‘Pamfiweni mu Kubile Cebo’
1 Nga mwapokelela icintu apalembelwe ati “NACIPAMFYA,” mucita shani? Ishiwi lya kuti “nacimpamfya,” lipilibula “icintu icilekabila ukucitwa mu kampampa.” E mulandu wine umutumwa Paulo akambishishe Abena Kristu ‘ukupamfiwa mu kubile cebo.’ (2 Tim. 4:2, NW) Bushe mulankulako ku kubomba uyu mulimo mu kampampa?
2 Nalimo Paulo alyebelwe ukuti bamunyina bamo ‘balinenwike mu kupimpa’ nga Abena Kristu. (Rom. 12:11) Ici calengele ukuti belalobolola ifisabo mu mibombele yabo kabili belaba ne nsansa, ifintu ifyo bali no kukwata pa kwafwa abantu.
3 Ifyo Yesu Alemona Ubutumikishi Bwakwe: Mwandi Yesu alisangile insansa mu kubomba ubutumikishi bwakwe! Atile: “Ica kulya candi kucito kufwaya kwa wantumine, no kupwisho mulimo wakwe.” Ica kumwenako ca kwa Yesu cacincimwishe abasambi bakwe, abo akoseleshe pa kubeba ukuti ‘amabala, nomba yabuutila ukuseepa.’ (Yoh. 4:34, 35) Ifyo Ukupamfiwa mu butumikishi bwakwe bonse kwamonekeshe lintu aebele abasambi bakwe ‘ukulomba Umwine wa kulobolola, ku kuleka atume ababomfi mu kulobolola kwakwe.’ (Mat. 9:38) Yesu alyumfwikishe ukuti umulimo wakwe wali wa kushimikila, kabili alipampamine ukukaanasuminisha icili conse ukumucilikila ukushimikila.
4 Nga ifwe Ilelo? Ilelo ukutwalilila ukushimikila e lintu kupamfishe icine cine. Amabala nayabuuta ku kuseepa mu fyalo ifingi. Abengi nga nshi balebatishiwa na mu fyalo umumoneka kwati mwalishimikilwa sana. Ala kuli “ukupikintika pe mu mulimo wa kwa Shikulu” ilyo impela ya bwikashi buno ileya ilepalamina. (1 Kor. 15:58) Tulekabila ukupilikita sana ukushimikilako abantu ubukombe bwa Bufumu ukucila na kale.
5 Shi natwangweko ukushimikilako abantu ku ng’anda ne ng’anda na konse kuntu abantu bengasangwa mu cifulo ca kubombelamo. Tulalangisha apabuuta ukuti twatangisha umulimo wa Bufumu mu mikalile yesu pa kushimikila apapela amaka yesu. (Mat. 6:33) Tukaba ne nsansa sana nga twashimikila mu busumino.