Bonse mu Cilonganino Kuti Babombako Umulimo wa Kulenga Abasambi Abapya
1 Ukubombesha kwa muntu umo mu cilonganino te kwingalenga ukuti kube umusambi umupya. Yehova kuti abomfya bonse “bakabomba banankwe” ukwafwilisha abasambi ba Baibolo ukulunduluka mu kupepa. (1 Kor. 3:6-9) Ifwe umo umo tulafwilisha abapya ukulunduluka lintu tuleasukapo no mutima wesu onse pa kulongana. Imibele yesu iisuma na yo ilalanga ukutila twalikwata umupashi wa kwa Lesa. (Yoh. 13:35; Gal. 5:22, 23; Efes. 4:22, 23) Finshi fimbi ifyo twingacita pa kutila twafwilishe abapya?
2 Icilonganino: Ifwe bonse kuti twabika amano ku baletendeka ukulongana, kuti twacite ifi nga tuleitendekelako ukubaposha mu nsansa ilyo ukulongana takulatendeka nelyo pa numa ya kulongana. Umwaume umo alebukisha ifyo cali lintu asangilwe ku kulongana umuku wa kubalilapo, atile: “Abantu nasangile ku kuIongana bali no kutemwa kwa cine cine, nshabeshibe kale, lelo mu bushiku fye bumo nalibeshibe ukucila ifyo naishibe abantu nalepepa nabo ku calici uko naleya ukutula ku bwaice. Nalishibe ukuti ici nasanga, e cine.” Ilyo papitile imyeshi 7 pa numa ya kusangwa ku kulongana kwa kubalilapo alibatishiwe.
3 Tasheni umusambi wa Baibolo no mutima wenu onse pa kulunduluka kwakwe. Bushe aletwalilila ukushipikisha lintu balemukanya? Bushe alasangwa ku kulongana lyonse? Bushe alasukapo ukwabula umwenso? Bushe alalandako amalyashi mwi Sukulu lya Butumikishi Ilya Bulesa? Mutasheni pa kulunduluka kwakwe. Nga mwamutasha akomfwa bwino kabili mukamukoselesha.—Amapi. 25:11.
4 Abatungulula Amasambililo ya Baibolo: Bakasabankanya bamo balyafwa abasambi babo aba Baibolo ukwishibana na bambi mu cilonganino. Ifyo bacita balepusha bakasabankanya bambi ukubashindika lintu baya mu kutungulula isambililo. Lintu fye mwatendeka ukusambilila no musambi mwebeni ukutendeka kulongana. Nga aisa ku kulongana, ebeniko bambi ishina lyakwe no kutila musambilia nankwe. Bushe pali icibelesho cimo ico afilwa ukuleka, tutile ukupepa fwaka? Bushe bamo aba pa ng’anda balamukaanya ukusambilila Baibolo? Umusambi limbi kuti aleka ici cibelesho nga alanda na kasabankanya uwali ne cibelesho cimo cine lelo pali ino nshita alileka.—1 Pet. 5:9.
5 Abapya balakabila ukubakoselesha kuli bonse ababa mu cilonganino. Bonse kuti baafwa abapya ukulunduluka nga balebabikako amano.