Programu Mupya uwa Bushiku bwa Kulongana Kwaibela

Kwaba ifyebo ifingi lelo ifilanda pa kusunga umutima wa cine cine uutuntulu pa kuti tube no bumi busuma kabili ubwalepako. Imibele ya mutima wesu uwa mampalanya yacilapo ukucindama. Kanshi, naulinga sana umutwe wa programu wa bushiku bwa kulongana kwaibela ukukatendeka mu September 2003 uuleti: “Ukubombela Yehova no Mutima wa Cishinka.” (1 Imila. 28:9) Finshi twingenekela ukusambililako?

Kangalila wa muputule akalanda ilyashi lileti “Ukwafwa Bambi Ukubombela Yehova no Mweo wa Kuitemenwa.” Ukulanshanya kwa kwipusha kukalanga ukusekelela kufuma mu kukonkelela abalesekelela no kutungulula amasambililo ya Baibolo ku balefwaya ukubombela Yehova. Bonse bafwile bakasansamushiwa no kukoseleshiwa ku lyashi lya kubalilapo ilya kwa kalanda umutandashi ilikalati, “Ukubaka Imitima Yesu mu Calo ca Mafya.” Ukulongana kwa lucelo kukasondwelela ne lyashi lya lubatisho.

Icungulo, ilyashi lya kuti “Ukwafwilisha Bambi” likalanda pa fyo twingafwa bambi. Cinshi abafyashi bengacita ku kucingilila imitima ya bana babo ku kusongwa no kubafwa ukupalama kuli Yehova? Ilyashi lya kuti “Afweni Abana Benu Ukubekelwa Muli Yehova” likabamo imitubululo ingabomba no kulanga ifyo ici cingacitwa.

Bushe tuleshukila fyonse ifyo Yehova apekanya ku kusungilila imitima yesu iya mampalanya iituntulu kabili iyakosa? Ilyashi lya kulekelesha ilya kwa kalanda umutandashi likalati, “Bakeni Umutima wa Cishinka mu Kubombela Yehova,” kabili likalanda sana pa fintu fine ifikabilwa sana pa kusungilila bumupashi bwesu. Bushe tulalubula inshita ikalamba no kuibikilishako ku kupepa ipepo lya mukoosha, ukusambilila Icebo ca kwa Lesa, ukushimikila mu kupimpa, no kubishanya na Bena Kristu bambi? Bushe kuti twawamyako mu kucite fyo?

Yehova atulaalika ati: “Twalo mutima obe ku kusalapulwa, na matwi yobe ku mashiwi ya kwishiba.” (Amapi. 23:12) Pekanyeni nomba ukusangwa kuli ubu bushiku bwa kufunda kwa mu Malembo. Ukusangwako kukamukosha ukutwalilila ukubombela Yehova no mutima wa cishinka no mweo wa kuitemenwa.