Finshi Fingatwaafwa Ukwiminina Ndi mu Kutetekela?
1 Ukulunduluka kwesu ukwa ku mupashi kulatulenga ukuba ne nsansa ukutula fye apo twatendekele ukubishanya no kuteyanya kwa kwa Yehova! Nalyo line, pa kuba ‘abalimbwa, abakuulwa, na baikashiwa ku kutetekela,’ tukabila ukutwalilila ukulunduluka lwa ku mupashi. (Kol. 2:6, 7) Nangu cingati abengi balilunduluka lwa ku mupashi, bamo balisensenunwa pa mulandu wa kufilwa ‘ukwiminina ndi mu kutetekela.’ (1 Kor. 16:13) Kuti twacilikila ici ukutucitikila. Ni shani fintu twingacita ico?
2 Ukulalya Lyonse Ifya ku Mupashi: Kwateni imitantikile ya ku mupashi iyo mwakulakonka lyonse mu kuteyanya kwa kwa Yehova. Fintu tukabila lwa ku mupashi filapayanishiwa muno mu kuteyanya. Ukulongana, ukulongana kukalamba, na mabungano filatwafwa ukulunduluka sana no kuba abaikashiwa lwa ku mupashi, kulila fye tulesangwako lyonse pa kuti tulenonkelamo muli fyonse. (Heb. 10:24, 25) Ukutantika inshita ya kubelenga lyonse Baibolo, bamagazini ba Ulupungu lwa kwa Kalinda na Loleni!, ne fitabo filondolola pa fya kulya fyakosa ifyaba mu Cebo ca kwa Lesa fikalenga imishila yesu iya ku mupashi ukuya pa nshi no kukoselako. (Heb. 5:14) Ukukwata amabuyo ya pa lwesu aya ku mupashi no kubombelapo sana pali aya mabuyo kulafumamo ubusuma bubelelela.—Fil. 3:16.
3 Ukwafwiwa na Bakosoka: Esheni ukubishanya na bakosoka lwa ku mupashi mu cilonganino. Ishibaneni na baeluda, pantu e bengatukosha na sana. (1 Tes. 2:11, 12) Umfwileni ukufunda kwabo ne mitubululo intu napamo bengamweba. (Efes. 4:11-16) Ababomfi batumikila na bo balafwaya ukwaafwa bambi ukuti beminine ndi mu kutetekela. E co muleya na kuli aba bamunyina pa kuti bengamukoselesha.
4 Bushe mulafwaya ubwafwilisho mu butumikishi? Landeni na baeluda, kabili bebeni ukuti mulefwaya ukumwafwa. Kuti bamubika na pa programu wa “Bapainiya Baleafwa Bambi.” Bushe e lyo mwabatishiwe? Ukubelenga icitabo ca Abateyanishiwa no kubomfya ifyalembwamo kuti fyamwafwilisha ukulunduluka lwa ku mupashi. Bushe muli bafyashi? Mulekosha bumupashi bwa bana benu lyonse.—Efes. 6:4.
5 Nga twaba abalimbwa kabili abaikashiwa mu kutetekela, tulaipakisha bucibusa bwapalamisha na Yehova no kubishanya kwa kutemwa na bamunyina. Ici cilatwafwa ukucincintila ukusansa kwa kwa Satana, kabili cilakosha isubilo lyesu ilya nshita ya ku ntanshi iya muyayaya.—1 Pet. 5:9, 10.