Ifyo Ukukonkelesha Bambi Kwambukila Ishuko Lyenu Ilya Kushimikila
1 Abantu balitemwa sana ukukonkelesha abanabo. Kulaba ukukonkelesha ifisuma nelyo ifyabipa. Ababomfi banensu aba kwa Yehova batucincisha ku milimo isuma iya Bwina Kristu. (Heb. 10:24) Lelo, aba mu lupwa abashili Inte, abo tubomba na bo, abana be sukulu banensu, abena mupalamano, nelyo abakaaya bambi kuti batulenga ukukonka inshila ishumfwana na mafunde ya Bwina Kristu. Kuti ‘batuka imibele yesu iisuma iya muli Kristu.’ (1 Pet. 3:16) Kuti twapampamina shani pa kushimikila ukwabulo kucimba ku baletulwisha?
2 Aba mu Lupwa: Inshita shimo, umulume nelyo wishi uushili Inte ya kwa Yehova kuti alalesha abakashi na bana ukubombako ubutumikishi bwa ku cintubwingi. E fyo cali ku ba mu ng’anda imo ku Mexico. Umukashi umo na bana 7 baishile mu cine. Pa kubala, umulume wakwe talefwaya ukuti babe mu cine pantu talefwaya ulupwa lwakwe ukushimikila no kutambika impapulo sha Baibolo ku ng’anda ne ng’anda. Alemona ukuti uyu, mulimo wasuulwa. Lelo, umukashi wakwe na bana, bakakatile fye ku kupingula kwabo ukwa kubombela Yehova no kubombako lyonse mu butumikishi. Mu kuya kwa nshita, uyu mwaume atendeke ukumona ubucindami bwa kupokelela ukutantika kwa kwa Lesa ukwa mulimo wa kushimikila, kabili na o wine aipeele kuli Yehova. Camusendeele imyaka 15 pa kuti apokelele icine, lelo bushe nga alicitile co nga ca kuti ulupwa lwakwe lwalilekele umulimo wa kushimikila?—Luka 1:74; 1 Kor. 7:16.
3 Abo Tubomba Na Bo: Ukushimikila ubukombe bwa Bufumu takulenga icalo ukutusenamina. Bamo tabapoosako amano ku mulimo wesu. Bambi na bo balapumya umulimo wesu no kutulengulula. Ukulengulula kwa musango yu kuti kwafuma ku bantu tubomba na bo, abena mupalamano, nelyo fye aba mu lupwa. Mu menso yabo pambi tumoneka kwati twaliluba nelyo abawelewele. (Yoh. 15:19; 1 Kor. 1:18, 21; 2 Tim. 3:12) Imilandile yabo iya kufuupula, ya kutunenuna fye pa kuti twibombesha nelyo pa kuti tuleke umulimo wesu uwacindama. Nkashi umo mu Lusaka aletungulula isambililo pa nshita ya kutuusha ku ncito. Ilyo aleasuka icipusho pa lwa cikacitika ku bakafwa pa Armagedone ukubomfya Yeremia 25:33, umwanakashi umo kalengulula uwalebelenga inyunshipepala mwi ofeshi ilyo line aebele nkashi ukuti alebepa fye kabili alealula Baibolo pa kuti yumfwane ne fisambilisho fyesu. Nkashi yesu tafuupwilwe kuli iyi milandile yabipa pa lwa mulimo wesu uwa kushimikila. Umwanakashi uwalelengulula alisumine ukuleta Baibolo wakwe uwa King James Version ubushiku bwali no kukonkapo. Isambililo lya Baibolo lyalitendeke. Ulya walelengulula nomba e nkashi uwabatishiwa uwatemwikwa, te ulya musambi wa kubalilapo.
4 Abana be Sukulu Banensu: Caliseeka ku Nte shacaice ukukonkelesha abanabo pa sukulu no kutiina abacaice bambi ukubaseka nga baleshimikila imbila nsuma. Umupungwe wa Bwina Kristu umo uwa ku United States atile: “Naletiina ukushimikila abacaice bambi epali banseka.” E co taleshimikila abana be sukulu banankwe na banankwe ba mu cifulo alebombela. Kuti mwalundulula shani ubukose bwa kukanakonkelesha bambi? Tetekeleni muli Yehova, pa kutila amusenamine. (Amapi. 29:25) Katamikeni amaka mwakwata aya kubomfya Icebo ca kwa Lesa mu butumikishi bwenu. (2 Tim. 2:15) Ulya wacaice twacilandapo atendeke ukupepa kuli Yehova, ukumulomba ukuti amwafwe ukulundulula ukufwaya kwa kulanshanya na bana be sukulu banankwe. Atendeke ukushimikila mu lyashi pa sukulu, mwafumine ifisuma, kabili mu kwangufyanya atendeke ukulanshanya na bonse abo aishibe. Asondwelele ukuti: “Balya bacaice balakabila isubilo lya nshita ya ku ntanshi kabili balalifwaisha, kabili Yehova aletubomfya ukubafwa.”
5 Abena Mupalamano: Pambi twalikwata abena mupalamano nelyo abakaaya bambi abalanga ukuti tabatutemwa pa mulandu wa fyo twaba ne fyo twasuminamo. Nga ca kuti mulatiina ifyo batontonkanya, ipusheni ukuti: ‘Bushe balishiba icine icitungulula ku mweo wa muyayaya? Cinshi ningacita ku kubafika pa mitima?’ Kangalila wa muputule umo atile mulafuma ubusuma nga tuleshimikila abena mupalamano lyonse lelo tulelanda fye utu fyebo tunono. Paapaateni Yehova ukuti amupe amaka na mano ku kutwalilila ukufwayafwaya abafumacumi.—Fil. 4:13.
6 Ukucimba ku baletulwisha kuti kwabatemuna, lelo bushe ukucite co kuti kwabaletela ubusuma—nelyo ukutuletela ubusuma? Abantu baali mu mushi wa kwa Yesu balemulwisha. Ashipikishe ne milandile yabipa iya bamunyina. Lelo alishibe ukutila kuti abaafwa nga atwalilila ukukonka inshila Lesa amwimikile. E co, Yesu ‘ashipikishe conse ici ku fikansa fya babembu ifya pali wene.’ (Heb. 12:2, 3) Tufwile ukucita cimo cine. Pampamineni pa kubomfya bwino ishuko lyenu ilya kushimikila ubukombe bwa Bufumu. Pa kucite co, ‘mukaipususha mwe bene na balemuumfwa.’—1 Tim. 4:16.