Mwe Misepela—Ikuulileni Umufula Usuma uwa ku Ntanshi
1. Mulandu nshi imisepela ya Bwina Kristu ikabila ukulundulula icitetekelo cakosa?
1 Cinshi cacindama sana mu matontonkanyo yobe? Cinshi utontonkanyapo? Bushe ifyo wayangwako sana fya pali ino nshita, nelyo fya ku ntanshi no kutonta pa fyo Lesa alaya? (Mat. 6:24, 31-33; Luka 8:14) Icitetekelo cakosa cilafwaikwa pa kubombela pa fyo Lesa alaya, nga fintu twingamona ku fyacitile Abrahamu na Mose. (Heb. 11:8-10, 24-26) Bushe kuti walundulula shani icitetekelo ca musango yo no kukuula “umufula usuma uwa ku ntanshi”?—1 Tim. 6:19.
2. Cinshi tusambilila ku fyacitile Imfumu Yoshia?
2 Fwaya Yehova: Nga mwalitantika ifya kucita ifya ku mupashi no lupwa lwenu, ninshi cisuma sana. Lelo witila uko kutantika ukwine kweka kukalenga ukabe ne citetekelo cakosa. Pa kusanga “ukwishiba Lesa,” ufwile pa lobe ukufwaya Yehova. (Amapi. 2:3-5; 1 Imila. 28:9) Imfumu yacaice Yoshia e fyo yacitile. Te mulandu no kukulila mu ng’anda umushali ifya bumupashi, “atendeke ukufwaya Lesa wa kwa wishi Davidi” ilyo aali ne myaka 15.—2 Imila. 34:3.
3. Bushe Abena Kristu bacaice lelo kuti bafwaya shani Yehova?
3 Kuti wafwaya shani Yehova? Ni pa kubebetesha ifyo watetekela no ‘kushininkisha we mwine’ ukuti kwena e cine. (Rom. 12:2) Ku ca kumwenako, bushe kuti walondolola ifyo Baibolo isosa pa lwa mulopa nelyo ukushininkisha ukuti Ubufumu bwa kwa Lesa bwatendeke ukuteka mu muulu mu 1914? “Ukwishiba bwino bwino icine” kwalicindama ku kukuula umufula usuma uwa ku ntanshi.—1 Tim. 2:3, 4.
4. Bushe bakasabankanya bashabatishiwa kuti balenga shani ukulunduluka kwabo ukumoneka?
4 Ukufwaya Lesa ukwa kwa Yoshia kwaliletele ifisuma. Ilyo ashilafika pa myaka ya bukulu 20, alibombele no bukose no kufumya ukupepa kwa bufi mu calo. (2 Imila. 34:3-7) Ukulunduluka kobe na iwe, kukamonekela mu micitile yobe. (1 Tim. 4:15) Nga uli kasabankanya ushabatishiwa, tukuta ukuwamyako ubutumikishi bobe. Witila nga washalika fye impapulo ninshi capwa. Imika ubuyo bwa kubelengako Baibolo, ukupelulula na bantu, no kutwalilila ukulanshanya na balefwaya ukwishiba. (Rom. 12:7) Ici cikakwafwa ukukula lwa ku mupashi.
5. Mashuko nshi aya kulundulula ubutumikishi yengakwata Abena Kristu babatishiwa?
5 Peela Yehova Ifyawamisha: Ilyo waishibisha ukuipeela kobe kuli Yehova ukupitila mu lubatisho, uba umutumikishi wabishiwa uwa kwa Lesa. (2 Kor. 3:5, 6) Ici cilenga waba na mashuko ya kubombela Yehova inshita yonse. Kuti wabomba bupainiya nelyo pa Bethel, bumishonari, atemwa ukubomba umulimo wa nshita yonse mu fyalo fimbi. Bamunyina abashimbe abali babomfi batumikila nelyo baeluda kuti baipusha ukusangwa kwi Sukulu lya Kukansha Ilya Butumikishi. Inshila shimbi wingalundulwilamo ubutumikishi kusambilila ululimi lumbi nelyo ukukuukila ukwaba ukukabila kukalamba.
6. Bushe ifwe bonse kuti twakuula shani umufula usuma uwa ku ntanshi?
6 Kwena, te bonse bengabomba iyi milimo, lelo ifwe umo umo kuti twapeela Yehova ifyawamisha. (Mat. 22:37) Te mulandu ne fyo ifintu fyaba mu mikalile yobe, lenga ukubombela Yehova ukuba e cintu cikalamba mu bumi bobe. (Amalu. 16:5) Nga wacite fyo, ukaikuulila umufula usuma uwa ku ntanshi.