Bushe Mwalikwata Icifulo Cenu Ica Kushimikilamo?
1. Bushe icifulo cenu ica kushimikilamo e cinshi?
1 Icifulo cenu ica kushimikilamo ni cilya bamupeela ukulatandalila abantu baba muli ilya ncende no kulabeba imbila nsuma. Napamo kuti caba mupepi no ko mwikala ica kuti kuti camwangukila ukufikako bwangu kabili kuti mwabomba mweka nelyo kuti mwaeba kasabankanya umbi ukubomba nenu. Nangu ca kutila caliba bwino ukukonka ifyo icilonganino catantika ukubomba ubunte bwe bumba, ukukwata icifulo cenu ica kushimikilamo umwa kubomba inshita imbi kuti kwalenga twashimikisha ubunte, maka maka mu filonganino ifyakwata icifulo ca kushimikilamo icikalamba.—Imil. 10:42.
2. Mulandu nshi cawamina ukukwata icifulo cenu ica kushimikilamo?
2 Umulandu Cawamina Ukukwata Icifulo: Bamo ababomba incito balisanga ubusuma na bumbi ubwa kushimikila mu cifulo cabo icaba mupepi no ko babombela. Bacite fi pa nshita ya kutuusha nelyo ilyo bainuka fye ku ncito. Bambi balaipakisha ukubomba no lupwa, ukushimikila abena mupalamano babo pe awala limo nelyo ukucilapo ilyo tabalaya kwi Sambililo lya Citabo ilya pa Cilonganino. Ne ci calenga belapoosa inshita ikalamba mu kwenda kabili tababomfya indalama ishingi ilyo balepanga ukubwelela ku bantu balandile nabo na ku masambililo ya Baibolo ayaba mu cifulo cabo ico bashimikilamo. Pa mulandu wa kuti fingi mwingabomba mu nshita inono, ukukwata icifulo cenu ica kubombelamo kuti kwalenga bamo ukubomba bupainiya bwa kwafwilisha mu nshita mu nshita nelyo ukulembesha bupainiya bwa nshita yonse. Na kabili, ukubombela mu cifulo cesu ica kushimikilamo no kwishibana bwino na bantu bekalamo kuti kwalenga batucetekela kabili na ifwe kuti kwalenga twaishiba bwino ilyashi bengatemwa ukumfwa, kabili umulimo wesu kuti wawama nga nshi.
3. Bushe painiya umo abombele shani ilyo akwete icifulo ca kushimikilamo?
3 Painiya umo uo kangalila wa muputule akoseleshe ukukwata icifulo ca kubombelamo atila: “Nalyumfwilile ifyo anjebele kabili bwangu bwangu nalishibene bwino na bantu bali mu cifulo bampeele. Nalyalwile inshita nalebatandalila, naleyako inshita batemenwe. Icafuminemo ca kutila nalikwete ifipempu fya kubwelelamo ifingi, ukufuma pali 35 ukufika pali 80 cila mweshi, kabili nalikwata amasambililo ya Baibolo 7.”
4. Kuti mwacita shani nga mulefwaya ukukwata icifulo cenu ica kushimikilamo kabili kuti mwabombelamo shani?
4 Ifyo Mwingakwata Icifulo Cenu: Nga mulefwaya ukukwata icifulo ca kushimikilamo, landeni no mubomfi uupeela ififulo fya kushimikilamo. Ebeni kasabankanya umbi ukubomba nenu, kabili mulelemba na mayanda apo mushisanga abantu. Mufwile ukwesha na maka ukupwisha icifulo cenu mu myeshi ine. Nga ca kuti mwasanga ubwafya bwa kucite fyo, kuti mwaipusha kangalila wenu uwe Sambililo lya Citabo pa Cilonganino nelyo bambi pa kuti bamwafwe. Pa mpela ya myeshi ine, kuti mwaeba umubomfi wa cifulo ukuti namupwisha ukubombelamo nelyo kuti mwalomba ukuti mubombelemo na kabili. Nomba, tamufwile ukulabombela muli ico cifulo pa nshita ntali lelo mufwile ukweba umubomfi upeela ififulo fya kubombelamo lyonse nga mwapwisha umo bamupimina pa kutila bambi nabo baipusha ukubombelamo. Nga ca kuti mwaba mu cilonganino icakwata icifulo ca kubombelamo icinono kabili teti bamupeele icifulo cenu ica kushimikilamo, nalimo kuti mwalanda na kangalila wenu uwe sambililo lya citabo, ukumulomba ukuti amupeeleko ulubali lumo ulwa cifulo ce sambililo lya citabo.
5. Cinshi cikabilwa pa kubomba umulimo wesu uwa kushimikila?
5 Umulimo wesu uwa kushimikila aba “pano isonde ponse” te mulimo wayanguka. (Mat. 24:14) Pa ku-ubomba kano tulebombela pamo. Ilyo tulebomba ubunte bwe bumba, twilalaba no kutantika inshita ya kubombela mu cifulo cesu ica kushimikilamo, ne ci cikalenga tukalande na bantu abengi imbila nsuma.