Ukushimikila pa lwa Bufumu Kulaafwa Ukupususha Abantu!

¹ Pali ndakai e mulimo wacindamisha uulebombwa mu calo conse. Yehova Lesa, Yesu Kristu, ne mintapendwa ya bamalaika balyangwa sana uyu mulimo. Bushe uyu wine mulimo nshi, kabili cinshi wacindamina? Mulimo wa kushimikila pa lwa Bufumu, kabili ulaafwa ukupususha abantu!—Rom. 1:16; 10:13, 14.

² Abantu bamo batontonkanya ukuti kuti twayafwa sana bambi nga ca kutila twaesha ukuwamya icalo. Abengi baobelwa ne milimo ya kufwaya ukuleta umutende, ukuundapa amalwele, nelyo ukupakamisha ubunonshi. Lelo bushe mulimo nshi ukaafwa sana abantu?

³ Umulimo Wacindamisha: Ubukombe bwa Bufumu bweka fye e bulondolola ico ubumi bwabelako, icalenga abantu ukucula, ne subilo line line limo fye ilya nshita ya ku ntanshi. Imbila nsuma ilenga abantu baba ifibusa fya kwa Yehova no kupokelelo “mutende wa kwa Lesa uwapulamo mu kwiluka konse.” (Fil. 4:7) Bukombe fye bwa Bufumu bweka e bupeela abantu ubutungulushi bwingabafwa ukushipikisha amafya pali ndakai no kulondolola ifya kwisapusuka ilyo icalo cibifi cikonaulwa. (1 Yoh. 2:17) Bushe uyo tauli mulandu ukalamba uo tulingile ukubombesha mu mulimo wa kushimikila pa lwa Bufumu?

⁴ Ukulangilila: Ni nshila nshi iisuma iya kupusushishamo abekala mushi abali mutulo kabili abashishibe ubusanso bwalaswa bucitike ku mulandu wa cishiba ca menshi icili mupepi no kupongoka? Bushe kufumya amenshi yamo muli ico cishiba? Bushe kuyemfya umushi walaswa onaulwe? Iyo! Icilekabilwa kushibusha abekala mushi, ukubasoka ku busanso bwalaswa bucitike, no kubaafwa ukufulumuka! Bonse abali mutulo twa ku mupashi pali lelo bali mu busanso bwine bwine. (Luka 21:34-36) Apo buno bwikashi buli no kupita nomba line, natweshe ukuba abapamfiwa pa kushimikila kuli bonse abo twingashimikila!—2 Tim. 4:2; 2 Pet. 3:11, 12.

⁵ Twalilileni Muli uyu Mulimo: Natufwaye inshila sha kushimikilamo imbila nsuma ku bantu abengi abafumacumi—pa mayanda yabo, mu misebo, pali lamya, na mu lyashi. Umulimo Yehova atupeela e mulimo wacindamisha uo twingabomba. Nga twaubomba mu kupimpa, ‘tukaipususha fwe bene na baletumfwa.’—1 Tim. 4:16.