Pashanyeni Icitetekelo Cabo
1 Umutumwa Paulo alondolwele icitetekelo ukuti “e shintililo lya fintu tulecetekela, ni nte ya fintu ifishimonwa.” Alundilepo ukuti “ukwabulo kutetekela te kuti kube ukutemuna [Lesa].” (Heb. 11:1, 6) Paulo atucincishe ukubomfya icitetekelo, ukucifusha, no kucikonkelela.—2 Kor. 4:13; Kol. 2:7; 2 Tim. 2:22.
2 Baibolo yalilondolola ifya kumwenako fyapulamo ifingi ifya citetekelo. Mu AbaHebere icipandwa 11, Paulo atantika umutande walepa uwa nte abo balangishe icitetekelo cishingabongololwa. Uwasanshiwamo muli uyu mutande ni Abele, uwali uwa kubalilapo ukwipaiwa pa citetekelo cakwe. Noa alitantikwamo pa kuti ku citetekelo cakwe alangile akatiina ka bukapepa ako kalekabilwa ku kupususha ulupwa lwakwe. Abrahamu alitashiwa pa citetekelo cakwe ne cumfwila. Mose alitashiwa pa kuti ku citetekelo cakwe akoselele nga uumone Mfumu iishimoneka. Umutande wa fya kumwenako walilepele ica kuti Paulo atile kuti yamucepela inshita ya kubalondolola bonse. Fintu twaba aba kutasha ifyo kuti twakosha icitetekelo cesu pa kupituluka ‘mu mibele yabo iya mushilo kabili iya bukapepa’!—2 Pet. 3:11.
3 Mu mwanda wa myaka uwa kubalilapo, Yesu aipwishe icipusho ca kuti: “Umwana wa muntu ilyo akesa, bushe akasange citetekelo pano nse?” (Luka 18:8) Cisuma, lyene, bushe twalikwata ifya kumwenako fya citetekelo abacili aba mweo ilelo? Bushe tulamona abaume na banakashi, bonse abaice na bakalamba, ukuba ne citetekelo cishingatelententa muli Yehova nga fintu cali ku bantu ba kwa Lesa abalembwa mu Baibolo?
4 Ifya Kumwenako fya Muno Nshiku Ifya Citetekelo: Ifya kumwenako fyapulamo ifya citetekelo kuti fyasangwa ku bantu twaba na bo! Icitetekelo ca bakangalila abaletutungulula caliwaminwa ukupashanya. (Heb. 13:7) Lelo aba te beka ababa aba ca kumwenako mu citetekelo. Mu filonganino fyonse mwaba aba bucishinka ababombela Yehova mu busumino pa nshita ntali, ilingi line ukubomba mu mibele yaafya nga nshi.
5 Tufwile ukutasha bankashi shesu aba busumino, abo pa myaka iingi, bashipikisha ukukaanya ukufuma ku balume babakaanya. Abafyashi abashimbe balibomba no bwafya bwa kukusha abana beka fye. Kwalibako bamukamfwilwa bacikalamba pa kati kesu abo bashishala ku mibombele ya cilonganino nangu cingati tabakwata ulupwa lwa kubaafwa. (Linganyeniko Luka 2:37.) Tulapapushiwa pa lwa citetekelo ca abo bashipikisha amalwele ya mutatakuya. Abengi balitwalilila ukubomba muli bucishinka nangu cingati balipelebela mu mbali ishingi icibalenga ukukanapeelwa amashuko yalundwako aya mulimo. Kwalibako Inte shacaice abo mu kushangila babomfya icitetekelo te mulandu no kukaanya pa sukulu. Ukuipeelesha kwesu kuli bukapepa kulakulilako ilyo tulemona bapainiya ba busumino abatwalilila ukubomba cila mwaka ilyo balelolenkana na mafya yafulisha. Kwati fye ni Paulo, kuti yatucepela inshita nga twaeseshe ukushimika ifya kukumanya fyonse mu mulimo wa Bufumu ne milimo ya citetekelo iyabombwa na aba bamunyina na bankashi!
6 Ifi fya kumwenako fya citetekelo filatusansamusha no kutukoselesha. (1 Tes. 3:7, 8) Tulacita bwino ukupashanya icitetekelo cabo pa mulandu wa kuti ‘abacite cishinka balatemuna [Yehova].’—Amapi. 12:22.