Muletungilila Imitekele ya kwa Yehova!

1, 2. Cinshi bonse tulingile ukushininkisha? (Moneni icikope pa muulu.)

NGA fintu twasambilile mu cipande cafumineko, Satana Kaseebanya alanda ukuti Yehova te kateka musuma kabili abantu kuti baba ne nsansa nga baleiteka abene. Bushe ifi Satana alanda fya cine? Tutile abantu abasalapo ukuiteka bali no kwikala umuyayaya, bushe nga baleba ne nsansa ukulaikala ukwabula ukuti Lesa alebateka? Bushe nga mwaliba ne nsansa amukanalatungululwa na Lesa e lyo muleikala umuyayaya?

² Cila muntu alingile ukuyasukila aya mepusho kabili alingile ukutontonkanyapo sana. Nga twacita ifi, kuti twaishiba ukuti imitekele ya kwa Yehova yalilungama, kabili e mitekele iisuma sana. Na kabili tulingilile ukutungilila iyi mitekele. Ifyo Baibolo ilanda filalenga twashininkisha ukuti imitekele yakwe isuma sana. Tontonkanyeni pa fyo Amalembo yalanda pa nsambu isho Yehova akwata isha kuteka.

YEHOVA ALIKWATA INSAMBU SHA KUTEKA

3. Mulandu nshi Yehova alingila ukuba Kateka ku muulu na pano isonde?

³ Yehova e walinga ukuba Kateka ku muulu na pano isonde pantu e Lesa wa maka yonse kabili e Kabumba. (1 Imila. 29:11; Imil. 4:24) Pa Ukusokolola 4:11, palanda pa cimonwa ica ba 144,000 abakateka na Kristu ku muulu ninshi balesosa abati: “Mwalilinga, mwe Yehova, mwe Lesa wesu, ukupokelela ubukata no mucinshi na maka, pantu ni mwe mwabumbile ifintu fyonse, kabili ni pa mulandu wa kufwaya kwenu fyabeleleko no kubumbwa.” Ca cine apo Yehova e wabumba ifintu fyonse, e walinga ukulateka abantu e lyo ne fibumbwa fya ku muulu.

4. Cinshi ukupondokela imitekele ya kwa Lesa kwabela kukanabomfya bwino ubuntungwa bwa kuisalila?

⁴ Takwaba nangu cimo ico Satana abumba. Kanshi takwata insambu sha kuba kateka ku muulu na pano isonde. Ifi Satana na bantu bakubalilapo bapondokele imitekele ya kwa Yehova, balangile ukuti bacilumba. (Yer. 10:23) Kwena apo balikwete ubuntungwa bwa kuisalila ifyo balefwaya, bali no kusalapo nga kulatekwa na Lesa nelyo iyo. Lelo bushe ifi bakwete ubuntungwa bwa kuisalila ifyo balefwaya, balikwete insambu sha kusalapo ukulaitungulula? Awe. Ubuntungwa abantu bakwata ubwa kusalapo ifyo balefwaya bulabafwa ukulapingula pa fintu ifingi cila bushiku. Lelo tabakwata insambu sha kupondokela Kabumba wabo kabili Kapeela wa Bumi. Ukwabula no kutwishika, ukupondokela Yehova kukanabomfya bwino ubuntungwa bwa kuisalila ifyo tulefwaya. Fwe bantunse twalinga ukulatekwa na Yehova.

5. Mulandu nshi twingacetekela ukuti mu fyo Lesa apingula mulaba umulinganya?

⁵ Kwaliba umulandu na umbi uulanga ukuti Yehova e walinga ukuba Kateka ku muulu na pano isonde. Lesa wa mulinganya. Umwine atile: “Nine Yehova, uwaba no luse ulukalamba, ubulungi no bulungami mwi sonde; pantu ifi fintu e fyo nsekelamo.” (Yer. 9:24) Yehova takonka amafunde ayalembwa na bantu abashapwililika pa kuti eshibe icalungama. Yehova umwine wa mulinganya kabili uyu e mulandu apeelela abantu amafunde. Kuti twacetekela ukuti amafunde yakwe yonse ne fyo apingulapo ukucita fyalilungama pantu “pa bulungami na pa bupingushi e papampamikwa icipuna [cakwe] ica bufumu.” (Amalu. 89:14; 119:128) Nangu ca kuti Satana alanda ukuti Yehova te kateka musuma, Satana alifilwa ukulenga mu calo mwaba umulinganya.

6. Mulandu nshi umo uo Yehova alingila ukuba kateka wa calo?

⁶ Na kuba Yehova e walinga ukuba Kateka ku muulu na pano isonde pantu alikwata amano kabili alishiba ifya kusunga umuulu ne sonde. Ku ca kumwenako, Lesa alipeele Umwana wakwe amaka ya kundapa amalwele ayo badokota balefilwa ukundapa. (Mat. 4:23, 24; Marko 5:25-29) Filya Yesu aleundapa abantu Yehova talemona ukuti fipesha mano, pantu alishiba ifyo umubili waba kabili alikwata amaka ya kundapa ubulwele ubuli bonse. Na kabili alikwata na maka aya kubuusha abafwa no kucincitila utuyofi.

7. Bushe amano ya kwa Yehova yacila shani amano abantu aba muli cino calo icitekwa na Satana bakwata?

⁷ Abantu abatungululwa na Satana bacili balafwaya inshila ishingalenga mu fyalo bekala mwaba umutende kabili balaumfwana ne fyalo fimbi. Ni Yehova fye e wakwata amano ayakulenga mwi sonde mwaba umutende. (Esa. 2:3, 4; 54:13) Ilyo tulesambilila pa fyo Yehova aishiba ne fyo aba na mano, tumfwa nga filya umutumwa Paulo aumfwile uwatile: “Iye amapaalo ubwingi ayafuma kuli Lesa! Yangu ifyo akwatisha amano! We fintu ubwingi ifyo aishibisha! Takuli nangu umo uwingeluka ubupingushi bwakwe ne mibele yakwe!”—Rom. 11:33.

IMITEKELE YA KWA YEHOVA E YAWAMISHA

8. Finshi mwatemwa sana pa mitekele ya kwa Yehova?

⁸ Baibolo taipelela fye pa kulanda ukuti Yehova e walinga ukuteka. Ilalanda na pa mulandu imitekele yakwe yawamina ukucila imbi. Umulandu umo wa kuti imitekele yakwe ilanga ukuti aliba no kutemwa. Na kuba twalitemwa imitekele yakwe. Lesa ‘wa luse kabili wa mutembo, alakokola ukukalipa kabili alifulisha icikuuku ne cine.’ (Ukufu. 34:6) Lesa alicindika ababomfi bakwe. Alatusakamana ukucila ne fyo tuisakamana fwe bene. Yehova tafisa ifisuma kuli bakapepa bakwe ukupusanako ne fyo Satana Kaseebanya alanda. Na kuba alitupeele na Umwana wakwe uo atemwa sana ukutufwila pa kuti tukabe no mweo wa muyayaya!—Belengeni Amalumbo 84:11; Abena Roma 8:32.

9. Twaishiba shani ukuti Lesa alabika mano na ku muntu umo umo?

⁹ Yehova tapelela fye pa kutemwa abantu bakwe nge bumba. Lelo alibika amano ku muntu umo umo. Natulande pa fyacitike kale pa myaka 300 ilyo Yehova aleimya abapingushi abalepususha abena Israele ku balebacusha. Muli ilya nshita, alisakamene Ruti umwanakashi uushali mwina Israele uwaipeeleshe ukuba kapepa wa cine. Yehova alipaalile Ruti, alimupeele umulume no mwana umwaume. Na kabili ilyo Ruti akabuushiwa, akesaishiba ukuti mu mwana wakwe e mwatuntwike Mesia. Elenganyeni ifyo akomfwa ilyo akeshiba ukuti ifyo acitile balifilembele mwi buuku lya mu Baibolo ilyainikwa ishina lyakwe!—Ruti 4:13; Mat. 1:5, 16.

10. Mulandu nshi uo Yehova ashaumina kumo mu mitekele yakwe?

¹⁰ Yehova tacusha abantu kabili taumina kumo. Kanshi imitekele yakwe ilalenga abantu baba no buntungwa ne nsansa. (2 Kor. 3:17) Davidi atile: “Ubucindami na bukatebebe fyaba pa ntanshi yakwe [Lesa], amaka no kusekelela fyaba pa cifulo cakwe.” (1 Imila. 16:7, 27) Na Etani uwaimbile amalumbo, atile: “Balipaalwa abaishiba ukuwelesha kwa kusekelela. Mwe Yehova, mu lubuuto lwa cinso cenu e mo bendela. Mwi shina lyenu e mo basekelela akasuba konse na mu bulungami bwenu e mo basansabikilwa.”—Amalu. 89:15, 16.

11. Kuti twacita shani pa kuti tushininkishe sana ukuti imitekele ya kwa Yehova e mitekele iyawamisha?

¹¹ Nga tuletontonkanya pa busuma bwa kwa Yehova kuti twacilanapo ukushininkisha ukuti imitekele yakwe e yawamisha. Kuti twalaumfwa nga filya uwaimbile amalumbo aumfwile uwatile: “Ukuba mu mansa shenu ubushiku bumo kwawama ukucila ukwikala inshiku 1,000 kumbi!” (Amalu. 84:10) Apo Yehova ni Kalenga kabili Kabumba uwaba no kutemwa, alishiba ifyo tukabila pa kuti tube ne nsansa sana, kabili alatupeela ifyo tukabila. Fyonse ifyo afwaya ukuti tulecita fyabelako ku busuma bwesu kabili filalenga twaba sana ne nsansa, nangu ca kuti tulingile ukuipeelesha pa kuti tulecita ifyo afwaya.—Belengeni Esaya 48:17.

12. Mulandu nshi uukalamba uwalenga tuletungilila imitekele ya kwa Yehova?

¹² Baibolo ilanda ukuti pa numa ya Myaka Ikana Limo iya kuteka kwa kwa Kristu, abantu bamo bakasalapo ukupondokela imitekele ya kwa Yehova. (Ukus. 20:7, 8) Finshi fikalenga bakapondokele imitekele yakwe? Satana Kaseebanya alalenga abantu baba no lunkumbwa lwa kucita ifyo imitima yabo ilefwaya kabili ifi fine e fyo akacita pa kulufya abantu nga bamukakula mu cifungo. Akalafwaisha ukulenga abantu bakasumine ukutila kuti baikala umuyayaya nangu tabaleumfwila Yehova. Ukwabula no kutwishika ubu bufi. Lelo bushe tukaleka Satana akatubepe? Nga twalitemwa Yehova kabili tulemubombela pa mulandu wa kuti musuma na pa mulandu wa kuti e walinga ukuba Kateka ku muulu na pano isonde, ninshi tatwakaleke akatubepe. Lyonse tukalafwaya ukuti Yehova uwalinga ukuteka aletuteka.

MULEBA ABA CISHINKA ILYO MULETUNGILILA IMITEKELE YA KWA LESA

13. Bushe tulanga shani ukuti tulatungilila imitekele ya kwa Lesa nga tulemupashanya?

¹³ Ukwabula no kutwishika tulingile ukulatungilila imitekele ya kwa Yehova no mutima wesu onse. Nga fintu tumwene, Yehova alikwata insambu sha kuteka kabili imitekele yakwe e yawamisha. Kuti twatungilila imitekele ya kwa Yehova nga twatwalilila ukuba aba cishinka kabili nga tulemubombela ne cishinka. Finshi fimbi ifyo twingacita pa kulanga ukuti tulatungilila imitekele yakwe? Tulingile ukulacita ifintu ukulingana ne fyo afwaya. Nga tulecita ifintu ukulingana ne fyo Yehova afwaya, tulanga ukuti twalitemwa imitekele yakwe kabili tulaitungilila.—Belengeni Abena Efese 5:1, 2.

14. Bushe baeluda ne mitwe ya ndupwa kuti balapashanya shani Yehova?

¹⁴ Mu Baibolo tusambililamo ukuti Yehova alaba no kutemwa ilyo alebomfya amaka yakwe. Kanshi imitwe ya ndupwa na baeluda abatemwa imitekele ya kwa Lesa tabalingile ukulafwaya ifyacilamo kwati nabo ni bakateka. Lelo balingile ukulapashanya Yehova. Ku ca kumwenako, Paulo alepashanya Lesa no Mwana wakwe. (1 Kor. 11:1) Taleumfwisha bambi insoni nelyo ukubapatikisha ukucita ifyo alefwaya. Lelo alebapapaata. (Rom. 12:1; Efes. 4:1; File. 8-10) Ifi e fyo Yehova afwaya baeluda ne mitwe ya ndupwa balecita. Kanshi ifi fine e fyo na bonse abatemwa kabili abatungilila imitekele yakwe balingile ukulacita.

15. Bushe kuti twalanga shani ukuti tulatungilila imitekele ya kwa Yehova?

¹⁵ Bushe tumona shani abo Lesa apeela amaka ya kutungulula? Nga tulekonka ifyo baletweba ninshi tuletungilila imitekele yakwe. Nangu ca kuti tatumfwikishe nelyo tatwishibe ico bapingwila fimo, tulingile ukutungilila abo Yehova apeela amaka ya kutungulula. Abantu ba muli cino calo tabakonka ubutungulushi, lelo Yehova afwaya ukuti tulekonka ubutungulushi pa kuti tuletungilila imitekele yakwe. (Efes. 5:22, 23; 6:1-3; Heb. 13:17) Nga tulekonka ubutungulushi ifintu filatuwamina pantu Lesa alitutemwa.

16. Bushe abatungilila imitekele ya kwa Lesa bacita shani pa kupingula pa fintu?

¹⁶ Na kabili kuti twalanga ukuti tulatungilila imitekele ya kwa Lesa mu fyo tupingulapo ukucita. Yehova tatupeela amafunde muli fyonse fye ifyo tucita. Lelo atweba fye ifyo atontonkanya pa fintu. Ku ca kumwenako, tatweba fyonse ifyo Abena Kristu balingile ukulakonka pa mifwalile. Lelo alitweba ukuti imifwalile ne misakwile ilingile ukuba iya mucinshi kabili iyalinga ku Bena Kristu. (1 Tim. 2:9, 10) Na kabili Yehova tafwaya tulepunwisha abantu nelyo ukubakalifya mu fyo tucita. (1 Kor. 10:31-33) Nga ca kuti tulekonka ifyo Yehova atweba muli fyonse ifyo tucita, tulanga ukuti twalitemwa kabili tulatungilila imitekele yakwe.

17, 18. Bushe abaupana kuti balanga shani ukuti balatungilila imitekele ya kwa Yehova?

¹⁷ Natulande pa fyo abaupana balingile ukucita pa kulanga ukuti balatungilila imitekele ya kwa Yehova. Finshi abaupana balingile ukucita nga bakwata amafya? Kuti bacita shani nga ca kuti ifyo baleenekela taficitike? Abaupana balingile ukulatontonkanya pa fyo Yehova alecita ku bena Israele. Aali kwati mulume wa luko lwa bena Israele. (Esa. 54:5; 62:4) Ala muli ici cupo ca mampalanya mwali amafya! Lelo Yehova tapwishishe bwangu icupo. Libili libili alebabelela uluse kabili ali uwa cishinka ku cipangano apangene nabo. (Belengeni Amalumbo 106:43-45.) Bushe ifi Yehova ali uwa cishinka tafilenga twamutemenwako?

¹⁸ Abaupana abatemwa inshila sha kwa Yehova nabo balamupashanya. Tabapwisha icupo pa milandu iyo Amalembo yashalandapo. Balishiba ukuti Yehova alibalundanya kabili afwaya ukuti ‘balelambatila’ ku bena mwabo. Umulandu fye umo uo Amalembo yalandapo ukuti e wingalenga abaupana bapwisha icupo, ni lintu umo mu cupo acita ubucende. (Mat. 19:5, 6, 9) Kanshi abaupana nga baleesha na maka ukupwisha amafya kabili balebombesha ukuba ne nsansa mu cupo ninshi baletungilila imitekele ya kwa Yehova.

19. Finshi tulingile ukucita nga ca kuti twalufyanya?

¹⁹ Apo tatwapwililika, inshita shimo kuti twacita ifingalenga Yehova aumfwa ububi. Yehova alishiba ukuti tulalufyanya, e co atupeelela ne cilubula ca kwa Kristu. Kanshi nga twalufyanya muli fimo tulingile ukulomba Yehova ukuti atubelele uluse. (1 Yoh. 2:1, 2) Mu cifulo ca kulaumfwa fye ububi pa fyabipa ifyo twacitile, tulingile ukusambililako ku filubo twacitile. Nga twapalama kuli Yehova, akalatwelela kabili akalatwafwa ukuleka ukumfwa ububi pa filubo twacitile kabili akalatwafwa no kwishiba ifya kucita nga twakwata ubwafya bumo bwine.—Amalu. 103:3.

20. Mulandu nshi uo tulingile ukutungilila imitekele ya kwa Yehova pali nomba?

²⁰ Mu calo cipya bonse tukalatekwa na Yehova kabili tukasambilila inshila shakwe ishalungama. (Esa. 11:9) Lelo tulasambilishiwa ifingi pali ino nshita. Kabili nomba line bonse bakeshiba uwalinga ukuteka ku muulu na pano isonde. Kanshi ino e nshita tulingile ukulatungilila imitekele ya kwa Lesa ukupitila mu kuba aba cishinka, mu ku mubombela, e lyo na mu kulamupashanya muli fyonse ifyo tucita.