Yehova Awamino Kutashiwa Apakalamba
Icibukisho ca Mulalilo wa kwa Shikulu Cikaba pa April 16
1 Tulefwaisha ukusangwa ku Cibukisho ilyo April 16, 2003 ilepalama. Pali ubu bushiku tukebukisha imfwa ya kwa Yesu, tukailunda ku mintapendwa ya bakapepa banensu mwi sonde lyonse ku kucindika ishina lya kwa Yehova. Yehova alilinga ukutasha pa kupayanya kushaiwamina ukwa cilubula. Muli cene e mo akapeelela abantu bacumfwila amapaalo yashaiwamina. E co ne mitima yesu yonse tuleilunda kuli kemba wa malumbo no kulandila pamo ukuti: “Yehova mukulu, kabili awamino kutashiwa apakalamba.”—Amalu. 145:3.
2 Ino ni nshita ya kutontonkanya pa busuma bwa kwa Lesa ne misha twakwata kuli Yehova iya kumutasha pa fyo atumine “Umwana wakwe uwafyalwa eka ukwisa pano calo ukuti tube no bumi muli wene.” (1 Yoh. 4:9, 10) Ukwibukisha Umulalilo wa kwa Shikulu kulenga imitima yesu ukwishiba ukuti “Yehova untu asenamina kabili wa nkumbu . . . kabili wa luse lukalamba.” (Amalu. 145:8) Cine cine, icilubula e cintu cakulisha ico Yehova alangilako ukuti alitemwa abantunse bonse. (Yohane 3:16) Ukutontonkanya pa kutemwa kwa kwa Lesa na bumpomfu bwa cishinka ubwa kwa Yesu kutulenga ukutasha Yehova. Tukamutasha ku ciyayaya conse pa kutemwa kwakwe ukukalamba uko alangile pa kulenga twaba ne subilo lya mweo wa muyayaya.—Amalu. 145:1, 2.
3 Afweni Bambi Ukutasha Yehova:
Ukutasha kwesu kuli Lesa pa bupe bushaikulila ubwa cilubula kutulenga ukulaalikako bambi pa kuti nabo bailunda kuli ifwe mu kutasha Yehova. Kemba wa malumbo apuutilwemo ukulemba ukuti: “Iciibukisho ca bwingi bwa busuma bwenu bakacipongolola, no bulungami bwenu bakabwawilo tupundu.” (Amalu. 145:7) Mu mwaka wapwile weka fye, Inte sha kwa Yehova mwi sonde lyonse babombele umulimo wa kushimikila pa maawala ukucila bilioni umo. Cinshi catumbwike mu kubombesha kwabo? Cila mulungu, abantu ukucila pali 5,100 pali avareji balebatishiwa ku kulanga ukuipeela kwabo kuli Yehova. Apo abasangilwe ku Cibukisho bali 15,597,746, kabili abantu ukucila amamilioni 9 pali aba tabalatendeka ukutasha Yehova nga bakasabankanya ba mbila nsuma, kuli isubilo lya kuti kukaba ukulunduluka! Apo tuli bakabila ba Bufumu, tulateesa ishuko lya kushimikila imbila nsuma no kwalwila imitima ya bambi kuli Yehova, ku Mwana wakwe, na ku Bufumu.
4 Inshila isuma iya kukoseleseshamo bambi ukucindika Yehova kubalaalika bakabe pamo na ifwe pa kusefya Umulalilo wa kwa Shikulu. Bushe mwalilemba amashina ya bonse abo mulefwaya ukulaalika na balya bambi abengafwaya ukucinkulwako ubushiku ne nshita? Bushe mwalilaalika bonse abo mwalemba amashina? Nga tamulacita ifyo, bombesheni ukubalaalika iyi ine nshita isheleko. Bafweni ukumfwikisha ico kwabela Icibukisho. Pa Cibukisho, mwilaba ukuposha abeni. Balengeni bayumfwe ukuti namubasengela, beshibisheni kuli bambi, kabili batasheni pa kusangwako.
5 Ukusangwa ku Cibukisho kuti kwalenga abapya ukulunduluka lwa ku mupashi. Umusambi wa Baibolo uwalecushiwa ku mulandu wa fyacitike kale, ifyamulengele no kuti alefilwa ukuya ukuli abantu abengi, aishile ku Cibukisho. Ilyo bamwipwishe pa fyo aletontonkanya pali kulya kulongana, atile: “Bwali bushiku bwashila sana, kabili na ine nalisangilweko.” Ukutula bulya bwine bushiku, alasangwa ku kulongana konse.
6 Pa Numa ya Cibukisho: Cinshi cingacitwa ku kwaafwa abalefwaya ukusambilila pa kuti bakaletasha Yehova? Baeluda bakangwa abapya abakasangwa ku Cibukisho no kuteyanya ukuti bakasabankanya bafikapo bakabatandalile mu kwangufyanya pa numa ya Cibukisho ku kuyapitulukamo na bo mu fintu fya kupembesula ifyo basambilile no kumona. Bamo kuti bafwaya isambililo lya Baibolo pa ng’anda. Kabili bafwile ukulaalikwa no kusangwa ku kulongana kwa cilonganino konse ukwa cila mulungu, pantu ukusangwako lyonse kuti kwalenga baishibilapo na fimbi pali Baibolo.
7 Kuli amateyanyo ya kukoselesha bonse bamanshintula na banaka ukusangwa ku kulongana lyonse. Nga ca kuti baeluda bamweba ukuti muleyafwa umo uwanaka pa kuti engatendeka na kabili ukubombako umulimo wa mwi bala, itemenweni ukucite co. Uku kusakamana aba bwananyina kulomfwana no kukonkomesha kwa kwa Paulo ukutila: “Lyonse ilyo twaba ne nshita yalinga, tubombe icisuma kuli bonse, lelo maka maka ku ba bwananyina mu citetekelo.”—Gal. 6:10.
8 Shi bonse natubombeshe ukusangwa ku Cibukisho pa April 16. Te kuti tufwaye ukupuswa kuli iyi nshita yashila iyo tutashishapo Yehova. Cine cine, pali nomba na ku ciyayaya conse, natuletasha Yehova pa milimo yakwe iikalamba!—Amalu. 145:21.