Ikatisha Ukulumbulula kwa pa Cintubwingi Ukwe Subilo Lyobe Ukwabula Ukupungushima
1 Isambililo lya Ulupungu lwa kwa Kalinda e nshila ikalamba iyo abantu ba kwa Lesa ilelo bapayanishiwilwamo “ifya kulya [fya ku mupashi] mu nshita iyene.” (Mat. 24:45) Tusangwa kuli uku kulongana kwakatama mu kuba na mabuyo yakalamba yabili—ku kukuulililwa lwa ku mupashi no kucita ukulumbulula kwa pa cintubwingi ukwe subilo lyesu kuli bambi.—Heb. 10:23-25.
2 Ukuinonsha fwe Bene: Muno Zambia, cili ca bulanda ukwishiba ukuti mu filonganino ifyafulilako maperesenti fye ikumi aya abo abalesangwa kuli uku kulongana e bakwata kope wa pa lwabo uwa Ulupungu lwa kwa Kalinda kabili mupepi ne mpendwa yalinganako e bakana mu kwasukapo. Na kabili calipimwa ukuti amaperesenti yane aya basangilweko e bapekanishisha isambililo libela. Ifya kulya fya ku mupashi ifyakosa ifipeelwa mwi Sambililo lya Ulupungu lwa kwa Kalinda te kuti fyumfwikishiwe mu kufikapo mu kati ka kulongana kwine. Ulekabila ukubiika inshita pa mbali ku kusambilila ifyebo libela.
3 Lintu ulepekanishisha isambililo, kuti pambi wacisanga ica kwaafwa intanshi ukubelenga no kutontonkanya pa lwa fipusho mu mukululo uuba mupepi na ku mpela ya cipande. Ifi kuti fyakwaafwa ukutontomesha ukusakamana kobe pa fishinka fikalamba ifili no kulangulukwapo mwi sambililo.
4 Mu kati ke sambililo kutika mu kusakamanishisha ku filesoswa. Peepeka matwi ku kulandapo kwa kwiswila ukwa kwa katungulula; ifi fyebo fitupekanishisha kwi sambililo. Kuti pambi aimya ifipusho fitatu nelyo fine ifili no kwasukwa, nelyo kuti pambi apituluka mu fishinka fikalamba ukufuma mwi sambililo lya mulungu wafumako nga ca kuti ilya uno mulungu lili kutwalilila kwa kulanshanya kumo kwine. Nga ca kuti kuliko ukuteuluka mu kumfwikisha kwesu ukwa busesemo bwa Baibolo nelyo icishinte ca mu Malembo, akaleta ici ku kusakamana kwesu. Kwena, ukulandapo kwa kwa katungulula kufwile ukuba ukwipi, apantu imifwaile imo iye sambililo ili kupeela icilonganino ishuko lya mu nshita ilya kuilumbulwila isubilo lyabo. Kutika mu kusakamanishisha ilyo bambi baleyasuka pa fintu basambilile; ici kuti cayafwa ukukosha icitetekelo cobe.
5 Bilisha Isubilo Lyobe: Bushe lyonse ulasukapo mu kati ke sambililo? Ifyasuko ifipi, ifya kulungatika e fisuma. (Linganyako Luka 21:1-4.) Icasuko icipi ica kufuma ku mutima cilatashiwa kuli bonse. Ilingi line icasuko ca kubalilapo ku cipusho cilingile ukuba icipi kabili ica kulungatika. Ici cisuminisha bambi ukuletako amalembo nelyo ukwalwila ukusakamana ku cishinka ca kulonsha muli paragrafu. Muli iyi nshila abengi kuti bacita ukulumbulula kwa pa cintubwingi ukwe subilo lyabo. Ukulandapo kulingile lyonse ukuba ukusuma kabili ukwa kukuulilila.
6 Nga ca kuti e lintu fye utendeke ukusangwa kwi sambililo nelyo nga ca kuti uleumfwa umwenso ukwasukapo, kuti pambi wafwaya ukwipusha katungulula ukukwaafwa. Mulombe ukuba uwapempwila lintu walaimya ukuboko pa kulanshanya imo iya maparagrafu. Napamo kuti waitemenwa ukubelenga ilembo liloshiweko no kucita ukulandapo kunono pa bupilibulo bwa liko. Kuti pambi walemba ifyebo finono ku mbali ye bula ku kukwaafwa ukwibukisha ifyo ulefwaya ukusosa lintu uleyasuka. Nga ca kuti uli wacaice, ibukisha ukuti ukwasukapo kobe kulapokelelwa kabili kulatashiwa.—Mat. 21:16.
7 Caliba icakatama ukuti tulumbulule icitetekelo cesu, kabili Isambililo lya Ulupungu lwa kwa Kalinda lipayanya ishuko lya mu nshita ilishaiwamina ilya kucite fyo. Nga ca kuti uleshimunuka ukwasukapo, cita pantu wingapesha ku kucimfya iyo mpika, kabili ipamfye ukwasukapo nangu fye umuku umo. Ukaba nusangwilako ku kulongana, kabili ukayumfwa bwino pa lwa cene. E co mulandu nshi te kupanga ukwasukapo nangu fye umuku umo pe Sambililo lya Ulupungu lwa kwa Kalinda ililine ilileisa?—Amapi. 15:23.