufwayo bwakwe, kuti mwatendeka ukusambilila Baibolo.