Beni “Abacincilile Milimo Isuma” mu April!

¹ Muli shinde wa mwaka wapwile ubunte bushingalinganishiwako bwalipeelwe lintu amamilioni ya matrakiti ya Imbila ya Bufumu Na. 34 yaananishiwe mu kusaalala kwa calo. Bakasabankanya ba mu filonganino na bapainiya bonse mu kucincila baakene muli uyu mulimo wa kucincimusha. Bushe wali umo uwa bene? Nga ca kuti e fyo cali, ukwabulo kutwishika waliipakishe icine cine ukwakanamo muli ulya kampeni wakulisha. Pali nomba napamo ulelanguluka auti, ‘Mulimo nshi uusuma’ uuletupembelela uno mwaka?—Tito 2:14.

² Mu April na mu kubangilila kwa May, tukaba ne shuko lya kwananya magazini waibela uwa Awake! wa April 22, 1996, uukakwata umutwe wa kuti “When Wars Will Be No More,” (Lintu Kushakabeko Inkondo na Kabili). Apantu uyu mutwe uli no kucebusha abene mayanda abengi nga nshi, tukabombesha ukwananya uyu magazini mu kusaalala ukufika pantu twingapesha. Mu cilolwa ca bucindami bwa fyebo filimo, uyu magazini wa Loleni! wa ciNgeleshi alingile ukubomfiwa mu April na mu May, ukufikila bamagazini bonse bapwa.

³ Ubuyo Bwesu bwa Kuti Bakasabankanya Bonse Bakakanemo: Mu cine cine kuti caba ica kukoselesha nga ca kuti kasabankanya uuli onse muli cino calo engakanamo mu mulimo wa kushimikila mu April. Apantu ni nomba line fye twasefeshe Icibukisho ca mfwa ya kwa Kristu, mu kushininkisha kuti twafwaya ukulangisha ukutasha kwesu pa busuma bwa kwa Lesa ukupitila mu kutuula “ilambo lya malumbo” ilya kulungatika mu butumikishi bwa mwi bala.—Heb. 13:15.

⁴ Tulingile ukubombesha nga nshi ku kupimununa ukukabila ukwa cilundwa cimo na cimo ica cilonganino pa kuti bonse bengakanamo mu kucincila mu butumikishi mu April. (Rom. 15:1) Bakatungulula ba masambililo ya citabo balingile ukuba abaibukila mu kukumanina ulwa mibele ya baba mu mabumba yabo no kubaafwa mu nshila ibomba lintu cakabilwa. Bushe kukabako abali bonse abali no kukabila ifya kwendamo? Ni bani bengabaafwako? Bushe bamo baliba aba mwenso nelyo abashaicetekela? Bushe bakasabankanya bacilapo kubelesha kuti babomba pamo na bene? Ni shani pa lwa abo bashenda nelyo abalwala? Bushe kuti babombako ubunte bwa pa telefoni, ubwa kulemba bakalata, nelyo imibombele imbi iya kusandulula?

⁵ Abanaka bamo balakoseleshiwa lyonse lwa ku mupashi, na muli fyo kuti baseshiwa ukuibimba mu mulimo wa kushimikila na kabili. Kampeni wa Loleni! waibela uwa ciNgeleshi akabapayanishisha ishuko lya mu nshita ilishaiwamina ilya kutendeka ukubomba na kabili.

⁶ Kansheni Abacaice Ukwakanamo: Abana ba Nte sha kwa Yehova abengi balakonka abafyashi babo ku ŋanda ne ŋanda pa myaka iingi, nangu cingati tabalati batendeke ukubomba nga bakasabankanya bashabatishiwa. Bushe nomba ili e nshita ya kuti batendekeko? Bushe nabaseshiwa ukufuma ku mutima ku kwakana mu mulimo wa ku ŋanda ne ŋanda mu kubamo bupilibulo? Imitwe ya ndupwa ilingile ukubomfya inshita imo mwi sambililo lya Baibolo ilya lupwa ku kwaafwa abana babo abafikapo ukupekanishisha inshila sha kushimikilamo ukulingana no mushinku wa umo pamo pene no kulamuka. Abakulileko kuti basoobolapo icipusho ca kulangulukapo cimo ica kwimya ubuseko bwa kwa mwine ŋanda kabili lyene ukulondolola icasuko muli magazini. Abana abanono kuti bacitilo bunte bwa kufumamo cimo mu mashiwi fye ayanono. Ku ca kumwenako, kuti bakoselesha mwine ŋanda “ukubelenga magazini waibela uuleshalikwa mu kusaalala kwa calo muli uno mweshi.” Ilyo mulepekanya ngo lupwa, shininkisheni ukusanshamo imitubululo ukukuma ku fya kucimfya ifya kucilikila ukulanshanya ifyaseeka. Kuti mwasanga imfundo ishisuma ishingi mu citabo ca Ukupelulula. Pa tushita twa kulya na pa tushita tumbi utwalinga, koselesheni ifilundwa fya lupwa ukushimika ifya kukumanya balesanga mu mulimo wa mwi bala.

⁷ Mwe Basambi ba Baibolo Abafikapo Bombeni Umulimo Yesu Acitile: Yesu tapeleeshe ukusambilisha kwakwe ku kupeela fye amakambisho pa fyebo fikumine ku fifundisho. Aile pamo na basambi bakwe mu butumikishi no kubasambilisha ifya kushimikila. (Luka 8:1; 10:1-11) Bushe ifintu fyaba shani ilelo? Amasambililo ya Baibolo ukucila pali 100,000 yaletungululwa mu Zambia. Ukwabulo kutwishika, mu kuba no kukoselesha kwalinga ubwingi bwa aba basambi kuti babombela pa ncitilo ikonkelepo mu kukanshiwa kwabo no kufikapo ukubomba nga bakasabankanya bashabatishiwa mu April.

⁸ Nga ca kuti ulatungulula isambililo lya Baibolo, languluka pa fipusho fyakonkapo: Bushe umusambi alelunduluka, ukulingana no mushinku wakwe no kulamuka? Bushe alitendeka ukwebako bambi ifyo asumina ukupitila mu kulanshanya kwa mu lyashi? Bushe ‘alefwalo buntu bupya’? (Kol. 3:10) Bushe nafikapo pa fifwaikwa ifya bakasabankanya abashabatishiwa, ifyalondololwa pa mabula 97 ukufika ku 99 mu citabo ca Ubutumikishi Bwesu? Nga uli uwashininkisha ukuti nafikapo, mulandu nshi te kulanshanishisha na wene? Abasambi bamo bakabila fye ukubalaalika mu kulungatika ukwakana mu mulimo. Kwena, nga ca kuti umusambi ali uwaitemenwa, intanshi cili icakabilwa kuli kangalila wa kutangilila ukutantika nga pe ukuti kubeko ukulanshanya na baeluda babili. Pa lubali lumbi, icintu cimo limbi kuti cileshingashingisha umusambi. Napamo umo uwa baeluda kuti aya na iwe kwi sambililo lya Baibolo no kulenga umusambi ukuilumbulwila umwine ifyo aleyumfwa ukukuma ku cine. Pa numa ya kukutika ku cili ku mukoshi wa musambi, eluda kuti pambi aba na maka ya kupayanya imitubululo ibomba, pamo pene no kwaafwa kwa mu Malembo.

⁹ ‘Lubuleni Nshita’ ku Kubombako Bupainiya bwa Kwafwilisha: Cila mwaka mu kati ka ciputulwa ca mwaka ica Cibukisho, ukutasha pa cilubula kulasesha amakana ‘ukulubula’ inshita ku kubombako bupainiya bwa kwafwilisha. (Efes. 5:15-17) Nangu cingati cilafwayako ukuipeela bulilambo, ifilambu fifumamo filaba ifikalamba. Impendwa ishaiwamina iya misepela balashukila utushita twa kutuusha ukufuma ku sukulu ku kubombako bupainiya bwa kwafwilisha. Abakalamba ababomba incito inshita yonse babomfya ifyungulo bushiku ne mpela sha milungu mu kukumanina muli uyu mulimo umo wine. Muli fyo, indupwa shonse shalishukila akashita ka kubombako bupainiya bwa kwafwilisha capamo! Mu filonganino fimo baeluda na babomfi batumikila abafulilako na bakashi babo balilembeshako nga bapainiya ba kwafwilisha. Pa kucincishiwa ku ca kumwenako cabo ica kupimpa, bambi na bo balicita cimo cine, ica kuti impendwa ikalamba iya cilonganino babomba nga bapainiya ba kwafwilisha mu April.

¹⁰ Nampo nga uli na maka ya kubombako bupainiya bwa kwafwilisha nelyo iyo, fwailishako inshila sha kwingilishako umulimo obe mwi bala mu April. Imikile ubuyo we mwine, ubukafwaya ukubombesha pa kufikapo lelo ubwingafikwapo. Ukufwaisha kobe ukwa “kubomba no kubomfiwa mu kukumanina” mu mulimo wa kwa Yehova, ukulingana ne mibele yobe, kukaba ne paalo lyakwe.—2 Kor. 12:15, NW.

¹¹ Ukukumana kwa Mulimo wa mwi Bala: Ukukumana kwa mulimo wa mwi bala kulingile ukutantikwa ubushiku ubuli bonse ubwa kampeni wa Loleni! wa mu ciNgeleshi, pa nshita iyo iikasuminisha ukufumina mu butumikishi mu kubangilila. Kulingile na kabili ukubako imitantikile ya kucitilo bunte bwa cungulo bushiku. Bakasabankanya abengi bakalabomba mu mulimo wa mwi bala pa mpela sha mulungu, e co ifilonganino filingile ukutantika ukukumana kwa mulimo wa mwi bala pa Fibelushi, ulucelo ne cungulo, mu ciputulwa conse ica kwananya kwaibela ukwa Loleni!

¹² Abatungulula ukukumana kwa mulimo wa mwi bala balingile ukushininkisha ukuti kuliko icifulo ca kubombelamo icikalamba. Icifulo icishabombelwamo nomba line e cifwile ukupwishishiwa intanshi. Bushe nukwata icifulo ca kubombelamo cimo nelyo ifyafulilako ifyo fishabombelwamo pali ndakai? Nga ca kuti uli no kukabila ukwaafwa ku kubombela muli fyene muli kampeni, landa kuli kangalila wa mulimo nelyo kuli munyina uusakamana ififulo fya kubombelamo kabili bakaba aba nsansa ukukutantikila aba kukwaafwa.

¹³ Ni Bamagazini Banga Uli no Kushalika? Umuntu umo umo ali no kuyasukila ici cipusho. Pa kupimununa ubwingi bwa bamagazini wingashalika muli kampeni, tontonkanya pa musango wa cifulo ukalabombelamo, umushinku obe, ubutuntulu bobe ubwa bumi, inshita wingapeelesha kuli uyu mulimo, ne milandu imbi. Nangu cibe fyo, mona ukucinkulako ukwapeelwe mu Ulupungu lwa kwa Kalinda ulwa January 1, 1994 ukwatile: “Pamo nge mitubululo, bakasabankanya kuti pambi bakwata ubuyo bwa, tutile, bamagazini 10 pa mweshi, ukushintilila pa mibele yabo; bapainiya balingile ukutukutila 90.” Bushe ubuyo bwapalako kuti bwabomba kuli iwe?

¹⁴ Baeluda—Mulekabila Ukupekanya mu Kusakamanishisha: Shininkisheni ukuti, nga cingacitika, icifulo ca kubombelamo conse ica cilonganino cikabombelwemo ukubomfya magazini waibela uwa Loleni! Kulingile ukubako ukusakamana kwaibela ku kubombela mu fifulo fya makwebo ifyapeelwa ku cilonganino. Abalebombela muli ifi fifulo bafwile ukuipekanya bwino no kufwala mu kupempenkana. Imipeelele yapikana tailekabilwa. Lintu wafika pali shimakwebo, kuti watila ilingi line tausanga bashimakwebo pa mayanda, e co wamutandalila pa cifulo cakwe ica bukwebo ku kumulangisha icipande ico mu kushininkisha ali no kutemwa. Lyene mu kwipifya kuti walanshanya nankwe icishinka ca kulungatika muli magazini. Ubunte bwa mu musebo ukubomfya bamagazini na bo bwine bulingile ukuteyanishiwa bwino mu kati na nkati ka cifulo ca kubombelamo ica cilonganino. Inshila yacilapo kufumamo cimo iya kubombelamo umulimo wa mu musebo ili kuitendekelako no kulanda ku bapita nshila, ukucila ukupembelela bene ukulanda kuli iwe. Apantu icintubwingi bakalakumona, ufwile ukushininkisha ukuti ulemoneka uwacindama. Kuti pambi kwabako incende shimbi mu cifulo cobe ishingabombelwamo mu kati ka kampeni, pamo nga ifibansa fya ndeke, ifipatala, ukwa kwimika bamotoka, amaparka ne fifulo ukusungilwa abakoloci. Ibumba lya baeluda kuti lyapimununa imitantikile yalinga iingatantikwa ku kucitilo bunte muli ishi ncende sha cifulo cenu ica kubombelamo ica cilonganino.

¹⁵ Yehova ni kabomba uushinaka. (Yoh. 5:17) Alengele imyulu na pano isonde pamo ne filimwa ne nama; lelo atwalilile ukubomba ukufikila alengele icibumbwa ca kumuletela ubukata pano isonde—umuntu. Icishinka ca kuti tuli aba mweo caba ca kufumamo ca kulungatika ica kuti Lesa aliba uwaitemenwa ukubomba. Pamo nga “bapashanya Lesa,” tulingile ukuseshiwa ku kutemwa kwesu ukwa kuli wene ku kuba “abacincilile milimo isuma.” (Efes. 5:1; Tito 2:14) Apantu Yehova e wawaminwa ukupokelela ukubombesha kwesu ukwa maka kabili apantu ukufwaisha ukumona ifya kufumamo fyawamisha kwaba mibele ya muntu wacincila, tulingile ukuba abasekelela mu kubomba umulimo wine wine mu butumikishi. Kwena, Yehova alatasha ukuipeela bulilambo ukuli konse uko tuipeela, kabili tatubombela ibusha nakalya. (1 Kor. 15:58) E co, mu kuba ne mitima ya kutasha, lekeni tuibikilisheko fwe bene ku mibombele yabamo kucincila mu April, abacetekelo ukuti Yehova akatusenamina no kutupaala kabili tukatunguluka apakalamba!