“Bushe Abantu Bonse Bakatala Abatemwana?”
1 Ubukombe ubushaiwamina, ubwa kukoselesha, kabili ubwa kusansamusha buli no kubilishiwa mwi sonde lyonse mu ndimi 169. Bukombe nshi ubu? Kabili bukapishiwa muli cinshi?
2 Ubukombe bulelanda pa lwa kutemwa abantu banensu. Bulesangwa muli trakiti wa Imbila ya Bufumu Na. 35, uwa mutwe wa kuti “Bushe Abantu Bonse Bakatala Abatemwana?” Uyu trakiti aletala alanda pa filecitika pali ndakai mwi sonde lyonse, ukulondolola ukuti ni co abantu tabatemwana e calenga ubucushi bonse ubu. Alondolola umulandu, maka maka mu nshita yesu, ukutemwana kushibantukile ne fyo cikaba ku ntanshi.
3 Ukulundapo, trakiti wa Imbila ya Bufumu Na. 35 alelondolola ukuti kuliko amamilioni mu calo ilelo abatemwana mu cine cine. Aleshibisha abalebukulula ubuKristu bwa kale—ukupepa kwa mu mwanda wa myaka uwa kubalilapo, ukwaishibikilwe ku kutemwana nga fintu Yesu Kristu asambilishe.—Luka 10:25-37.
4 Trakiti wa Imbila ya Bufumu Na. 35 alesondwelela pa kulondolola ifyo aba pano isonde bonse balaswa batemwane pantu bakalatungululwa na Kristu mu Bufumu bwa kwa Lesa. Abalebelenga ubu bukombe balekoseleshiwa ukushitako broshuwa atila Cinshi Cintu Lesa Afwaya Kuli Ifwe? no kusambilila ifya kucita pa kwisabako muli iyo mitantikile ya kutemwa iya mwi sonde lyonse iyalondololwa bwino bwino mu Cebo ca kwa Lesa.
5 Ni Bani Bakatwala Ubu Bukombe? Inte sha kwa Yehova mwi sonde lyonse bakebako abeshibishi babo, abena mupalamano, na balupwa pa lwa uku kutemwana mu October na November. Bonse abasuminishiwa ukushimikila balekoseleshiwa ukwananyako Imbila ya Bufumu Na. 35.
6 Ubuyo bukalamba muli uyu lulu bwa kucincisha abantu ukufwaya ukusambilila Baibolo atemwa muli broshuwa wa Cintu Lesa Afwaya nelyo mu citabo ca Ukwishiba. Ukulundapo, ukubombesha no mutima onse ukwa babomfi ba kwa Yehova kukaba bunte bwakulisha kuli Lesa wa kutemwa, Yehova, na ku Mwana wakwe, Yesu Kristu.