Bushe Kuti Mwayasuka ici Cipusho?

Mu nshita balelemba Baibolo, milimo nshi ababomfi abakalamba balebomba?

MU NSHITA balelemba Baibolo, umubomfi umukalamba uwa pa ng’anda e waleangalila imilimo ya pa ng’anda ya kwa shikulu wakwe, nelyo e walelolekesha pa fipe fyakwe. Ishiwi lya ciHebere ne lya ciGriki ilyo bapilibula ukuti “umubomfi umukalamba” limo lipilibula ukuti kangalila nelyo umubomfi umukalamba uwa pa ng’anda.

Ilyo Yosefe mwana Yakobo ali umusha mu Egupti aishileba umubomfi umukalamba mu ng’anda ya kwa shikulu wakwe. Na kuba, shikulu wakwe umwina Egupti ‘alekele conse ico akwete caba mu minwe ya kwa Yosefe.’ (Ukute. 39:2-6) Lyena ilyo Yosefe aishileba kateka wa cibili uwa maka mu Egupti, alisalile uwa kuba umubomfi umukalamba uwa mu ng’anda yakwe.—Ukute. 44:4.

Ilyo Yesu ali pano isonde, abalelima amabala ayakalamba balekwatila amabala ukutali ne misumba baleikalamo. Kanshi balesala umubomfi umukalamba uwaleangalila imilimo na babomfi bambi abalebomba mu mabala.

Bushe uo balesonta ukuba umubomfi umukalamba alingile ukuba shani? Columella kalemba umwina Roma uwaliko mu nshita ya batumwa alandile ukuti umusha uo balesonta ukuba umubomfi umukalamba alingile ukuba “muntu uwaishibishe” ubulimi. Kabili atile alingile ukuba “muntu uwingashininkisha ukuti ababomfi bonse balebomba imilimo babapeela kabili talingile ukuba umunkalwe.” Kabili atile “icacindamishe ca kuti talingile ukulamona kwati alishibe imilimo yonse kabili alingile ukulaitemenwa ukusambilila na fimbi.”

Icebo ca kwa Lesa calibomfya amashiwi bapilibula ukuti umubomfi umukalamba pa kulangilila ificitika mu cilonganino ca Bena Kristu. Ku ca kumwenako, umutumwa Petro akoseleshe Abena Kristu ukuti apo bali ‘babomfi abasuma abo Lesa alangile icikuuku,’ balingile ukulabomfya ‘ubupe Lesa abapeele ku kubombela abanabo.’—1 Pet. 4:10.

Yesu na o alilandile pa mubomfi mukalamba mu cilangililo caba pali Luka 16:1-8. Na kabili ilyo Yesu alelanda pa fyali no kulenga abasambi bakwe beshibe ukuti natendeka ukuteka abalaile ukuti ali no kusonta “umusha wa cishinka kabili uwashilimuka,” nelyo “kangalila wa cishinka.” Umulimo uukalamba uo uyu kangalila ali no kulabomba, kupekanishisha abasambi ba kwa Kristu ifya kulya fya ku mupashi muli shino nshiku sha kulekelesha. (Mat. 24:45-47; Luka 12:42) Tulatasha nga nshi ifi twaba pa bantu abapokelela impapulo ishilenga icitetekelo cilekosa isho kangalila wa cishinka apekanya kabili isho asabankanya mwi sonde lyonse.