Langeni Ukuti Mulasakamana Abantu—Pa Kupekanya Ifya Kuyalanda
1 Ukupekanya bwino pa kuya mu mulimo kulatwafwa ukubika amano ku bantu. Kutwafwa shani? Nga natupekanya bwino, tatwakulasakamana ukuti finshi nalalanda, kabili ico kuti calenga twabika sana amano ku mwine wa ng’anda. Kabili kulatwafwa ukupwisha umwenso no kutwafwa ukulanda na bantu mu bufumacumi. Nomba, kuti twapekanya shani bwino ifya kuyalanda mwi bala?
2 Fwayeni Ifyebo Fingalinga: Saleni ifyebo ukufuma mu Ubutumikishi Bwesu Ubwa Bufumu ubwa January 2006 ifingalinga mu cifulo mubombela, kabili moneni ifyo mwingalanda ifyo fyebo mu mashiwi yenu. Landeni ukulingana ne fyo abantu balekabila ukumfwa mu cifulo mubombela. Ku ca kumwenako, nga muleenekela ukusanga abantu abapepa ku calici limo nelyo aba mushobo umo, fwayeni ifyebo bengatemwa ukumfwa. Nga mwalanda ifyebo batemenwe, cikalanga ukuti mulabasakamana.—1 Kor. 9:22.
3 Ilyo mwatendeka ukulanda ifyo mupekenye, twalilileni ukumona ifyo mwingalanda bwino ifyo fyebo. Apo amashiwi ya ntanshi yalicindama, moneni ifyo abantu balecita nga mwalanda ayo mashiwi. Bushe nabatemwa ilyashi mulelandapo? Bushe baleasuka ifipusho muleipusha? Nga tabaleasuka, aluleniko mumo mumo pa kuti mulande ifyo abantu bengatemwa.
4 Ifingamwafwa Ukulaibukisha: Abengi balalaba ifyo bapekenye ukulanda nga bafika pa ng’anda ya muntu. Nga ca kutila na imwe mulalaba, bushe mwalyeshako ukupitulukamo no muntu umbi mu fyo mwalayalanda? Nga mwapitulukamo kuti mwaishiba bwino bwino ifya kulanda kabili kuti mwalanda bwino ica kuti fyaumfwika. Kuti camwafwa no kwishiba ifya kulanda ku bene ba mayanda ukulingana ne fyo baleyasuka.
5 Cimbi icingamwafwa ukulaibukisha, kulemba ifyebo ifinono pa kapepala kabili ilyo tamulafika pa ng’anda kuti mwacebapo pa kuti mwibukishe. Bamo basanga ukuti ukulemba ifyebo muli uyu musango kulabafwa ukuba abakosa ilyo balelanda na bantu e lyo no kulanda bwino. Ifi e fyo ukupekanya bwino kwingatwafwa ukulanga ukutila tulasakamana abantu kabili ici kuti calenga tulebila bwino imbila nsuma.