Twalilileni Ukulanda Icebo ca kwa Lesa no Kushipa
1 Fwe Bena Kristu ababila imbila nsuma, twalishiba ukuti te bonse bakutika ilyo tulebashimikila. (Mat. 10:14) Lelo, ico tacilenga twaleka ukubila imbila nsuma ku bantu. (Amapi. 29:25) Cinshi citwafwa ukutwalilila ukulanda icebo ca kwa Lesa no kushipa?
2 Umutumwa Paulo alicindamike “icuma capulamo ica kwishiba Kristu Yesu.” E co alelandila no “kushininwa kwine kwine.” (Fil. 3:8; 1 Tes. 1:5) Nangu ca kutila bamo balemona ubukombe alebila ukuti tabwafikilepo kabili bwali buwelewele, alishibe ukuti bwali “maka ya kwa Lesa aya kupususha onse uwaba ne citetekelo.” (Rom. 1:16) Kanshi, na lintu balemukaanya, atwalilile ‘ukulanda no kushipa ku maka ya kwa Yehova.’—Imil. 14:1-7; 20:18-21, 24.
3 Ukufuma Amaka Yesu: Te ku maka yakwe Paulo aleshimikila abantu no kushipa. Paulo alandile pa mwine na pali Sailasi ilyo alembele ati: “Ilyo twabalile twacula no kusaalulwa mu Filipi, twashipile muli Lesa wesu ku kulanda kuli imwe imbila nsuma ya kwa Lesa no kushomboka nga nshi.” (1 Tes. 2:2; Imil. 16:12, 37) Na kabili ilyo bakakilwe mu Roma, Paulo alombele ukuti bambi bamupepeleko pa kuti atwalilile ukubila imbila nsuma ‘no kushipa ifyo afwile ukulanda.’ (Efes. 6:18-20) Ukucetekela Yehova e kwalengele Paulo atwalilile ukulanda Icebo ca kwa Lesa no kushipa, te kuicetekela iyo.—2 Kor. 4:7; Fil. 4:13.
4 Na lelo line e fyo caba. Munyinefwe umo uwalefilwa ukweba abo alebomba na bo ukuti ni Nte ya kwa Yehova, no kufilwa ukubashimikila alipepele pali uyu mulandu no kutendeka ukushimikila. Umubomfi munankwe pa kubala alikene ukukutika, lelo ilyo uyu Nte alandile pe subilo lya kubuuka, isambililo lya Baibolo lyalitendeke. Ukutule lyo, munyinefwe aleshukila inshita yonse iyamoneka no kushimikila bambi. Pa kampani kambi apo aileingila incito, ayafwile abantu 34 ukubatishiwa mu myaka 14. Kanshi na ifwe Yehova akatukosha pa kuti ‘tulelanda icebo cakwe no kushipa.’—Imil. 4:29.