Abacaice Balakabila ica Kumwenako Cisuma
1 Tulasekelela ukukwata impendwa ilekula iya bacaice ‘abaletashe shina lya kwa Yehova.’ (Amalu. 148:12, 13) Ubwingi bwabo bacili baice mu myaka. Ukulunduluka kwabo kupiminwa apakalamba ku kukansha ne ca kumwenako cipayanishiwa na bafyashi babo na bakalamba bambi mu cilonganino. Icishili na kusuulwako, nangu cibe fyo, caba kusonga ukucitwa na bacaice bambi, ukucilisha abapungwe bakulako na bakalambako. Nga ca kuti uli muli uyu mushinku, uku ukulandapo kuti pambi kwakunonsha.
2 Abacaice mu myaka yabo iya pa ntanshi ya bupungwe bakongamina ku kupashanya abapungwe bakulako. Bakwata ukufwaisha kwa cifyalilwa ukwa kuba nga bakubishanya na bo abapalamisha bantu bakumbwa. Balolesha ku misepela imbi iikalambako kabili iyo imoneka ukukwata ubwishibilo kabili iyalunduluka ukucilapo. Pamo nge ca kufumamo, kuti pambi bapashanya imilandile yobe ne myendele capamo no kutesekesha kobe ukwa fyakatamikwa fya ku mupashi no kwakanamo kobe mu mibombele ya cilonganino.
3 Pamo ngo mupungwe umukalambako, walikwata ishuko capamo ne cishingamo cafina. Ino ine nshita, ica kumwenako cobe mu kupalishako cilesonga ifibusa fyobe ifyacaice. Ipushe we mwine auti, ‘Musango nshi uwa kusonga mbika pa bacaice? Bushe ndi wa mushiye, uusengauka ubuwelewele no “lunkumbwa lwa bulumendo” ulwalubana? Bushe ndalangisha icumfwila no mucinshi ukulola ku bafyashi bandi, baeluda, na bantu bambi abakalamba?’ (2 Tim. 2:22; Kol. 3:20) Cintu usosa no kucita kuti pambi caba ca kusangwilako cikalamba mu kulunduluka kwa ku mupashi ukwa bacaice bambi abalemonako incitilo shobe.
4 Ukushimikila ubukombe bwa Bufumu e mulimo ukalamba uwa cilonganino. Ukwakanamo kobe ukwa kuitemenwa kabili ukwa lyonse kuti kwakoselesha ifibusa fyobe ukuba abacilapo kucincila. Nga ca kuti uli na maka ya kwingila mu mulimo wa bupainiya, ifibusa fyobe bakakuntwa mu nshila yapalako. Ukwasukapo pa kulongana no kuitemenwa kobe ukwaafwa mu kubombako utumilimo twakabilwa pa Ŋanda ya Bufumu kuti pambi na ko kwaimikako ica kumwenako cisuma.
5 Nelyo cingati Timote taali na kabili mu myaka yakwe iya bupungwe lintu Paulo amupeele ukupanda amano kwakonkapo, imwe mwe bapungwe kuti mwabomfya kwene: “Ube ica kumwenapo mu misosele, mu mibele, mu kutemwa, mu kutetekela, mu kusanguluka.” (1 Tim. 4:12) Ukwakanamo kobe ukwacincimuka kabili ukwa mweo onse mu mulimo wa kwa Yehova kuti kwakunta aba kubishanya na bo na bacaice baletambako mu nshila yashininkishiwa, ukubaafwa ukucito kulunduluka ukulola ku kuba abakalamba lwa ku mupashi. (Efes. 4:13) Abapungwe abali lubali lwa ndupwa isho shitendeke fye ukusambilila kuti pambi bacebushiwa ku cine ukupitila mu cintu bamona muli iwe.
6 Ne cacilanapo kucindama, umukoosha obe mu kulangisha imibele ya bukapepa ubelebesha umucinshi kuli Yehova no kuteyanya kwakwe. (Amapi. 27:11) Abaletambako abafumaluka bakasunguka pa kupusanako kwamonekesha pa kati kobe na bacaice ba mu calo. E co walikwata ishuko lya mu nshita ilyaibela ku kwaafwa abacaice ilintu ulecito kusangwilako kwakatama kwi lumbo lya kwa Yehova.—Amalu. 71:17.