‘Mulenkonka’
1 Icikalamba ico abantu abengi bafwaisha, kuisekesha abene, lelo nangu baisekesha baba fye aba bulanda. Nomba Yesu ena asambilishe ukuti umuntu nga alefwaya ukuba ne nsansa afwile ukuba umupe. (Imil. 20:35) Atile: “Umuntu nga alefwaya ukunkonka, aikaane . . . alenkonka.” (Marko 8:34) E kutila tafwile fye ukulaipusula fye limo limo ku fintu fimo ifyo atemwa. Cila bushiku tufwile ukulasekesha Yehova, te kulaisekesha fwe bene iyo.—Rom. 14:8; 15:3.
2 Tontonkanyeni pa fyo umutumwa Paulo acitile. Pa mulandu “wa cuma capulamo ica kwishiba Kristu Yesu,” Paulo aliipeeleshe ukulundulula ifya Bufumu ukucila ukulakonkelela ifyo alefwaya ukulacita. (Fil. 3:7, 8) Atile: “Awe ine ndecankwa apakalamba ukubomfya no kubomfiwa icine cine” ukwafwilishako bambi. (2 Kor. 12:15) Cila muntu afwile aipusha ati: ‘Bushe ndebomfya shani inshita yandi, amaka yandi, amano yandi, ne cuma candi? Bushe mfwaisha ukulundulula amapange yandi, nelyo bushe mfwaisha ukusekesha Yehova?’
3 Ilyo Twingapeelako Bambi: Cila mwaka, abantu ba kwa Lesa balabomba amaawala ukucila pali bilioni umo mu mulimo wa kupususha abantu uwa kubila imbila ya Bufumu. Mu cilonganino, abaice na bakalamba balabomba imilimo yalekanalekana iyabelako ukwafwa bambi. Kabili kwaba imilimo na imbi iingi iibombwa pa kupekanya ukulongana kukalamba na pa kukuula e lyo no kusakamana ifikuulwa ifibomfiwa mu kupepa kwa cine. E lyo kabili tontonkanyeni pa kwafwa kwa citemwiko uko bamunyina babomba ababa mu Makomiti ya Kumfwaninamo ne Fipatala na baba mu mabumba ya Bapempula Abalwele ku cipatala. Iyi milimo yonse iyo bambi baipeelesha ukubombako yalicindama nga nshi kuli bamunyinefwe Abena Kristu!—Amalu. 110:3.
4 Kuti twaafwako bambi mu fintu fyalekanalekana nga kwacitika akayofi nelyo fimbi ifyabulo kwenekela. Lelo ilingi line, kuti twamona fye fwe bene ukuti munyinefwe alekabila ubwafwilisho nelyo ukukoselesha. (Amapi. 17:17) Nga ca kutila tuleipeelesha ukwafwako bambi no kulundulula ifya Bufumu, ninshi tulepashanya Yesu. (Fil. 2:5-8) Shi natuleesha na maka ukulacite fyo.