Mu Kutemwa Angweni ku “Nshiwa”
1 Yehova ni “shibo wa nshiwa.” (Amalu. 68:5) Mwi funde apeele uluko lwa pa kale ulwa Israele e mo tusanga ifyo ayangwa inshiwa, atile: “Mukamfwilwa onse, no mwana wa nshiwa, mwikamucusha. Ukucusha nga wamucusha, na o ukulila nga andilila, cine cine nkomfwa ukulilila kwakwe.” (Ukufu. 22:22, 23) Ifunde lya kwa Lesa na kabili lyatantike ukwafwilisha abana ba nshiwa mu fyo balekabila lwa ku mubili. (Amala. 24:19-21) Mu kutantika kwa Bwina Kristu, bakapepa ba cine bacincishiwa “ukupempule nshiwa na bamukamfwilwa mu kucula kwabo.” (Yako. 1:27) Kuti twapashanya shani Yehova mu kwangwa ku bakulila mu ndupwa sha mufyashi umushimbe nelyo mu ndupwa sha kuti abafyashi bapepa ukwapusana?
2 Ukukansha kwa ku Mupashi: Ukutungulula isambililo lya Baibolo ilya mu ng’anda ilya lyonse na bana benu nakalimo kuti bwaba bwafya nga ca kuti muli bafyashi bashimbe nelyo mwaba no mwina mwenu uushatetekela. Lelo isambililo lya Baibolo ilya lyonse kabili ilyafikapo lyalicindama nga bana bengakula abashikatala, abakosoka. (Amapi. 22:6) Ukulanshanya na bo ifya ku mupashi cila bushiku na ko kwalicindama. (Amala. 6:6-9) Inshita shimo, nakalimo kuti mwafuupulwa, lelo mwitompoka. Ipusheni Yehova ukumukosha no kumutungulula ilyo ‘mulelela [abana benu] mu kufunda no kukonkomesha kwa kwa Shikulu.’—Efes. 6:4.
3 Ishibisheni baeluda nga mulekabila ubwafwilisho bwa kusakamana imilimo yenu iya mu Malembo. Kuti bamupeela imitubululo isuma nelyo ukumwafwilisha ukutantika bwino programu wa fya ku mupashi uwa lupwa lwenu.
4 Ifyo Bambi Bengafwilisha: Mu mwanda wa myaka uwa kubalilapo, Timote ali mubomfi wapimpa uwa kwa Yehova te mulandu no kukulila mu ng’anda umo wishi alepepa kumbi. Ukubombesha kwa kwa nyina na nakulu ukumusambilisha amalembo ya mushilo ku bwaice ukwabula ukutwishika e kwamwafwile sana. (Imil. 16:1, 2; 2 Tim. 1:5; 3:15) Lelo, alinonkelemo na mu kubishanya na Bena Kristu bambi, pamo no mutumwa Paulo, uwalandile pali Timote ukuti ‘mwana wakwe uwatemwikwa kabili uwa cishinka muli Shikulu.’—1 Kor. 4:17.
5 Na lelo, cilanonsha ilyo bamunyina na bankashi abakosoka lwa ku mupashi mu kutemwa baleangwa ku nshiwa mu cilonganino! Bushe mwalibeshiba bonse amashina? Bushe mulalanda na bo pa kulongana kwa Bwina Kristu na pa nshita shimbi? Balaalikeni ukubomba na imwe mu butumikishi bwa mwi bala. Nakalimo inshita shimo shimo kuti mulebasanshamo pamo pene na bafyashi babo abashimbe nelyo abatetekela, mwi sambililo lya lupwa lwenu nelyo mu kukokoloka kusuma. Lintu aba abacaice bamona ukuti muli fibusa fyabo, napamo bakapashanya ica kumwenako cenu kabili bakapokelela ukukoselesha kwenu.—Fil. 2:4.
6 Yehova alyangwa sana inshiwa, kabili alapaala ukubombesha kwesu ukwa kutemwa ukwa kubafwa ukutwalilila mu cine. E fyo na bengi abakulile mu mayanda ya bafyashi abashimbe nelyo mu ya-akanikana bakoseleshiwe kabili nomba balebomba mu busumino nga bapainiya, ababomfi batumikila, baeluda, bakangalila benda, bamishonari, nelyo ukuba mu lupwa lwa Bethel. Shi ifwe bonse natufwaye inshila sha ‘kukusha imitima’ yesu mu kuba ne cikuku ku nshiwa, ukupashanya Shifwe wa mu muulu.—2 Kor. 6:11-13.