Umukululo Wa Mepusho

◼ Bushe tufwile ukupoka shani bamagazini besu aba Loleni! na ba Ulupungu lwa kwa Kalinda?

Apo twalileka ukulembesha bamagazini ba Ulupungu lwa kwa Kalinda na ba Loleni! abapulintwa e lyo na ba pa matepu mu ndimi shonse, bakasabankanya bonse bafwile ukupoka bamagazini babo mu cilonganino balongana. Ifyo mwingalembesha fye ni bamagazini bampofu e lyo na ba pa matepu, abatumwa ukwabulo ukulipilisha kuli balya abasuminishiwa ukupokelela. Ifilonganino kuti fyaorda magazini wa pali tepu pali Formu wa Kuordelapo Magazini/Ubutumikishi (M-202). Impapulo sha mu lulimi balanda ku calo cimbi, isha filembo fikalamba e lyo ne sha bankomamatwi na sho shifwile ukuordelwa pali uyu wine formu.

Nga umo mu cifulo mushimikila afwaya ukulamutwalila magazini lyonse, bombesheni ukulamutwalila pa kuti tapushilwe nangu imo. Abatamfiwa kuti bapoka bamagazini ne mpapulo shimbi isha kubelenga abene. Kuti bapokela palya bapeelela bamagazini ne mpapulo pa Ng’anda ya Bufumu. Bakasabankanya tabafwile ukushalika magazini ku batamfiwa.

Abo amaofeshi ya Nte sha kwa Yehova bengasuminisha ukulembesha magazini ni balya abo bakasabankanya ba mu cilonganino teti batwalile magazini. Nga ca kuti Komiti wa Mulimo uwa Cilonganino alomba ukuti umuntu umo bamulembeseshe magazini apo takuli inshila imbi engapokelamo magazini, kalemba afwile ukulemba kalata umwipi ukulondolola ati uku kulembesha kwalibebetwa kabili kwalisuminishiwa na Komiti wa Mulimo uwa Cilonganino.

Kanshi bakasabankanya tabafwile ukulembela ku maofeshi ya Nte sha kwa Yehova ukulomba abati balembeshe magazini. Nga ca kuti kasabankanya nelyo uulefwaya ukusambilila alomba ukuti alembeshe magazini, ukulomba kwakwe kukatumwa ku cilonganino abamo.

◼ Bushe umufungwa kuti apokelela shani bamagazini?

Nga ca kuti icilonganino icishimikila pa cifungo kuti catwala bamagazini ku bafungwa baba muli ico cifungo, lyene umufungwa kuti apoka Ulupungu lwa kwa Kalinda na Loleni! kuli bakasabankanya baleisa ku cifungo. Nga ca kuti ici te kuti cicitike, umufungwa kuti alomba ukulembesha bamagazini pa kulembela ku maofeshi ya Nte sha kwa Yehova. Umufungwa uwatamfiwa na o wine kuti alepoka bamagazini ukukonka inshila shalondololwa muli iyi iine paragrafu.