Bushe Mulecitapo Cimo pa Kutemwa kwa kwa Kristu?
1 Ilyo umutumwa Yohane aletontonkanya pa bumi bwa kwa Shikulu wakwe, alembele ati: “Pa kutemwa abakwe abali pano isonde, abatemenwe na ku mpela.” (Yoh. 13:1) Muli ino nshita ya Cibukisho, amatontonkanyo yesu yali fye pa kutemwa kwakulisha uko Kristu atutemenwe. Kuti twacitapo cimo pali uko kutemwa ukupitila mu kutetekela icilubula, ukubombako umulimo wa kushimikila mu kupimpa, no kupitila mu kushipikisha “ukufika ku mpela” nga fintu Yesu acitile.—Mat. 24:13; 28:19, 20; Yoh. 3:16.
2 Ukucitapo Cimo pa Kutemwa kwa kwa Kristu: Yesu ali uwacincila sana mu mulungu wakwe uwa kupelako pe sonde. (Mat. 21:23; 23:1; 24:3) Apo tupashanya Kristu, ukutemwa kulatutuninkisha na ifwe bene ukuti ‘tulepilikita’ mu mulimo wa kwa Yehova. (Luka 13:24) Bushe kuti mwashukila amapekanyo yalundwako aya kushimikila mu April pa kulundako inshita mupoosa mu butumikishi?
3 Uno mwaka, Umulalilo wa kwa Shikulu ukaba pali Citatu, pa April 19, icungulo bushiku. Ni banga bakasangwako kuli aka kashita kacindama? Kwena, cikashintilila sana pali ifwe. Bushe mwalilemba abo mulefwaya ukulaalikako—pamo nga basambi benu aba Baibolo na bambi abafwaya ukwishiba icine, balupwa, abeshibishi benu mu fya ncito, na bo musambilila na bo ku sukulu? Bushe mwalilanda na bo no kubalaalikako ukubafika na pa mutima? Bushe muli no kubacinkulako ilyo kukashala inshiku shinono ku Cibukisho? Bushe bakakabila mukabafwe pa kuti bakafikeko? Baeluda na bo balelaalikako abali bonse abaleko kubomba mu butumikishi. Tacilepilibula ukuti ifi Icibukisho cikaba mu kati ka mulungu ninshi tacicindeme sana ica kuti bambi nangu tabasangilweko te mulandu.
4 Mukese Namuipekanya: Calicindama sana ukwisa natuipekanya kabili abatuntulu mu mintontonkanya ilyo tulesangwa ku Cibukisho. Paulo akonkomeshe abasumina banankwe ukulaibukisha ubucindami bwa aka kashita. (1 Kor. 11:20-26) Kuti mwabelenga ifipandwa 13 ukufika ku 17 ifye Landwe lya kwa Yohane mwi sambililo lyenu ilya lupwa lyene ukweba umo umo mu lupwa ukulandapo ifyo ilambo lya kwa Yesu lipilibula kuli wene. Mwilaba ukubelenga lyonse amalembo ya mu Baibolo yalya aya kubelenga mu mulungu wa Cibukisho!
5 Ukutemwa twatemwa Kristu kwalibilima, kabili takupelela fye pa April 19 kulatwalilila. Twapampamina pa kucita pe ifilanga ukuti twalimutemwa! Ukusefya kwa Cibukisho uno mwaka kukatwafwa ukukosha uyo mupampamina.