Umukululo wa Fipusho

◼ Mulandu nshi catashiwilwa ukuti bakasabankanya babe mu cilonganino icibombela mu cifulo bekalamo?

Caliba icacindama ukucita ifintu mu nshila ya muyano kabili iya teokrasi. Umutumwa Paulo alembele ukuti: “Pantu Lesa te wa cimfulumfulu, lelo wa muyano . . . Fyonse ficitwe busaka busaka kabili mu kukonkana.”—1 Kor. 14:33, 40.

Ilintu napamo kuti kwaba ifingalenga ici ukukanacitika pa mulandu wa mafya ya myendele, imibombele ya ncito ya ku mubili, nelyo ukukabila kwa kwafwilisha mu bwangalishi, ilingi line caliwamisha ukusangwa ku cilonganino cakwata icifulo ca kubombelamo ico twikalamo. Ici cilenga umulimo wa mwi bala ukuba uwayanguka ukubomba, kabili te kuti tuleenda ukuya apatali pa kuti twingabomba ne bumba ilyabela ku nse ya cifulo twikalamo. Cilatwangukila ukubomba na bambi mu cilonganino cesu no kutungulula abapya abalesekelela ku kulongana uko bengafika bwangu. Kabili tulapalamina nga nshi kuli bamunyina na bankashi bambi ababa mu ncende yesu abo bengatwaafwa lintu kwabako ukubulisha.

Bakasabankanya bamo ababa mu filonganino fya ciNgeleshi bekala mu fifulo fya kubombelamo ifya filonganino fya ndimi sha cikaya. Nga ca kuti takuli amalekano muli ayo mayanda pa mulandu wa kuti abalume baleya ku ciNgeleshi na bakashi ku cilonganino ca lulimi lwa cikaya, tabafwile ukusela. Nangu cibe fyo, abo bakasabankanya balingile ukulalongana mu lulimi ulo basalapo pa Ŋanda ya Bufumu iyabela mupepi no ku bekala. Amalekano ayali yonse mu ba mu ŋanda ya Bwina Kristu kuti yapusana ne lembo lya 1 Abena Korinti 14:33 ililoshiweko pa muulu.

Icilonganino icakwata fye eluda umo kuti caipusha ukwaafwa ukufuma ku cilonganino cabela lwa mupepi. Eluda uletontonkanya pa kusela ukuya mu kwaafwa alingile ukulanguluka fintu ici cingapilibula ku mwine lwa ku mupashi na lwa ku mubili na fintu cingambukila amabuseko ya lupwa lwakwe. Ukukuuka kwa musango yu kukabombwapo na kangalila wa muputule na baeluda abakatuma imitubululo yabo ku Sosaite pa lwa kwa munyina, ukwipusha ukuti asontwe ukubombela mu cilonganino cabo pamo nga eluda, ukulondolola ifishingulwikeko no kulumbula ukuti baeluda mu cilonganino cakwe ico alefumamo nabasuminisha ukuti akuuke. Lintu ukutubulula kwasuminishiwa, eluda kuti abomba mu cilonganino cipya kabili ishina lyakwe likafuutwa ukufuma pa mutande wa baeluda uwa cilonganino cakwe ica kale.

Pa kubomba mu kunakila mu mitantikile yacitwa, tulanga ukuti tulebika amabuseko ya Bufumu intanshi. (Luka 16:10) Lintu icilonganino cipya capangwa nelyo Amasambililo ya Citabo aya pa Cilonganino yatantikwa cipya cipya, nakalimo kuti twafwaya ukutwalilila ukuba ne fibusa fyesu fimo fimo. Lelo pa kusumina ukutantika kupya, kuti twakwata ifibusa fipya no kukushako ukubishanya kwesu ukwa teokrasi. Na kabili, caliba icayanguka kuli baeluda ukucema umukuni no kuwamyako bumupashi bwa cilonganino lintu bakasabankanya baikala mu cifulo cibombelamo icilonganino babishanya na co.