ICIPANDE ICIKALAMBA | BAMALAIKA—BUSHE E KO BABA? CINSHI TUFWILE UKWISHIBILA ICISHINKA?

Bushe Bamalaika Baba Shani?

Bushe mulafwaya ukwishiba ifyo bamalaika baba, ifyo baishilebako ne milimo babomba? Baibolo kuti yatwafwa ukwishiba amasuko kuli aya mepusho pantu amashiwi yabamo yafuma kuli Lesa. (2 Timote 3:16) Finshi Baibolo yalanda pali bamalaika?

Nga filya fine Lesa Mupashi, bamalaika nabo mipashi tabamoneka, kabili ‘tabakwata umunofu na mafupa.’ Bamalaika ba cishinka bekala ku muulu kulya kwine kwaba Lesa.—Luka 24:39; Mateo 18:10; Yohane 4:24.
Pa nshita shimo, bamalaika balemonekela pe sonde mu mibili ya bantunse nga balebomba umulimo wa kwa Lesa, kabili nga bapwa ukubomba iyo milimo balesanguka imipashi na kabili.—Abapingushi 6:11-23; 13:15-20.
Nangu ca kuti ilingi line Baibolo ilanda pali bamalaika kwati baume, kabili lyonse ilyo balesangukila mu bantu baleba abaume, takwaba bamalaika abaume nelyo abanakashi. Bamalaika tabopa kabili tabakwata abana. Na kabili, Lesa tabalile abapanga abantunse pa calo e lyo baisaba bamalailaka. Baibolo iita bamalaika ukuti “abana baume ba kwa Lesa wa cine,” pantu Yehova e wababumbile.—Yobo 1:6; Amalumbo 148:2, 5.
Baibolo yalilanda pa “ndimi sha bantu ne sha bamalaika,” kanshi ifibumbwa fya mipashi fyalikwata ululimi filanda. Nangu ca kuti Lesa alibomfyapo bamalaika ukulanda na bantunse, tatusuminisha ukulapepa bamalaika.—1 Abena Korinti 13:1; Ukusokolola 22:8, 9.
Bamalaika balifula icine cine kabili nalimo balifika amabilioni.—Daniele 7:10; Ukusokolola 5:11.
Bamalaika ni “mpalume,” e kutila bamaka sana ukucila abantu, kabili balikwata sana amano. Bamalaika bafwile balabutukisha sana ukucila icintu icili conse pano pe sonde.—Amalumbo 103:20; Daniele 9:20-23.
Nangu ca kuti bamalaika balikwata sana amano na maka, kwaliba fimo ifyo bashaishiba.—Mateo 24:36; 1 Petro 1:12.
Bamalaika babumbilwe ne mibele iyakwatako Lesa kabili balikwata na maka ya kuisalila ifya kucita. Kanshi nga filya fine caba ku bantu, nabo kuti basalapo ukucita icisuma nelyo icabipa. Ku ca bulanda, bamalaika bamo basalilepo ukupondokela Lesa.—Yuda 6.

Bushe Bamalaika Ba Kwa Lesa Bateyanishiwa Shani?

Malaika mukalamba, Mikaele, e malaika wakwatisha amaka. Baibolo ilangilila ukuti Mikaele e shina limbi ilya kwa Yesu Kristu.—1 Abena Tesalonika 4:16; Yuda 9.

Baserafi ni bamalaika abacindama sana kabili babomba imilimo iikalamba. Balishinguluka icipuna ca bufumu ica kwa Lesa.—Esaya 6:1-3.

Bakerubi nabo balikwata icifulo icikalamba kabili babomba imilimo yaibela iilenga Lesa Wa Maka yonse acindikwa. Ilingi line Baibolo ibalandapo ninshi balebombela Lesa.—Ukutendeka 3:24; Esekiele 9:3; 11:22.

Iminshipendwa ya bamalaika bambi ni nkombe sha kwa Lesa wa Maka Yonse kabili alababomfya ku kufikilisha ubufwayo bwakwe.a—AbaHebere 1:7, 14.

a Nga mulefwaya ukwishibilapo na fimbi pali bamalaika, belengeni icipandwa 10 mu citabo citila Bushe Cinshi Baibolo Isambilisha? kabili kuti mwabelenga na pa fyebo fimbi muli ici citabo pa mutwe utila “Bushe Mikaele Malaika Mukalamba Nani?” Ici citabo calembwa ne Nte sha kwa Yehova kabili kuti mwacisanga na pa www.jw.org/bem.