Bushe Mulalya Bwino lwa ku Mupashi?

¹ Batila, ‘umubili waba ku kuboko.’ Cine cine, imiliile yesu ilakuma ubukose bwesu no bumi bwine. Apo Yesu atile: “Te ku cilyo ceka umuntu ekalila no mweo, lelo ku cebo conse icifuma ku kanwa ka kwa Lesa,” imiliile yesu iya ku mupashi nayo ilalenga twawaminako nelyo ukubipilako. (Mat. 4:4) E co, bushe mulalya bwino lwa ku mupashi? Bushe mwaba no musoobolola pa kulya? Bushe mulya lubilo lubilo? Nelyo bushe mufwaya ukupoosako inshita ya kuipakisha lyonse ifya kulya fya ku mupashi ifisuma kabili ifya mulyo?

² Pitulukeni mu Miliile Yenu: Yehova alateyanya “ifya kulya mu nshita iyene” no “mutebeto wa fya mafuta,” ukupitila mu “musha wa cishinka kabili uwashilimuka.” (Mat. 24:45; Esa. 25:6) Pa kuipakisha sana ifi atuteyanishisha, tufwile ukupoosako amano ku kulya bwino lwa ku mupashi.

³ Napamo kuti mwaipusha ati: ‘Bushe ndabelenga ilembo lya bushiku na mashiwi yalelanda pe lembo lya ubo bushiku? Bushe cila bushiku ndabelenga no kwetetula pa fya mu Baibolo? Bushe ndapekanya ukulongana kwa cilonganino, e kuti ukubelengela libela ifyo tuli no kusambilila? Bushe nalipwisha ukubelenga impapulo shafuma nomba line, ukusanshako ne fitabo fyonse fibili ifya ‘Ukusesema kwa kwa Esaya—Ulubuuto lwa Bantu Bonse?’

⁴ Yesu alaile ati: “Ba nsansa abaibukila ukuti balakabila ifya ku mupashi . . . Ba nsansa abomfwe nsala ne cilaka ca bulungami, pantu bakekuta.” (Mat. 5:3, 6, NW) E co akulyeni bwino lwa ku mupashi, bikeni ukwishiba Lesa mu mitontonkanya yenu ne mitima.