Finshi Mwacindamika Sana?

¹ Bushe kuti mwayasuka shani ici cipusho? Ifwe bonse kwena, kuti twafwaya ukubalilapo ukubomba umulimo wa Bufumu. (Mat. 6:33) Lelo kuti twaipusha ukuti, ‘Bushe ifyo nsala ukucita filalangilila ukuti ndafwaya intanshi Ubufumu?’ Baibolo itukoselesha aiti: “Muleilinga mwe bene.” (2 Kor. 13:5) Bushe kuti twailinga shani fwe bene ukumona nga tulafwaya intanshi Ubufumu?

² Inshita Yesu: Kuti twatendekela pa kubebeta ifyo tupoosa inshita yesu. (Efes. 5:15, 16) Bushe inshita tupoosa mu kwangala, ukutamba TV, iyo tuba pa Internet, nelyo iyo tupoosa ku fintu fimbi ifya kuleseshako icitendwe yaba shani? Nga ca kuti twapenda inshita yonse iyo tupoosa kuli ifi fintu no kuilinganya ku nshita tupoosa ku milimo ya kwa Lesa, kuti twapapa ubupusano bwingabapo. Bushe ku ncito tulabomba amaawala yalundwako pa kuti tulekwata indalama sha kushitamo ifintu fimo ifya kuipakisha no kulaba ku milimo ya kwa Lesa? Bushe pa cibelushi na pa mulungu miku inga tushisangwa ku kulongana nelyo tushibomba umulimo wa kushimikila lelo twatemwa fye ukuya mu kucita ifintu fye fimbi?

³ Balilenipo Ukucita Ifyacindama Sana: Fwe bengi tatwakwata inshita ya kucita fyonse ifyo tufwaya ukucita. E ico, nga tulefwaya ukubalilapo ukubomba imilimo ya Bufumu, tulingile ukwishiba ifyacindama sana e lyo twatantika inshita ya kubomba “ifyacilapo ukucindama.” (Fil. 1:10) Pali ifi paba no kubelenga Icebo ca kwa Lesa, ukushimikila, ukusakamana ulupwa, no kusangwa ku kulongana kwa Bwina Kristu. (Amalu. 1:1, 2; Rom. 10:13, 14; 1 Tim. 5:8; Heb. 10:24, 25) Imilimo imbi, pamo nga ukutukusha umubili ukwalinga no kwangala kusuma, na fyo fyaliba fye bwino. (Marko 6:31; 1 Tim. 4:8) Lelo tatufwile ukubika amano kuli ifi fintu ifishacindama sana.

⁴ Munyinefwe umo umulumendo asalilepo ukubalilapo ukubomba imilimo ya Bufumu, atendeke umulimo wa nshita yonse ukucila ukulundako amasambililo ya kumwafwa ukusanga incito. Asambilile ululimi lumbi no kukukila ukwali ukukabila kukalamba. Atile: “Ndeipakisha nga nshi kuno. Umulimo ulewama sana! Kuti natemwa abalumendo na bakashana ukucita cimo cine no kuipakisha nga fintu ine ndeipakisha. Takwaba icawama ukucila pa kubombela Yehova na fyonse ifyo tukwete.” Ca cine, ukubalilapo ukubombe milimo ya Bufumu kulatuletela amapaalo, lelo icacindamisha ca kuti kulatemuna Shifwe wa ku muulu, Yehova.—Heb. 6:10.