Laalikeniko Bonse Abali ne Cilaka
1 Abantunse ilelo nabafwa icilaka “te cilaka ca menshi, lelo ica kuumfwe cebo ca kwa Yehova” nga fintu kasesema Amose asobele. (Amose 8:11) Ku kwaafwa ababa ne ci cilaka ca ku mupashi, tubeba ifyo Lesa apayanya ku kupuupuutula abantunse ba cumfwila ku lubembu ne mfwa, ifyalondololwa mu cipandwa ca kulekelesha ica Ukusokolola ngo “mulonga wa menshi ya Mweo.” Twalikwata ishuko lya kulaalikako bonse abali ne cilaka ca bulungami ukwisabuulapo “ica bupe amenshi ya Mweo.” (Ukus. 22:1, 17) Ni shani tukalacite ci mu February? Ukupitila mu kushalika icitabo ca Ukusokolola—Akalume ka Kuko Kakalamba Nakapalama! Kuti mwafwaya ukweshako ishi nshila:
2 Apantu abengi balyangwako pa fya bumi, napamo iyi nshila kuti yabomba:
◼ “Abengi nabasakamikwa pa kuluma kwa mutengo pa kusungilila ubutuntulu busuma. Napamo na imwe mwalitontonkanyapo. [Lekeni asuke.] Bushe ubu bwafya kuti bwaisapwililila? [Pembeleni asuke.] Moneni ili subilo lyawamisha.” Belengeni Ukusokolola 22:1, 2. Lyene kupukuleni icitabo ca Akalume ka Ukusokolola pa cikope pa mabula 308-9, no kubomfya paragrafu 22 pe bula 311 ukucilondolola. Sondweleleni amuti: “Ici citabo cilanda pa cikomo cimo na cimo ica mu Ukusokolola.” Shalikeni icitabo no kupangana ilyo mukabwelelako.
3 Ilyo mwabwelelako, kuti mwatendeka ukulanshanya amuti:
◼ “Lilya naishile, twalandile pa lwa kupwililila kwa malwele. Bushe muleti kukaba inshita ilyo kushakabe uwa kulwala? [Lekeni asuke.] Moneni aya mashiwi yawamisha.” Belengeni Esaya 33:24. Lyene kupukuleni pe sambililo 5 muli broshuwa wa Cintu Lesa Afwaya, no kulanshanya amaparagrafu 5-6, ukwipusha ifipusho fya aya maparagrafu ifya pa kutendeka kwe sambililo no kubelenga amalembo yamo yamo ayalimo. Soseni no kuti ukufumyapo ukulwala ne mfwa cikafikilishako imifwaile imo iya kwa Lesa kwi sonde iya pa kutendeka. Panganeni ilyo mukabwelelako ku kulanshanya amaparagrafu 1-4 na 7 muli ili line isambililo.
4 Nga abantu abengi baletontonkanya pa mfwa ya kupumikisha baumfwile pa mulabasa nelyo mu nyunshipepala, kuti mwaesha ukusose fi:
◼ “Napamo mwaliumfwako ulwa [lumbuleni iyo ine mfwa]. Lintu imfwa yapumikisha fye, abengi balalanguluka ifyo bengasansamusha indupwa shifwililwe. Muletipo shani?” Lekeni asuke. Lyene kupukuleni pe bula 299 mu citabo ca Akalume ka Ukusokolola, no kumulanga icikope ca kubuuka. Konkanyenipo amuti: “Abengi balapapa ukumfwa ati abalungama na bashalungama bonse bakabuushiwa muli Paradise pe sonde. [Belengeni Imilimo 24:15 iyayambulwa mu paragrafu 9 pe bula 297, lyene londololeni nga fintu calondololwa mu paragrafu 10.] Ici citabo cilanda pa fingi ifya kulengo buseko pa lwa mifwaile ya kwa Lesa iya ku ntanshi. Nga mulefwaya ukusambililapo na fimbi, kuti mwasende ci citabo.” Panganeni ilyo mukabwelelako, esheni sana ukumona ifyo umuntu atemwisha ne fimusakamika.
5 Ilyo mwabwelelako, landeni ifyebo ifingalinga mwine ng’anda. Kuti mwatila:
◼ “Lilya twalanshenye, nalitemenwe ifyo mwalandile pa lwa mifwaile ya kwa Lesa kwi sonde. [Soseni ifyo alandile.] Nalifwaile ifyebo naleti kuti mwafitemwa.” Kupukuleni broshuwa wa Cintu Lesa Afwaya pe sambililo 5. Belengeni amaparagrafu ayafulilako no kulanshanyapo cikulu fye mwine ng’anda ali no buseko. Ilyo mwapangana inshita ya kubwelelako ku kutwalilila isambililo 5, mwebeni inshita sha kulongana. Mulondolweleni pa lwa Kulongana kwa Cintubwingi, no kumulaalikako.
6 Nga mulefwaya inshila yayanguka ukubomfya trakiti, kuti mwatila:
◼ “Kuti natemwa ukumupako uyu trakiti aleti Lisubilo Nshi ilya Batemwikwa Besu Abafwa?” Mupeeni, no kumweba alekonkamo ilyo mulebelenga paragrafu wa kubalilapo. Lekeni asuke icipusho cili muli sentensi wa kulekelesha. Belengeni paragrafu wa bubili, lyene kupukuleni pa cikope ca pe bula 299 mu citabo ca Akalume ka Ukusokolola. Konkanyenipo amuti: “Ici citabo cilalandapo ifingi pa lwa kubuushiwa na pa malayo ya ku ntanshi yambi aya mu Baibolo ayawamisha. Ici kuti mwasenda.” Panganeni ilyo mwingabwelelako.
7 Ukulungamo umucele mu kulaalika bambi, kuti kwabalenga ukwisa ku menshi ya mweo, ayo Yehova alepeela nomba. Kanshi, natwebe bonse abali ne cilaka ati, “Iseni”!—Ukus. 22:17.