Ulubali 1—Ukutungulula Amasambililo ya Baibolo Ayalunduluka

Isambililo lya Baibolo Cinshi?

¹ Mwi sonde lyonse, amasambililo ya Baibolo mupepi na mamilioni 6 e yo abantu ba kwa Lesa batungulula cila mweshi. Nga tulesambilisha bwino, kuti twaafwa aba basambi ba Baibolo ukulunduluka ukufika ku kuipeela no kubatishiwa no ‘kufikapo bwino bwino ku kusambilisha bambi.’ (2 Tim. 2:2) Bushe kuti mwatemwa ukwafwa umusambi wenu ukulunduluka nge fi? Ukutampa muli buno Ubutumikishi Bwesu Ubwa Bufumu, mwakulaba ifipande ifikakonkana ifikalalondolola ifyo twingacita pa kutungulula isambililo lya Baibolo ililunduluka.

² Ilyo Mufwile Ukucita Lipoti Isambililo lya Baibolo: Nga ca kutila mulalanshanya lyonse Baibolo kabili mwalitantika bwino, nangu fye maminiti ayanono, kabili musambilila Baibolo ukubomfya ulupapulo twaebwa, ninshi mutungulula isambililo lya Baibolo. Ifi e fyaba isambililo lya Baibolo, nangu ca kuti pa kusambilila no yo muntu mwiminina fye pa mwinshi nelyo mubomfya foni. Kuti mwacita lipoti isambililo nga ca kuti mwatungulula imiku ibili ukutula apo mwalangile uyo muntu ifyo isambililo litungululwa kabili namumona ukutila ili sambililo likatwalilila.

³ Broshuwa wa Cintu Lesa Afwaya ne citabo ca Ukwishiba e mpapulo shibomfiwa ukutungulwilamo amasambililo ya Baibolo ayengi. Nga ca kuti umusambi apwisha ishi mpapulo shonse, kabili namumona ukuti uyo muntu alelunduluka, nangula ni panono, kabili alemona ubusuma bwa fyo alesambilila kabili alefibomfya, lyena isambililo kuti lyatwalilila mu citabo ca Pepeni. Broshuwa wa Kuti Mwaba Cibusa wa kwa Lesa! kuti abomfiwa ukusambililamo na bantu abashafika apatali mu masomo ya ku mubili nelyo abashaishibisha ukubelenga.

⁴ Umulimo wa kusambilisha Baibolo walyafwa abantu abengi ukuba abasambi ba cine aba kwa Yesu Kristu. (Mat. 28:19, 20) Kuti mwatungulula isambililo lya Baibolo ililunduluka pa kubomfya imitubululo iikaba mu fipande fikakonkapo muli uku kukonkana.