Ukusokolola—Amakii ku Nsansa sha Cine Cine
1 Amashiwi ya mutumwa Yohane pa Ukusokolola 1:3 yaba ni mbila nsuma kuli ifwe pa mulandu wa kuti atweba ifya kusanga insansa. Alembele ukuti: “[Wa nsansa, NW] uubelenga na ’bomfwa ifyebo fya kusesema uku, no kubake fyalembwamo.” Icitabo ca Ukusokolola—Akalume ka Kuko Kakalamba Nakapalama! calyaafwa abengi ukusanga insansa ishingi. Twalikwata imilandu isuma iya kushalikila cene kuli bambi.
2 Napamo kuti watendeka ukulanshanya ukubomfya ici cipusho:
◼ “Bushe muletontonkanya ukuti ibuuku lya Baibolo ilya Ukusokolola lyalembeelwe ukuti lingomfwika, nelyo bushe lyali no kutwalilila ukuba inkama lyonse? [Leka asuke.] Ifyo mwalanda e fyo na bengi balanda. Moneni cintu Baibolo isosa pa Ukusokolola 1:3. [Belenga.] E co Ukusokolola kuti kwaumfwika, kabili ifyebo fyabamo kuti fyatuletela insansa. Ni shani fintu ici cingacitika?” Pitulukeni mu fyebo fili mu paragrafu 2 pe bula 6, kabili lyene sosa auti: “Ici citabo cilondolola icikomo cimo cimo ice buuku lya Ukusokolola. Cili icalinga nga nshi ukucibelenga mu nshita yenu. Kuti natemwa ukumushiila cino.”
3 Apantu abengi bali abasakamikwa pa lwa fintu bengasanga ifyo bakabila, ici pambi kuti caimya ubuseko:
◼ “Cinshi muletontonkanya tukabila ukucishapo? [Leka asuke.] Kwalibako abantu abengi abashininwa ukuti tukabila ifikwatwa ifingi.” Alukila kwi bula 73 kabili pitulukeni mu fishinka fikalamba mu mukululo uukwete umutwe wa kuti “Ukutemwe Fyuma Kwalolenkana na Mano.” Twalilila ukusoso kuti: “Ici cilelangilila ukuti abantu balekomaila sana pa fikwatwa; tulingile ukwangwa apakalamba ifyo tukabila lwa ku mupashi. Ukwishiba kwa cine e ko tukabila mu cituntulu. Lelo ukwishiba cinshi?” Belenga Yohane 17:3, kabili londolola fintu ukwishiba Lesa kwingatungulula ku mweo wa muyayaya. Tambika icitabo no kumweba ifyo kuti wabwela no kumulangilila fintu icitabo cisokolola ifyebo fyawamisha pa lwa mifwaile ya kwa Lesa iya kwikusha fyonse ifyo umutundu wa muntu ukabila.
4 Apantu abengi balisakamikwa pa lwa bucushi mu calo, kuti pambi waeshako ici:
◼ “Uuli onse untu ndelandako ali uwasakamikwa pa lwa nshita ya ku ntanshi. Intungulushi sha calo shimo shitontonkanya ukuti tuli pa nembenembe ya nkulo ipya iya mutende. Mutontonkanyapo shani pali co? [Leka asuke.] Te mulandu no kubombesha konse ukwa bantu, ulukaakala no bucushi fitwalilila ukwingilishiwako mu kusaalala kwa calo. Baibolo isokolola inshila fye imo iya kucimfishamo aya mafya. [Belenga 2 Petro 3:13. Alukila ku cikope cili pe bula 302, kabili londolola fintu bufumu bwa mu muulu ubwa kwa Lesa bukaleta umutende ubelelela no mutelelwe pali lino isonde.] Ici citabo cikamwaafwa ukwishiba fintu mwingaba ulubali lwa ubu bwikashi bupya ubwa bantu abo bakaipakisha ubumi bwa muyayaya mu kuteka kwa Bufumu bwa kwa Lesa.”
5 Nga ca kuti wasanga umuntu uupamfiwe kabili wapatikishiwa ukwipifya, kuti wasosa ifi:
◼ “Apantu muli fye na kashita akanono, kuti natemwa ukumushiila uyu trakiti [nelyo icipande ca muli magazini] uukwete umutwe uleti [sala trakiti walinga nelyo icipande.] Bushe Ici Calo Cikapusunsuka? [Alukila kwi bula 6 kabili belenga Ukusokolola 21:3, 4.] Ndemukoselesha ukuti mukabelenge uyu trakiti. Ilyo nkashokelako, kuti natemwa ukwishiba fintu muletontonkanya pa lwa yene.”
6 Kwena, te onse uukakutika kuli iyi mbila nsuma. Banono fye e bapeepekako amatwi. Bamo mu kuumalala balakaana ababomfi ba kwa Lesa abo babakoselesha ukunonkelamo mu menshi ya cine ayapeela ubumi. Nangu cibe fyo, mu kuba no bukose ukufuma kuli Yehova, tulatwalilila muli uyu mulimo. Twalishiba ukuti ilyo twaitemenwa ukulanda icine no kwaafwa abali bonse abengomfwa Yehova alatemunwa no kutupaala.—Amapi. 3:13.