Inte sha kwa Yehova—Bakabila ba Cine

¹ Yesu Kristu apeele umulimo wa kubila ku basambi bakwe bonse, ukubakambisha mu kulungatika ukubila imbila nsuma iya Bufumu. (Mat. 24:14; Imil. 10:42) Abasambi bakwe aba mu kubangilila baimike ica kupashanya muli ci apantu balandile pa lwa Bufumu ukwabulo kuleka—pa fifulo fya kupepelapo na konse basangile abantu mu cintubwingi na ku ng’anda ne ng’anda. (Imil. 5:42; 20:20) Pamo nge Nte sha kwa Yehova ilelo, twaliishibisha nga bakabila aba Bwina Kristu aba cine, ukushimikila ubukombe bwa Bufumu mu fyalo 232 no kubatisha abasambi bapya ukucila pali milioni umo mu myaka fye itatu iyapita! Mulandu nshi umulimo wesu uwa kubila watungulukila ifi?

² Imbila Nsuma Ilatucincimusha: Bakabila ni bakashimikila, nelyo inkombe, sha mbila nsuma. E co, twalikwata ishuko lya kucincimusha ilya kubilisha Ubufumu bwa kwa Yehova—imbila nsuma fye yeka iya cine cine iingashimikilwa ku bantunse balecula. Twalicincimushiwa pa kwishibila kabela pa lwa myulu ipya iikateka isonde lipya mu kulungama ilyapangwa na bantunse aba busumino muli Paradise uleisa. (2 Pet. 3:13, 17) Ni fwe fye fweka fwe bakwata ili subilo, kabili tulafwaisha ukwebako bambi.

³ Ukutemwa kwa Cine Kulatukunta: Bukabila mulimo wa kupususha ubumi. (Rom. 1:16) E mulandu wine tubela no buseko sana mu kwananya ubukombe bwa Bufumu. Pamo nga bakabila ba cine, twalitemwa abantu, kabili ico citulenga ukubashimikilako imbila nsuma—indupwa shesu, abena mupalamano, abeshibishi, na bambi abengi abo twingashimikila. Ukubomba uyu mulimo no mweo onse ni nshila imo iyawamisha iyo twingalangilamo ifyo twatemwa bambi.—1 Tes. 2:8.

⁴ Umupashi wa kwa Lesa Ulatwaafwa: Icebo ca kwa Lesa catulaya ukuti ilyo twabomba umulimo wesu uwa kulimba no kutapilila imbuto sha Bufumu, ni Yehova “uumesha.” Ifyo fine e fyo tulemona mu kuteyanya kwesu ilelo. (1 Kor. 3:5-7) Mupashi wa kwa Lesa e utwaafwa mu mulimo wesu uwa kubila kabili e utulenga ukutunguluka nga nshi.—Yoele 2:28, 29.

⁵ Pa mulandu wa kukoselesha kwa ‘kubombo mulimo wa bukabila bwa mbila nsuma’ ukwaba pali 2 Timote 4:5, na pa mulandu wa kutemwa abantu bonse, lekeni citukunte ukushimikila imbila nsuma iya Bufumu iya kucincimusha pa nshita iili yonse, ukuba abashininkisha ukuti Yehova akatwalilila ukupaala umulimo wesu.