Pameni pa Kucita Ifipempu fya Kubwelelamo

¹ Bushe mulaipakisha ukucita ifipempu fya kubwelelamo? Bakasabankanya abengi balaipakisha. Nakalimo kuti mwaliko aba mwenso mu kubalilapo, ukucilisha lintu mwalebwelela ku bene mayanda abasekelele fye panono lintu mwabatandalile umuku wa kubalilapo. Lelo lintu mwapama muli Lesa wesu ku kulanda imbila nsuma mu fipempu fya kubwelelamo, kuti mwapapa ukusanga fintu uyu mulimo waba uwayanguka kabili uwa kulambula. (1 Tes. 2:2) Mu nshila nshi?

² Mu kushininkisha, paliba ubupusano bukalamba pa kati ka cipempu ca kubwelelamo no kutandala kwa kubalilapo. Tucita icipempu ca kubwelelamo ku muntu twaishiba kale kale, te ku mweni iyo, kabili mu cinkumbawile calyanguka ukulanshanya no muntu twaishiba kale kale ukucila umweni. Ukukuma ku filambu fyawamisha ififuma mu kubombako uyu mulimo, ifipempu fya kubwelelamo kuti fyatungulula ku masambililo ya Baibolo aya mu ng’anda ayasanduluka.

³ Lintu tubomba ku ng’anda ne ng’anda, libili libili tutandalila abantu abashalesekelela lintu twabatandalile ku numa. Mulandu nshi, lyene, tutwalilila ukubatandalila? Twalishiba ukuti imibele ya bantu ilaluka no kuti umuntu uwalemoneka uushayangwako nelyo uwalekaanya fye no kukaanya ilyo twatandele mu kubalilapo, nakalimo kuti asekelela umuku wakonkapo twatandala. Ilyo twaibukisha ico, tulapekanishisha ifipempu fya kubwelelamo no kupepela ipaalo lya kwa Yehova pa kuti ico twasosa calenga abantu ukwankulako bwino.

⁴ Ilyo tulebomba umulimo wa ku ng’anda ne ng’anda, nga ca kuti mu kuitemenwa twashimikila abantu abo ku numa bashalesekelela nangu fye panono, bushe te kuti tuitemenwe ukucilanapo ukubwelela ku uuli onse uwasekelela mu bukombe bwa Bufumu?—Imil. 10:34, 35.

⁵ Fwe bengi twaba mu cine ilelo pa mulandu wa kuti kasabankanya mu kutekanya aaleisa kuli ifwe ku cipempu ca kubwelelamo. Nga ca kuti e fyo cali kuli imwe, nakalimo kuti mwaipusha ukuti, ‘Bushe namumwene shani ulya kasabankanya mu kutendekelako? Bushe mu kwangufyanya nalisumine ubukombe bwa Bufumu lintu nabumfwile mu kubalilapo? Bushe namoneke ukukanayangwako?’ Mu cifulo ca ico, tufwile ukuba aba nsansa pa kuti kasabankanya uwabwelele kuli ifwe atumwene nga fwe bawaminwa icipempu ca kubwelelamo kabili pa kuti ‘alipamine muli Lesa [wakwe],’ alitandele, no kutwalilila ukutusambilisha icine. (1 Tes. 2:2) Ni shani ku lwa bantu abasekelelako pa kubalilapo lelo pa numa bamoneka ukutusengauka? Tatulekabila ukufuupulwa, nga fintu ica kukumanya cikonkelepo cilelangilila.

⁶ Bushiku bumo ilintu bakasabankanya babili balebomba ubunte bwa mu musebo lucelocelo, bakumenye umukashana aleyensha umwana muli pulemu. Uyu mwanakashi alipokeleko magazini no kulaalika bankashi ukuti bakaye ku mwakwe ubushiku bwa pa Mulungu ubwakonkelepo. Bafikile pa nshita intu fye bapangene, lelo mwine ng’anda abebele ukuti taali na nshita ya kulanshanya. Nangu cibe fyo, abalaile ukuti aali no kubapo umulungu wakonkelepo. Bankashi baletwishika nampo nga aali no kusunga icipangano, lelo uyu namayo balimusangile alebapembelela lintu babwelele. Isambililo lyalitendekwe, kabili ukulunduluka kwa uyo mwanakashi kwali kwa kusungusha. Mu nshita fye iipi, atendeke ukusangwa ku kulongana lyonse no kubombako umulimo wa mwi bala. Nomba alibatishiwa.

⁷ Imikeni Umufula pa Kutandala kwa Kubalilapo: Umufula ulafwaikwa pa kuti tutunguluke mu cipempu ca kubwelelamo ilingi line wimikwa pa kutandala kwa kubalilapo. Kutikeni mu kusakamanishisha ku fintu mwine ng’anda alelanda. Finshi mwaumfwapo? Bushe alafwaisha ukupepa? Bushe ayangwa imilandu ya mu bwikashi? Bushe asekelela muli sayansi? mu lyashi lya kale? mu bubumbo? Pa kusondwelela, nakalimo kuti mwaipusha icipusho ca kufwailisha, no kulaya ukwisalanshanya icasuko ca mu Baibolo lintu mwabwelelako.

⁸ Ku ca kumwenako, nga ca kuti mwine ng’anda asuminisha ubulayo bwa Baibolo ubwa paradise wa pe sonde, ukulanshanya kwalundwako pali ilyo lyashi kuti kwalinga. Ilyo fye mushilaya, nalimo kuti mwamwipusha amuti: “Ni shani fintu twingashininkisha ukuti Lesa akafikilisha ubu bulayo?” Lyene lundenipo ukuti: “Nakalimo kuti nashokelako lintu balupwa lwenu bambi na bo bali pa ŋanda, kabili lyene kuti namulanga fintu Baibolo yayasuka ici cipusho.”

⁹ Nga ca kuti mwine ng’anda talesekelela mu lyashi ilili lyonse fye, nalimo kuti mwaipusha icipusho icipushiwa mu nshila sha kulandilamo ishiba pe bula lya kulekelesha mu Ubutumikishi Bwesu Ubwa Bufumu no kubomfya ico nga apa kwisatendekela ifyo mukalanshanya mu kukonkapo.

¹⁰ Sungeni Ifyalembwa Ifyalungama: Icalembwa cenu ica ku ng’anda ne ng’anda cilingile ukuba icalungama kabili icakumanina. Lembeni ishina na keyala ka kwa mwine ŋanda mu kwangufyanya fye lintu mwafuma pali iyo ng’anda. Mwitunganya fye inambala ya ng’anda nelyo ishina lya musebo—moneni bwino bwino ifyo mulembele ku kushininkisha ukuti nafilungama. Lembeni fintu uyo muntu amoneka. Lembeni ilyashi lintu mwacilanshanya, amalembo mwacibelenga, impapulo ishili shonse isho mwacishalika, ne cipusho ico mukaasuka lintu mwabwelelako. Sanshenipo no bushiku ne nshita mwatandele mu kubalilapo na lintu mwatile mukabwelelako. Nomba apo icalembwa cenu cakumanina, mwicilufya! Cibikeni mu cifulo cacingililwa pa kuti mwingamonapo inshita imbi. Twalilileni ukutontonkanya pali uyo muntu ne nshila mukalanshanishamo lintu mwabwelelako.

¹¹ Ishibeni Icili Amabuyo Yenu: Mu kubalilapo, pa kuba abacincimuka kabili aba bucibusa, mubombeshe ukulenga mwine ng’anda ukuba uwayangukililwa. Mulangeni ukuti namusekelela muli wene pamo nga umuntu, ukwabula ukumubelesha mu kucishamo. Mu kukonkapo, mucinkuleniko icipusho icili conse ico mwamwipwishe ilyo mwatandele umuku wafumako. Kutikeni mu kusakamanishisha ku fintu alelandapo, kabili mutasheni mu kufumaluka ku fyebo fyakwe ifyo alandapo. Lyene, langeni umulandu fintu Baibolo isosa fibombela. Mulangisheni amashiwi ya mu citabo ca Ukwishiba Uko Kutungulula ku Mweo wa Muyayaya, nga kuliko ayali yonse. Muleibukisha lyonse ukuti ubuyo bwenu ubukalamba mu fipempu fya kubwelelamo bwa kwesha ukutendeka isambililo lya Baibolo.

¹² Amashiwi ya kulungatika ayabomfiwa mu citabo ca Ukwishiba yalikumbamo fwe bengi ‘ukupama’ pa masambililo ya Baibolo ku kukoselesha abasambi ukusangwa ku kulongana no kubishanya no kuteyanya kwa kwa Yehova. Akale, twalitemenwe ukupembelela ukufikila abantu basambililako inshita iitali ilyo tushilabalaalika ukulongana na ifwe. Nomba, abasambi abengi balesangwa ku kulongana mu kwangufyanya fye lintu batendeka ukusambilila, kabili pa mulandu wa ico, balelunduluka mu kwangufyanya.

¹³ Umulume no mukashi baleshimikila mu lyashi fye ku untu babomba nankwe. Lintu alandile ukuti alitemenwe icine, balimulaalike ukulasambilila Baibolo mu citabo ca Ukwishiba. Pa nshita imo ine, bamwebele ukuti aali no kulasangwa ku kulongana, uko ifipusho fyakwe ifingi fingasukwa. Mu kuitemenwa uyu mwaume alisumine ubo bwite kabili alesambilila imiku ibili mu mulungu umo no kutendeka ukusangwa ku kulongana lyonse pa Ng’anda ya Bufumu.

¹⁴ Bomfyeni Broshuwa wa Cinshi Cintu Lesa Afwaya Kuli Ifwe?: Pa mabungano ya citungu aya “Inkombe sha Mutende wa Bukapepa,” twapokelele broshuwa wa Cinshi Cintu Lesa Afwaya Kuli Ifwe? Uyu broshuwa aliba uwa kwaafwa mu kutendeka ukusambilisha Baibolo abantu batiina Lesa te mulandu na po bafika mu masomo. Mwaba isambililo lyapaka, ililondolola ifisambilisho fya Baibolo ifya kutendekelako. Ulu lupapulo lukaba cibombelo cawamisha ku kusambilisha ukwishiba Lesa. Lulondolola icine mu kumfwika nga nshi kabili mu kwanguka ica kuti mupepi na onse uwa ifwe tukaba na maka ya kulubomfya ku kusambilisha bambi fintu Lesa afwaya. Mu kupalako, bakasabankanya abengi bakaba ne shuko lya kutungulula isambililo lya Baibolo muli uyu broshuwa.

¹⁵ Abantu bamo abamona ukuti tabakwata inshita ya kusambilila mu citabo ca Ukwishiba nalimo kuti baitemenwa ukulasambilila muli broshuwa wa Cintu Lesa Afwaya mu fiputulwa ifipi. Bakacankwa pa fintu bakasambilila! Mu mabula fye yabili nelyo yatatu, bakasanga ifyasuko ku fipusho ifyo abantu baatontonkanyapo pa myanda ya myaka iingi: Lesa Nani? Kaseebanya Nani? Cinshi caba imifwaile ya kwa Lesa kwi sonde? Ubufumu bwa kwa Lesa cinshi? Ni shani fintu wingasanga ukupepa kwa cine? Nangu cingati broshuwa alondolola icine mu mashiwi yayanguka, ubukombe bwabamo bwa maka. Alondolola ifishinka fyakatama ifyo baeluda bapitulukamo na baleya ku lubatisho kabili kuti fyabomba nga ica kutendekelako isambililo lyashikilako mu citabo ca Ukwishiba.

¹⁶ Pa kutambika isambililo pa cipempu ca kubwelelamo, kuti mwasosa fye amuti: “Bushe mwalishiba ukuti ukubomfya fye amaminiti yanono, kuti mwasanga icasuko ku cipusho cacindama ica mu Baibolo?” Lyene, ipusheni icipusho icaba pa kutendeka muli limo ilya masambililo ya muli broshuwa. Ku ca kumwenako, nga ca kuti muletandalila umukote, nalimo kuti mwatila: “Twalishiba ukuti akale Yesu alyundepe abantu. Lelo ku nshita ya ku ntanshi cinshi cintu Yesu akacitila abalwele? abakoloci? abafwa?” Ifyasuko fisangwa mwi sambililo 5. Umuntu watemwa ukupepa kuti acebushiwa ku cipusho ca kuti: “Bushe Lesa alakutika ku mapepo yonse?” Cayasukwa mwi sambililo 7. Ababa mu lupwa kuti batemwa ukwishiba: “Cinshi Cintu Lesa afwaya ku bafyashi na ku bana?” Bakasanga ifyasuko ilyo basambilila isambililo 8. Ifipusho fimbi ni fi: “Bushe abafwa kuti bacusha aba mweo?” icayasukwa mwi sambililo 11; “Mulandu nshi kwabelako imipepele iingi nga nshi iitunga ukuba iya Bwina Kristu?” icayasukwa mwi sambililo 13; na “Fintu nshi ufwile ukucita pa kuti wingasanguka cibusa wa kwa Lesa?” icayasukwa mwi sambililo 16.

¹⁷ Afweni Abalanda Ululimi Lumbi: Ni shani ku bene mayanda abalanda ululimi lumbi? Nga kuti cacitika, balingile ukusambilishiwa mu lulimi ulo bomfwikisha bwino nga nshi. (1 Kor. 14:9) Kangalila wa muputule kuti apayanishisha icilonganino cimo cimo umutande wa filonganino fya ndimi shimbi mu ncende. Pa kumona pa mutande, kalemba lyene akaba na maka ya kutuma Formu wa Kutandalilwa (S-70) uyo apokelela ukufuma ku baba mu filonganino fimbi kuli abo baba mu filonganino fya ulo lulimi. Uyo formu talingile ukutumwa ku Sosaite. Nga ca kuti takwaba cilonganino lwa mupepi kabili takuli bakasabankanya bakaaya abengalanda ululimi lulanda mwine ng’anda, kasabankanya kuti aesha ukusambilisha mwine ng’anda mu ndimi shibili, ukubomfya broshuwa wa Cintu Lesa Afwaya.

¹⁸ Kasabankanya ulanda iciNgeleshi atendeke ukusambilila no muntu ulanda iciVietnamese capamo no mukashi wakwe, uulanda iciThai. Impapulo na maBaibolo ifya mu ciNgeleshi, iciVietnamese, ne ciThai e fyalebomfiwa mwi sambililo. Nangu cingati ukwafya kwa lulimi kwalengele ukukanaumfwana mu kubalilapo, kasabankanya alemba ukuti: “[Uyo mulume no mukashi] balilundulwike lwa ku mupashi mu kwangufyanya. Balimona ifyo balekabila ukutendeka ukulasangwa ku kulongana na bana babo babili, kabili balebelenga Baibolo ubushiku lyonse pamo nga ulupwa. Umwana mwanakashi wabo uwa myaka ya bukulu 6 aliikwatila Baibolo wakwe.”

¹⁹ Lintu mulesambilisha abantu balanda ululimi lumbi, landeni panono panono, ukulumbulula bwino bwino, kabili bomfyeni amashiwi yayanguka. Nangu cibe fyo, mwibukishe ukuti mulingile ukulanga abantu balanda ululimi lumbi umucinshi. Tamulingile ukubamona nga utwana tunono iyo.

²⁰ Bomfyeni bwino ifikope fyayemba ifya muli broshuwa wa Cintu Lesa Afwaya. Nga ca kuti “icikope cimo cilelondolola ifyebo fingalondololwa mu mashiwi ayengi,” ifikope fyafulisha ifyaba muli uyu broshuwa kuti fyalondolola ifyebo fishaifulila kuli mwine ng’anda. Mwebeni ukubelenga amalembo muli Baibolo wakwe. Nga ca kuti isambililo kuti lyatungululwa inshita lintu lupwa waishiba ululimi lwa kwa kasabankanya e po ali ku kupilibula, ukwabula ukutwishika ico cikaba ica kunonsha.—Moneni Ubutumikishi Bwesu Ubwa Bufumu ubwa May 1984, ibula 8; October 1990, amabula 11-12.

²¹ Bweleleniko Ukwabula Ukushingashinga: Butali bwaba shani mwingapembelela ilyo tamulabwelelako? Bakasabankanya bamo balabwelelako nga papita fye ubushiku bumo nelyo shibili ukutula apo batandalile umuku wa kubalilapo. Bambi balabwelelako pa bushiku bumo bwine inshita imbi! Bushe ninshi bayangufyanisha? Ilingi line, abene mayanda tabasakamana. Ilingi line ni kasabankanya e ulekabila ukumona ukuti cili fye bwino, pamo pene no kupamako panono. Moneni ifya kukumanya fyakonkapo:

²² Bushiku bumo kasabankanya wa myaka ya bukulu 13 alebomba ku ng’anda ne ng’anda lintu amwene abanakashi babili abaleendela capamo. Ilyo aibukishe ukukoselesha kwa kushimikila ku bantu ukuli konse uko twabasanga, atununwike abanakashi mu musebo. Balisekelele mu bukombe bwa Bufumu kabili umo umo alipokeleko icitabo ca Ukwishiba. Munyina wacaice apokele akeyala kabo, alibweleleko pa numa ya nshiku shibili, no kutendeke sambililo lya Baibolo kuli umo umo.

²³ Nkashi umo alatantika ukubwelelako umulungu ukonkelepo. Lelo pa numa ya bushiku bumo nelyo shibili ukutula ilyo atandele umuku wa kubalilapo alashokelako ku kupeela mwine ng’anda magazini uulelanda pa lyashi lintu balanshenye ku numa. Eba mwine ng’anda ukuti: “Nalibelengele ili lyashi kabili natontonkenye fyo kuti mwatemwa ukulibelenga. Kwena nga twacilanshanya ino ine nshita, nomba nkabwelako fye pali Citatu icungulo nga fintu twapangene. Bushe ilya nshita icili fye bwino?”

²⁴ Lintu umuntu asekelela mu cine, kuti twashininkisha ukuti bakamukaanya mu nshila shapusanapusana. Ukubwelelako mu kwangufyanya pa numa natutandalilapo mu kubalilapo kukamukoselesha ukucincintila ukutitikisha ukuli konse ukufuma kuli balupwa, ifibusa fyakwe ifyapalamisha, na bambi.

²⁵ Lundululeni Ubuseko bwa Abo Mwasanga mu Fifulo fya Cintubwingi: Fwe bengi twalitemwa ukushimikila mu musebo, umo bemika bamotoka, pa fitesheni fya mabasi, mu matuuka, mu maparka, na mu fifulo fimbi. Ukusansha pa kushalika impapulo, tukabila ukulundulula ubuseko. Ilyo tuli na ubo buyo, tulingile ukubombesha ukwipusha ishina, akeyala ne nambala ya lamya iya bantu balesekelela bonse abo twakumanya, nga cingacitika. Tacaba icakosa ukwipusha ukupoka ifi, nga fintu nalimo mwingatontonkanya. Lintu muleya mulesondwelela ukulanshanya, buuleni notibuku wenu no kwipusha ukuti: “Bushe kuliko inshila intu twingesatwalililamo ukulanshanya nge fi pa nshita imbi?” Nelyo mutile: “kuti natemwa mwabelenga ilyashi limo ilyo ndeshininkisha mukatemwa. Bushe kuti nalileta ku mwenu nelyo ku ncito?” Munyina umo epusha fye ukuti: “Ni nambala nshi iya lamya ningabomfya pa kulanda na imwe?” Ashimika ukuti mu myeshi itatu abantu bonse batatu abo aipwishe balitemenwe ukumupeela amanambala yabo aya lamya.

²⁶ Bomfyeni Lamya ku Kusanga Abalesekelela no Kubakonkelela: Nkashi painiya abomfya lamya ku kushimikila ku bantu ba mu fikuulwa fyacingililwa apakalamba. Alacita ne fipempu fya kubwelelamo mu nshila imo ine. Ilyo atuma umuku wa kubalilapo, atila: “Ninjishiba ukuti tamunjishibe. Ndeesha sana ukulanda na bantu ba mu ncende yenu amashiwi ya mu Baibolo. Nga ca kuti muliko na kashita, kuti natemwa ukubelenga ubulayo bwaba pa . . . ” Pa numa ya kubelenga ilembo, atila: “Bushe te kuti cibe icawamisha nga twamwene iyo nshita yaisa? Naipakisha ukumubelengela aya mashiwi. Nga ca kuti na imwe namuipakisha, kuti natemwa ukutuma na kabili pa kuti twingalanshanya ilembo na limbi.”

²⁷ Pali lamya wa cibili, acinkulako mwine ng’anda pa lwa kulanshanya kwa ku numa kabili atila kuti atemwa ukubelenga muli Baibolo fintu icalo cikaba lintu ububifi bwafumishiwapo. Lyene alanshanya Baibolo na mwine ng’anda mu kwipifya. Mu kulanshanya kwa pali balamya ukwingi, abantu 35 balimulaalika ukuya ku mayanda yabo kabili alitendeka amasambililo ya Baibolo aya mu ng’anda 7! Bushe inshita shimo shimo cilamukosela ukubwelelako ku bantu balesekelela pa mulandu wa kulwala nelyo ifya mankumanya fimbi? Nga e fyo caba, mulandu nshi te kuti mulanshanishishe na abo bantu pali lamya?

²⁸ Bweleleniko ku Balesekelela mu Fifulo fya Bukwebo: Ifingi fyalisanshiwamo mu kubomba mu matuuka ukucila ukutambika fye bamagazini. Bashimatuuka abengi balasekelela mu cine mu kufumaluka, kabili ubo buseko bufwile ukulundululwa. Nga caba ifyo, kuti mwalanshanya na bo Baibolo nelyo fye ukusambilila na bo pa cifulo ca bukwebo cine. Lubali lumbi, imwe no muntu ulesekelela nakalimo kuti mwakumana akasuba pa kati nelyo pa nshita yalinga imbi.

²⁹ Kangalila wenda atandalile umwine we tuuka linono no kumweba ifyo kuti amulangilila ifya kusambilila Baibolo. Lintu umwine we tuuka aipwishe inshita ingabomfiwa ku kumulangilila, kangalila wenda atile kuti abomfya fye amaminiti 15. Ilyo aumfwile ifyo akobeke icipampa pa cibi, apalembelwe ati: “Nalabwela pa numa ya maminiti 20,” abuulile ifipuna, kabili kangalila wa muputule alanshenye no yo mwine we tuuka amaparagrafu yasano mu citabo ca Ukwishiba. Uyu mwaume wafumaluka alitemenwe fintu asambilile ica kuti pa Mulungu alisangilwe ku Kulongana kwa Cintubwingi ne Sambililo lya Ulupungu lwa kwa Kalinda kabili asumine ukutwalilila ukusambilila umulungu wakonkelepo.

³⁰ Pa kutambika isambililo mu cifulo ca bukwebo, nakalimo kuti mwatila: “Tubomfya fye amaminiti 15 ukulangilila programu wesu uwa kusambilila Baibolo. Nga cili icalinga, kuti naba uwa nsansa ukumulanga fintu tucita.” Lyene, bomfyeni fye amaminiti ayo yene 15. Nga te kuti mulanshanye pa nshita yalepa mu cifulo ca bukwebo, nalimo kuti calinga nga nshi ukutandalila shimatuuka ku ng’anda.

³¹ Bweleleniko Nangu fye Tamwashalikeko Impapulo: Nangu umuntu asekelela fye panono nga nshi, alakabila icipempu ca kubwelelamo, nampo nga twalishalikeko impapulo nelyo iyo. Kwena, nga ca kuti cailanga fye apabuuta ukuti mwine ng’anda talesekelela mu bukombe bwa Bufumu, kuti cawamisha ukuya kumbi.

³² Mu mulimo wa ku mwinshi no mwinshi, nkashi akumenye namayo uwali uwa bucibusa nga nshi lelo uwakaaninine fye ndai ukupoka bamagazini. Kasabankanya alemba ukuti: “Pa nshiku shafulilako naletontonkanya pali wene kabili napingwilepo ukuti mfwile ukulanda nankwe na kabili.” Mu kupelako, nkashi alipepele, alikosele, no kukonkonsha ku ciibi ca kwa uyo namayo. Alicankilwe lintu mwine ng’anda amulaalike ukwingila mu ng’anda. Alitendeke ukutungulula isambililo lya Baibolo, kabili alitungulwile na kabili ubushiku bwakonkelepo. Mu kupita kwa nshita, mwine ng’anda alishile mu cine.

³³ Tantikileni Libela pa Kuti Ifingi Fingapwishishiwa: Ciletubululwa ukuti tulebomfyako inshita shimo mu mulungu ukuya ku fipempu fya kubwelelamo. Ifingi kuti fyapwishishiwa nga twapekanya bwino. Tantikeni ukucita ifipempu fya kubwelelamo mu ncende imo ine iyo mukalabombelamo ku ng’anda ne ng’anda.

³⁴ Abatunguluka mu kucita ifipempu fya kubwelelamo na mu kutendeka amasambililo ya Baibolo aya mu ng’anda batila calikatama ukulangisha abantu ukuti muli abasekelela muli bene mu kufumaluka no kutwalilila ukubatontonkanyapo nangu ni pa numa ya kubatandalila. Na kabili cilafwaikwa ukulanda pa lyashi lya mu Baibolo ilya kucebusha no kwimika umufula wa cipempu ca kubwelelamo ilyo mushilafuma pa kutandala kwa kubalilapo. Mu kulundapo, calicindama ukubwelelako mu kwangufyanya ku kukonkelela ubuseko. Tulingile lyonse ukulaibukisha ubuyo bwa kutendeka isambililo lya Baibolo.

³⁵ Ukupama e mibele yakatama iingalenga ukuti tutunguluke mu mulimo wa fipempu fya kubwelelamo. Ni shani fintu inonkwa? Umutumwa Paulo ayasuka pa kusosa ukuti ‘tulapama’ ku kubilisha imbila nsuma kuli bambi “muli Lesa wesu.” (1 Tes. 2:2) Nga ca kuti mulefwaya ukulunduluka muli ulu lubali, pepeleni ukwaafwa ukufuma kuli Yehova. Lyene, mu kumfwana na mapepo yenu, bweleleni ku balesekelela bonse. Mu kushininkisha Yehova akamupaala nga mwabombesha!

[Akabokoshi pe bula 3]

Ifya Kutunguluka pa Kucita Ifipempu fya Kubwelelamo

■ Sekeleleni mu bantu icine cine.

■ Saleni ilyashi lya mu Baibolo ilya kulanshanya ilya kucebusha.

■ Imikeni umufula ku kutandala kumo kumo ukwakonkana.

■ Twalilileni ukutontonkanya pa muntu pa numa mwafumapo.

■ Bweleleniko mu bushiku bwine ubo nelyo pa numa ya nshiku shibili ku kukonkelela ubuseko.

■ Mwibukishe ubuyo bwesu ubwa kutendeka isambililo lya Baibolo.

■ Pepeleni ukwaafwa ku kupama muli uyu mulimo.