Ukushishimisha—Kulenga Tuleshipikisha Kabili Tulesubila Ukuti Ifintu Fikawama ku Ntanshi

APO ifintu filebipilako fye muno “nshiku sha kulekelesha,” abantu ba kwa Yehova balingile ukulashishimisha nga nshi nelyo bafwile ukuba abatekanya sana. (2 Tim. 3:1-5) Twikala mu calo umwaba abantu abaitemwa, abashifwaya ifipangano, kabili abashailama. Ilingi line ababa ne yi mibele tabatekanya. E ico Umwina Kristu onse alingile ukuyipusha ati: ‘Bushe ifi abantu ba muli cino calo bashatekanya fyalenga na ine naleka ukuba uwatekanya? Bushe calola mwi ukuba uwatekanya? Kuti nacita shani pa kuti ningatwalilila ukuba uwatekanya?’

UMO UKUSHISHIMISHA KWALOLA

Ukulingana na Baibolo, ukushishimisha nelyo ukutekanya kwalicila pa kushipikisha fye ubwafya. Umuntu uwatekanya alashipikisha kabili asubila ukuti ifintu fikawama ku ntanshi. Tabika fye amano ku fyo aleumfwa lelo alabika na mano ku fyo uumukalifye aleumfwa. Kanshi umuntu uwatekanya nga bamukalifya, taleka ukusubila ukuti na kabili bakatendeka ukumfwana no umukalifye. E mulandu wine Baibolo yabalilapo ukulumbula “ukushishimisha” nelyo ukutekanya pa mibele iyo umuntu uwaba no kutemwa akwata.a (1 Kor. 13:4) Na kabili “ukushishimisha” kwaba pa “fisabo fya mupashi” ifyo Icebo ca kwa Lesa calandapo. (Gal. 5:22, 23) Nomba finshi tufwile ukucita pa kuti tuleshishimisha?

IFYO TUFWILE UKUCITA PA KUTI TULESHISHIMISHA

Pa kuti tuleshishimisha, tulingile ukulomba Yehova ukuti atupeele umupashi wakwe uo apeela abamucetekela kabili abashintilila pali ena. (Luka 11:13) Nangu ca kuti umupashi wa kwa Lesa wa maka, na ifwe tufwile ukulacita ifintu ukulingana ne fyo tulelomba. (Amalu. 86:10, 11) E kutila cila bushiku tufwile ukulaibikilishako ukuba abatekanya pa kuti lyonse tuleba ne yi mibele. Na lyo line kuli na fimbi ifyo tulingile ukucita pa kuti twingatwalilila ukuba batekanya. Finshi ifyo fine?

Kuti twaba abatekanya nga ca kuti twaishiba bwino ifyo Yesu ali uwatekanya e lyo no kulamupashanya. Ilyo umutumwa Paulo alandile pa “buntu bupya,” umwaba no kushishimisha atukoseleshe ati, “Lekeni umutende wa kwa Kristu uteke mu mitima yenu.” (Kol. 3:10, 12, 15) Nga natucetekela ukuti Lesa akawamya ifintu pa nshita yakwe umwine nga filya Yesu acetekele, uyu umutende ‘ukalateka’ mu mitima yesu. Nga tulepashanya Yesu, tatwakaleke ukuba abatekanya nangu ifintu fibipe shani.—Yoh. 14:27; 16:33.

Nangu ca kuti tulafwaisha ukumona icalo cipya ica kwa Lesa, tulaba abatekanya nga tuletontonkanya sana pa fyo Yehova atutekanishisha. Amalembo yatweba ukuti: “Yehova tashingashinga ku kufikilisha ubulayo bwakwe, filya bamo batila alashingashinga, lelo alamutekanishisha pantu tafwaya umuntu nangu umo ukonaika lelo afwaya ukuti bonse bakalapile.” (2 Pet. 3:9) Nga tuletontonkanya sana pa fyo Yehova atutekanishisha, na ifwe tulafwaya ukulatekanishisha abanensu. (Rom. 2:4) Ni lilali tulingile ukulashishimisha?

ILYO TUFWILE UKULASHISHIMISHA

Ificitika cila bushiku kuti fyalenga twafilwa ukushishimisha nelyo ukuba abatekanya. Ku ca kumwenako, nga ca kuti mulefwaya ukulanda ificindeme, mufwile ukutekanya pa kuti tamucilime abalelanda. (Yako. 1:19) Na kabili mulingile ukuba abatekanya nga muli pamo na ba bwananyina abacita ifimukalifya. Mu cifulo ca kukalipa sana mufwile ukutontonkanya pa fyo Yehova na Yesu batutekanishisha nga ca kuti tulecita ifyatwafya ukuleka. Tababika amano ku filubo ifinono ifyo tucita. Lelo babika amano ku mibele yesu iisuma kabili balatutekanishisha ilyo tuleibikilishako ukuwamya imibele yesu.—1 Tim. 1:16; 1 Pet. 3:12.

Na cimbi icingalenga twaleka ukuba abatekanya ni lintu umo atweba ukuti ifyo twalandile nelyo ifyo twacitile tafyaweme. Ilingi line tubalilapo ukukalipa no kuipokolola. Lelo ifi te fyo Icebo ca kwa Lesa citweba. Citila: “Uwatekanya awama ukucila uwa matutumuko. Wilakalipa bwangu, pantu ubukali bwaba mu fifuba fya bawelewele.” (Luk. Mil. 7:8, 9) Kanshi nga batubepesha, tulingile ukutekanya ilyo tushilalanda nangu cimo. Ifi fine e fyo Yesu acitile ilyo abantu bamo bamubepeshe.—Mat. 11:19.

Abafyashi maka maka balingile ukutekanya nga balefwaya ukulungika abana babo. Natulande pa fyo cali kuli ba Mattias ababombela pa Bethel ya ku Scandinavia. Ilyo ba Mattias baali umusepela balebacusha sana pa sukulu pa mulandu ne fyo basuminemo. Pa kubala abafyashi babo tabaishibe ukuti balebacusha. Lyena pa numa balimwene ukuti umwana wabo alitendeke ukutwishika nampo nga ifyo alesambilila e cine nelyo iyo. Ba Gillis bawishi ba ba Mattias batile, “Twalingile ukutekanishisha sana umwana wesu. Limo kuti akwipusha ati: Bushe Lesa nani? Bushe cine cine Baibolo Cebo ca kwa Lesa? Twaishiba shani ukuti ifi e fyo Lesa afwaya tulecita?” Na kabili aleipusha bawishi ati: “Cinshi umuntu engalampingwila pa mulandu fye wa kuti nshasumina mu fyo mwasuminamo?”

Ba Gillis batile: “Limo umwana wesu aleipusha amepusho ninshi nafulwa, nomba talefulilwa fwe bafyashi bakwe, lelo icalelenga alefulwa cine pantu alemona kwati e calengele balemucusha.” Bushe ba Gillis bacitile shani pa kuti ubu bwafya bupwe? Batile: “Ine no mwana wandi twalelanshanya pa nshita iikalamba. Ilingi line nalekutika kabili limo limo nalemwipusha amepusho pa kuti njishibe ifyo aleumfwa ne fyo alemona ifintu. Limo nalemulondolwela fimo no kumweba ukuti atontonkanyepo pa bushiku bumo nelyo ukucilapo ilyo tushilalanshanyapo na kabili. Inshita shimo nalemweba nati ampeeleko inshiku ishinono pa kuti ntontonkanye pa fyo alanda. Ifi twalelanshanya lyonse fyalengele Mattias aleya aleumfwikisha icine pa cilubula, pa nsambu Lesa akwata isha kuteka, na pa fyo Yehova aba no kutemwa. Kwena palipitile inshita kabili calyafishe, lelo asukile atemwa Yehova. Ine no mwina mwandi twaliba ne nsansa pa fyo twabombeshe ukwafwa umwana wesu ukwishiba icine ilyo ali umusepela.”

Ba Gillis na bena mwabo balitekanishishe umwana wabo ilyo balemusambilisha kabili balicetekele ukuti Yehova ali no kubafwa. Ba Gillis nga baibukisha ifyo cali batila: “Ilingi line naleeba Mattias ati icalelenga ine na banyina tulelomba sana Yehova ukuti amwafwe ukumfwikisha icine ni co twalimutemwa nga nshi.” Aba abafyashi baliba ne nsansa nga nshi pantu bali abatekanya!

Na kabili Abena Kristu ba cine balingile ukuba abatekanya ilyo balesakamana balupwa lwabo nelyo ifibusa abalwala pa nshita iikalamba. Natulande pa fyo cali kuli nkashi uo twalaita ati Ellen na o uwikala ku Scandinavia.

Imyaka 8 iyapitapo, stroko nelyo lupuma yalikete abena mwabo ba ba Ellen pa miku ibili ica kuti na bongobongo yalilekele ukubomba bwino. Ici calenga belaumfwila abantu uluse, belaba ne nsansa kabili belaumfwa ubulanda. Ifintu fyalyafya kuli ba Ellen. Batile: “Ifingafwa ukushipikisha kutekanya sana no kupepa lyonse. Ilembo natemwa sana ilinsansamusha lya Abena Filipi 4:13 ilitila: ‘Muli fyonse ndi na maka pantu kuli uulenkosha.’” Apo Yehova alapeela ba Ellen amaka kabili alabafwa, balashipikisha kabili balitekanya.—Amalu. 62:5, 6.

TULEPASHANYA YEHOVA UUSHISHIMISHA

Kwena takwaba uushishimisha nelyo uwatekanya nga Yehova. (2 Pet. 3:15) Mu Cebo ca kwa Lesa mwaliba amalyashi ayengi ayalanga ukuti alitekanya nga nshi. (Nehe. 9:30; Esa. 30:18) Ku ca kumwenako, bushe Yehova acitile shani ilyo Abrahamu alemwipusha pa fyo alefwaya ukonaula Sodomu? Yehova tacilime Abrahamu. Lelo alimutekanishishe kabili alekutika ifyo alemwipusha e lyo ne fyamusakamike. Lyena Yehova alilangile ukuti alekutika ilyo abwekeshepo ukulanda ifyasakamike Abrahamu no kumweba ukuti tali no konaula Sodomu nangu muli uyu musumba mwali no kusangwa fye abaume ba cishinka 10. (Ukute. 18:22-33) Ili lyashi lilanga ukuti Yehova alitekanya kabili tabubuka mu bukali!

Ukutekanya mibele iyacindama sana iya buntu bupya ubo Abena Kristu bonse balingile ukufwala. Nga tuleibikilishako ukuba abatekanya ninshi tulecindika Shifwe wa ku muulu uwatutemwa kabili uwatekanya. Lyena tukaba pa ‘bakapokelela ifyalaiwe pantu balitetekela kabili balitekenya.’—Heb. 6:10-12.