Ibungano Lya Citungu Lyabilisha Ubwite Bwa Kukumbamo!—Lumbanyeni Yehova mu Buseko Akasuba na Kasuba!
1 “[Ipenga] nga lyalila icililelile, n’ ani engaipekanisho kuya ku bulwi?” e fyaipwishe umutumwa Paulo. (1 Kor. 14:8) Bushe ubwite ubwabilishiwe pe Bungano lya Citungu ilya “Bakalumbanya ba Buseko” bwali ubwapongomoka kabili ubwaumfwika? Ee, mu cine cine. Ubukombe bwa kucincimusha bwali bwa kuti ‘Lumbanyeni Yehova mu buseko kabili cila bushiku’! Bushe umutima obe walikumbilwemo kuli ubu bwite bwa kucincisha ukucitako cimo? Programu we bungano aiswilemo imilandu ine ine iya kulumbanishisha Imfumu ya ciyayaya, Yehova, lyonse.—Ilu. 35:27, 28.
2 Imyulu ya kutiinya ibilisho bukata bwa kwa Yehova ‘akasuba na kasuba.’ (Ilu. 19:1-3) Nga ca kuti ububumbo bushilanda, ubushaba na mweo lyonse bulalumbanya Yehova, bushe ifwe fwe bantunse ba mucetekanya tatulingile ukuyumfwa abaseshiwa ukusansula amashiwi yesu mu kumulumbanya inshita shonse pa mibele yakwe iishingalinganishiwako na pa fintu apwishishisha? Nani wawaminwa ukulumbanya kwesu ukwa buseko ukucila Kabumba wesu uwakulisha?—Ilu. 145:3, 7.
3 Akasuba na Kasuba: Kemba wa malumbo uwapuutwamo alembele ukuti: “Bileni ukupususha kwakwe akasuba na ’kasuba. Pantu Yehova mukulu kabili awaminwo kutashiwa apakalamba.” (Ilu. 96:2, 4) Bushe ici cilebomba fye kuli bapainiya? Iyo! Bushe ici cilepilibula ukuti ifwe bonse tulingile ukwebako bambi pa lwa kwa Yehova inshita iili yonse twashukila na konse kuntu tuli, nangu fye pa nshiku isho tatuli mu butumikishi bwa ku ŋanda ne ŋanda? Ee! Ukukabila kwa kulumbanya Yehova cila bushiku no kwebako bambi pa lwa nshila yakwe iya kupusushishamo kuli ukwapamfya. Abantu bafwile ukwishiba ukuti Yehova ni Mfumu ya Ciyayaya no kuti Alipeela Umwana Wakwe, Yesu Kristu ukuteka icalo. Ukutemwa Yehova na bantu kukatulenga ukutwalilila ukulanda pa lwa ubu bukombe na pa lwa kupayanya kwakwe ukwe pusukilo ukuli konse uko abantu bengasangwa.—Ilu. 71:15.
4 Cila bushiku mu butumikishi bwakwe ubwa pe sonde, Yesu Kristu aimike ica kumwenako cawamisha nga kalumbanya wa kwa Yehova uwabulo kulamba. Asosele ukuti: “Ndemutootela, mwe Tata, Shikulu wa mu muulu na pa nshi.” (Mat. 11:25) Mu kumfwana na mashiwi yakwe, ukuli konse kuntu Yesu aali, alumbenye Yehova pa cintubwingi. Kabili ukuli konse uko amabumba yalongene—nampo nga ni mu masunagoge, pe tempele mu Yerusalemu, pa muulu wa mpili, nelyo mu lulamba lwa bemba—alumbenye Yehova. Nga ca kuti twakonka mu nkasa sha kwa Yesu mu kupalamisha pa kutwalilila ukutonda Yehova mu mibombele ya pa cintubwingi iya cila bushiku kabili iyabulo kuleka, tukaba ne fya kufumamo ifya buseko, ifya nsansa.
5 Ukwankula ku Bwite: Bushe ukankula ku bwite bwa kulumbanya Yehova pa cintubwingi cila bushiku? Ibukisha, umushinku tawaba cipindami. Ilumbo 148:12 lilaalika abalumendo, abakashana, abakote, na baice ukulumba Yehova. Mwe bacaice, bushe mukalumbanya Yehova ku bo musambilila na bo na bakafundisha muli uno mwaka wa mulimo uupya? Mwe bakalamba, bushe abo mubomba na bo incito baleumfwako pa lwa kwa Yehova ne mifwaile yakwe, lintu kwabako akashita kalinga aka kulanshanya capamo? Ifwe bonse tulingile ukusangula ukulanda pa lwa kwa Yehova ukuba ulubali lwesu ulwa bumi nga fintu fye ukupeema no kulya fyaba. Nangu cingati abantu bashayangwako tabapeepeka ku co tusosa, kwalibako Uupeepeka, kabili uyu akatulambula.—Mal. 3:16.
6 Ilyo impela ya ino micitile ilepalamina, ubwite bulebilishiwa ukufika ku mpela sha pano nse ubwa kuti: “Lumbeni Jah, imwe mwe bantu!” (Ilu. 106:1, NW) Shi ukwaula kwesu ukwa kulumba kukulileko ubushiku bumo na bumo ubwapita ku kuleka bonse beshibe ukuti Uwe shina lya kuti Yehova e Wapulamo pano isonde ponse.—Ilu. 83:18.