Bushe Kuti Mwasuminisha Ing’anda Yenu Ukubomfiwa?

¹ Mu myaka ya kutendeka kwa buKristu, Abena Kristu abengi baleitemenwa ukuti amayanda yabo yalebomfiwa ku kulongana kwa cilonganino. (1 Kor. 16:19; Kol. 4:15; File. 1, 2) Mu filonganino fimo lelo, takwaba ififulo ifingi ukwa kulonganina Isambililo lya Citabo pa Cilonganino no kwa kukumanina pa kuya mu mulimo wa mwi bala. Ici kuti calenga amabumba yamo aye sambililo lya citabo yaba na bantu 30 nelyo ukucilapo, ne ci calicila sana pa mpendwa ifwaikwa iya muli ba 15.

² Ishuko Lishaiwamina: Bushe mwalitontonkanya pa lwa kusuminisha ing’anda yenu ukuti ilebomfiwa kwi Sambililo lya Citabo pa Cilonganino? Umuputule walinga ubukalamba, umwaba ulubuuto lwalinga, kabili uupisha umwela bwino e wingalinga ukubomfya. Apo isambililo lya citabo lyaba kulongana kwa cilonganino kabili lyaba mu kutantika kwa kwa Yehova ukwa kufunda abantu bakwe, ukukwata isambililo lya citabo mu mwenu lishuko lishaiwamina. Abengi bashimika ukuti balinonkelamo nga nshi lwa ku mupashi ukupitila mu kusuminisha amayanda yabo muli yi nshila.

³ Nga mulemona ukuti ing’anda yenu kuti yalinga, mukwai kuti mwaishibisha baeluda. Napamo kuti balefwaya amayanda na yambi. Nga mu mwenu te kuti mube isambililo lya citabo, bushe ukukumana kwa kuya mu mulimo wa mwi bala kuti kulecitilwamo? Nangu ca kuti pali ino nshita napamo takuli kukabila, baeluda kuti batemwa nga nshi ukwishiba ukuti ing’anda yenu kuti yabomfiwa. Napamo ku ntanshi kuti yabomfiwa.

⁴ Ukulanga Imisango Isuma: Pa kulongana pa ng’anda ya kwa munyinefwe, bonse abasangilweko balingile ukucindika ifipe fya mwine. Abafyashi bafwile ukushininkisha ukuti abana babo tabeele ku ncende abene bakaanya, ukukanaingila uko bashilingile ukwingila. Na kabili mufwile ukulangulukilako abena mupalamano, ukusakamana pa kuti tamulebapumfyanya icipumfyanyepumfyanye.—2 Kor. 6:3, 4; 1 Pet. 2:12.

⁵ Ilembo lya AbaHebere 13:16 litukoselesha ukukanalaba “ukucita icisuma no kupeelana ifintu, pantu amalambo aya musango yu e yateemuna Lesa.” Ukusuminisha ing’anda yenu ukuti ilebomfiwa ku kulongana kwa cilonganino ni nshila ishaiwamina iya kupeelelamo bambi ifisuma no ‘kucindika Yehova ku fyuma fyenu.’—Amapi. 3:9.