Kuulaneni Ukupitila mu Kwasukapo pa Kulongana
1 Pa AbaHebere 10:24 tulakonkomeshiwa ‘ukucincimushanisha ku kutemwa kabili ku kubombe milimo isuma.’ Ici cisanshamo ukukuulana ukupitila mu kwasukapo bwino pa kulongana. Mulandu nshi tulingile ukwasukilapo? Kuti twayasukapo shani? Ni bani bakamwenamo?
2 Tontonkanyeni ulwa miku iingi mumwenamo lintu muleumfwa bambi balelanda ifyebo ifyayanguka kabili ifyaumfwika ifilundulula ukumfwikisha kwenu no kumukosha lwa ku mupashi. Na imwe mwalikwata ishuko lya kucita cimo cine kuli bene. Ukwasukapo kulangililo kuti mulafwaisha ‘ukupeelako ica bupe ica bumupashi’ ku kukoselesha bonse abalongene.—Rom. 1:11, 12.
3 Ifya Kwasuka Ifyasuko Ifisuma: Mwilalefya ifyasuko ukulande fishinka fyonse muli paragrafu. Ifyasuko ifitali ilingi line filashokoloka kabili kuti fyalenga bambi ukukanayasukapo. Icasuko ca kubalilapo pali paragrafu cilingile ukwipipa, icileyasuka icipusho mu kulungatika. Lyene abengalundapo kuti balanda pa fyo ifyo fyebo fingabomfiwa nelyo kuti balangilila ifyo amalembo yengabomfiwa. Moneni Icitabo ca Kutungulule Sukulu, pa mabula 90-2.
4 Nga ca kuti mulatiina ukwasukapo, mulepekanishisha libela icasuko icipi, no kulomba katungulula ukumusonta pali paragrafu mupekenye. Nga mwacite fi pa miku yafulilako, cikamwangukila ukwasukapo. Ibukisheni ukuti Mose na Yeremia bayumfwile ukuti tabengalanda ku cintubwingi. (Ukufu. 4:10; Yer. 1:6) Lelo Yehova alibafwilishe ukuti bamulandileko, ne mwe bene akamwaafwa.
5 Ni Bani Bakamwenamo mu Fyasuko Fyenu? Mwe bene mulamwenamo pantu ifyo mwasuka filashindaila icine mu muntontonkanya wenu no mutima, no kulenga ukuti ku ntanshi mukalefibukisha. Na kabili, bambi balamwenamo lintu baleumfwa ifyebo fya kukuulilila ifyo mulanda. Tulakoseleshiwa lintu bonse, ababelesha, abacaice, aba nsoni, nelyo abapya, baibikilishako ku kulumbulula icitetekelo cabo pa kulongana.
6 Tukasango kuti ‘ifyebo, ifyo fyawama mu nshita iyene ya fiko’ lintu fyabomfiwa ku kukuulana pa kulongana!—Amapi. 15:23.