Imisangulo ya Mulimo wa mwi Sonde Lyonse uwa Sosaite Ilafwilisha Ukutanunuka
Nga fintu casobelwe pali Esaya 54:2, 3, ukupepa kwasanguluka ukwa kwa Yehova kuletwalilila ukutanunuka ukupulinkana isonde lyonse. Ici cilesanshamo ifyalo fyalekanalekana ifya mu kontinenti wa Afrika ne fishi fyapalaminako. Mu myaka 10 iyapitapo, ifibindo pa mibombele ya Bufumu fyalifumishiwapo mu fyalo pamo nga Angola, Cameroon, Equatorial Guinea, Ethiopia, Madagascar, Malawi, Mozambique, na Togo. Muli ifi fyalo ne fyalo fimbi umo ibala lyabuutila ukulobolola, bamishonari ba ku Gileadi, abapwisha Isukulu lya Kukansha Ilya Butumikishi, ifilundwa fya lupwa lwa Bethel, na bambi baliya ku fifulo fyabo ifya kubombelako.—Mat. 9:37, 38.
Ukwabula ukutwishika, ukwingilishiwako kwa bakapepa ba cine mu kuteyanya kwa kwa Yehova kulefwaya ubukuule bwa myanda ya Mayanda ya Bufumu ayapya. Na kabili caliba icafwaikwa ukupekanishisha Ifiyanda fya Kulonganinamo ne fikuulwa fya misambo ifipya nelyo ifyatanununwa. Ukupayanya indalama sha aya makuule capamo no kutwalilila ukuya pa ntanshi mu mulimo wa Bufumu te mu Afrika mweka lelo na mu ncende shimbi ishe sonde na mo mwine kwalipooswapo imisangulo iingi iya mu mulimo wa mwi sonde lyonse uwa Sosaite.
Ifikope fili pa mabula yabili iya ici ca mu kati filemupeela icitontonshi ca fintu Sosaite iletukusha ukupwishishisha mwi bala lya mu Afrika. Ifilangilwe makuule yamo ayalebombwapo ne milimo imbi iikatendeka mu kwangufyanya.
Pa kubebeta charti wa mulimo wa mwi bala muli 1996 Yearbook, kuti mwaishiba bwino ifyo bakasabankanya muli ifi fyalo balebomba ubutumikishi. Kwalibako ukwingilishiwako kwapulamo mu fyalo ifingi, kabili impendwa ya basangwa ku Cibukisho iyaibela ilelangisha ukuti ukukula kuti kwabako. Lintu twaibukisha ifyapwishishiwa pamo nga ulubali lwa kushimikila Ubufumu ukwa mu cibulungwa conse ice sonde no mulimo wa kupanga abasambi mu makontinenti yambi, ciletwaafwa ukumfwikisha ishuko lintu twakwata ilya kwafwilisha ukupepa kwa cine ukupitila mu misangulo.—Luka 16:9; 1 Tim. 6:18.
[Icikope pe bula 3]
Iŋanda ya Bufumu mu KwaZulu-Natal, South Africa, iyakuulilwe mu nshiku 9
[Icikope pe bula 3]
Iŋanda ya Bufumu iyanako mutengo mu Nigeria
[Icikope pe bula 3]
Iciyanda ca Kulonganinamo mu Mozambique icakwata ifipuna fya bantu 1,500, icikapwishishiwa ku kupwa kwa 1996
[Icikope pe bula 3]
Umusambo wa ku Mozambique, uukapwishishiwa mu 1996
[Icikope pe bula 3]
Umusambo wa ku Sierra Leone, uwatantikwa ukupwishishiwa luno lusuba
[Icikope pe bula 4]
Iciyanda ca Kulonganinamo icapwishishiwa ukwabula ifibumba mu Mauritius, no musambo, ifikapwishishiwa muli shinde wa 1997
[Icikope pe bula 4]
Umusambo wa mu Zimbabwe uulekuulwa
[Icikope pe bula 4]
Iciyanda ca Kulonganinamo icabula ifibumba no musambo upya uulekuulwa mu Senegal
[Icikope pe bula 4]
Umusambo upya uwa mu Kenya, mu musumba ukalamba, Nairobi
[Icikope pe bula 4]
Umusambo wa mu Madagascar uuli no kupwishishiwa nomba line
[Icikope pe bula 4]
Umusambo uuli no kukuulwa mu Malawi