Afweni Bambi Ukuba Ifibusa na Lesa
1 Muno nshiku, abantu ba nko shonse balebasambilisha inshila sha kwa Yehova. (Esa. 2:2, 3) Lelo, aba bantu pa kuti ‘batwale ifisabo mu kushipikisha,’ bafwile ukutemwa Yehova. (Luka 8:15; Marko 12:30) Nga tabakwete uko kutemwa, te kuti bakose ukukaana itunko lya kucita ifyabipa nelyo te kuti babe na maka ya kucita icalungama. Inshila imo iyo twingafwilamo bambi ukuba ifibusa fisuma na Yehova kubalenga baishiba bwino imibele yakwe. Bakoselesheni ukubelenga no kutontonkanya pa fyebo fyaba mu citabo citila Palameni Kuli Yehova.
2 Ica Kumwenako Cenu: Abasambi benu aba Baibolo kuti basambililako fimo kuli imwe nga bamona ifyo mwaba. Ilyo bamona ukuti mwalibikako amano kuli bucibusa bwenu na Yehova kabili nga bamona no kuti ici calilenga mwaba abantu abasuma, nabo kuti batendeka ukufwaya ukuba ifibusa na Lesa. (Luka 6:40) Ca cine, ilingi line bambi balasambilila ku fyo tucita ukucila ku fyo tulanda.
3 Inshila ikalamba iyo abafyashi bengafundilamo abana babo ukutemwa Yehova ca kumwenako cabo. (Amala. 6:4-9) Abafyashi bamo abalefwaya ukukusha abana babo mu cine baipwishe abafyashi abakushapo abana ukuti babapandeko amano. Abalume batile: “Abengi abo naipwishe baleti abafyashi balingile ukuba ne ca kumwenako cisuma epela.” Kanshi, fyonse fye ifyo abafyashi balecita balingile ukwibukisha ukuti abana babo balesambilila fimo kuli bena, kabili ilyo mulecita ici ninshi mulebalangilila umo calola ukuba “cibusa wa kwa Yehova.”—Yako. 2:23.
4 Ipepo lya Kufuma ku Mutima: Na kabili kuti mwayafwa bambi ukuba ifibusa na Yehova nga mulebasambilisha ifya kupepa no mweo onse. Nalimo kuti mwabalanga ipepo lya cilangililo ilya kwa Yesu, na mapepo ayengi aya kufuma ku mutima ayalembwa mu Malembo. (Mat. 6:9, 10) Kuti mwasambilisha abana benu na basambi benu aba Baibolo ifya kupepa ilyo baleumfwa ifyo mulepepa. Nga baumfwa ifyo mulepepa no mweo onse, kuti baishiba ukuti mwalitemwa Yehova. Bakoselesheni ukuba “no mute wa kupepa” ilyo balecula. (Rom. 12:12) Nga baimwena ifyo Yehova abafwa mu nshita ya mafya, bakatendeka ukumucetekela no kumutemwa ukuti ni cibusa wa cine cine.—Amalu. 34:8; Fil. 4:6, 7.