‘Pilikiteni Ukupilikita Kusuma Ukwa Citetekelo’
1 Umutumwa Paulo akonkomeshe Timote ‘ukupilikito kupilikita kusuma ukwa citetekelo.’ (1 Tim. 6:12) Paulo na o wine alepilikita. Ilyo akotele, alandile ukwabulo kulamba ukuti ena alipilikite ukupilikita kusuma. (2 Tim. 4:6-8) E ico, abombele ubutumikishi bwakwe mu kushipa kabili alishipikishe. Nga twakonka ica kumwenako cakwe, kuti twashininwa mu mitima yesu ukuti tulepilikita na maka yesu yonse mu bulwi bwa citetekelo ca Bwina Kristu.
2 Bombesheni: Paulo alebombesha mu butumikishi. (1 Kor. 15:10) Na ifwe bene e fyo tubomba lintu tusapika abayana mu cifulo cesu ica kubombelamo. (Mat. 10:11) Pa kusanga abayana bamo, tufwile ukucelela mu kushimikila bamo mu misebo. Nelyo tufwile ukushimikilako mu cungulo kasuba nelyo icungulo bushiku pa kuti fye tumonane na bamo ilyo babwela pa mayanda.
3 Tufwile ukuisalapula no kutantika bwino ifintu pa kuti twicelwa ilyo tulekumana pe sambililo lyesu ilya citabo ku kuya mu mulimo wa mwi bala. Ku ca kumwenako, pa mpela ya milungu, ababa mu lupwa lwa Bethel bamo benda ukufika fye na kwi awala limo ku kuyasangwa ku kukumana kwa kuya mu mulimo wa mwi bala pamo ne filonganino baebwa ukulonganako. Kuti twakumbwa na balya abakwata indupwa mu cilonganino abafuma ukutali lelo lyonse tabacelwa. Ifya kumwenako fya musango yo ifya bantu abayanguka mu kucite fintu no kuiteyanya bwino, fyalilinga ukupashanya.
4 Cifwile ukulatupinda ukubwelelako kuli bonse abalefwaya ukusambilile cine abo tusanga. Nangu ni lintu twapeela bamo impapulo mu musebo nelyo ilyo twabashimikila mu lyashi fye, tufwile ukwesha ukupoka adresi wabo nelyo inambala ya lamya. Lyena tufwile ukubatandalila ku kulundulula ukufwaisha kwabo no kweshako ukutendeka isambililo lya Baibolo.
5 Muleya mu Mulimo Lyonse: Paulo ali no mute kabili alefikapo ukushimikila. (Rom. 15:19) Nga imwe ciba shani? Bushe mulabombako ubutumikishi lyonse? Bushe mwalitala amubombako mu mulimo wa mwi bala uno mweshi? Bakatungulula ba Masambililo ya Citabo pa Cilonganino bakapoosako amano ukumona ukuti bonse ababa mwi bumba lyabo babombeko ubutumikishi mu August. Bakamwafwa muli uyu mulimo.
6 Ilyo tulepashanya ica kumwenako ca kwa Paulo mu kushimikila imbila nsuma na maka yesu yonse, tukatwalilila ‘ukupilikito kupilikita kusuma ukwa citetekelo.’