Citeni Ubunte pa Kuba Umwina Mupalamano Musuma
1 Yesu atile “uletemwo mubiyo nga we mwine.” (Mat. 22:39) Ukwabula no kutwishika ‘mubombe cisuma’ ku basumina banenu, lelo bushe te kuti mutemwe na bena mupalamano benu? (Gal. 6:10) Mu nshila nshi?
2 Pa Kuilondolola: Bushe abena mupalamano benu balishiba ukuti muli Nte? Nga tabaishiba, mulandu nshi mushingabatandalila ilyo muli mu mulimo wa mwi bala? Ifingafumamo kuti fyamupapusha! Nelyo nga kuti camwangukilako, bashimikileni ubunte bwa mu lyashi. Ilyo muli pa nse, pambi kuti mwabamona baleenda mu lubansa lwabo nelyo baleleshako icitendwe mu musebo. Mwentuleni ilyo mwatendeka ukulanshanya nabo. Esheni ukulanda pa fyo mwasuminamo, ukwabela Ing’anda ya Bufumu, ne ficitika kulya, kabili bebeni bonse aba mu bwina mupalamano abalongana. Balaalikeni ukusangwa ku kulongana. Pampamineni pa kushimikisha imbila nsuma kuli bonse abo mwaishiba.—Imil. 10:42; 28:23.
3 Ku ca Kumwenako Cenu Icisuma: Ukuba na bucibusa kuti kwasokolola ifingi pali imwe no kumupeela ishuko lya kucita ubunte. ‘Kupulamika ne sambilisho lya kwa Lesa.’ (Tito 2:7, 10) Angweni mu kufumaluka ku bena mupalamano benu. Beni aba bucibusa kabili aba cikuuku. Mwilabapumfyanya nelyo ukukafya icongo. Nga ca kuti umo alwala, balangulukileniko no kubafwa. Nga ca kuti ulupwa lwakuukila mu ncende mwikala, batandalileni ku kubapokelela. Incitilo sha musango yu isha cikuuku shisuma kabili shilatemuna Yehova.—Heb. 13:16.
4 Ku Mimonekele ya Fikwatwa Fyenu: Ukuba umwina mupalamano musuma kusanshamo ukusakamana ing’anda yenu pa kuti ilemoneka bwino. Ing’anda no lubansa ifya busaka kabili ifimoneka bwino filacitilo bunte. Lelo ing’anda yafiko nelyo apo bapoosaike ifinkolonkolo te kuti pa cebushe abantu ku bukombe bwa Bufumu. E ico, calicindama sana ukusunga bwino kabili busaka busaka ing’anda yenu, ulubansa, na bamotoka.
5 Ukwangwa ku bashaba mu cilonganino ca Bwina Kristu kulangilila ukuti mwalitemwa abena mupalamano benu. Finshi fingafumamo? Bamo kuti ‘bacindika Lesa pa kuloleshe milimo yenu isuma.’—1 Pet. 2:12.