Ifyo Twingatendeka Ukusambilila Baibolo na Bantu Tutwalila Bamagazini
1. Mulandu nshi tushila abantu bamagazini?
1 Ilingi line ilyo tuya mu mulimo wa mwi bala pa Cibelushi e lyo tushila abantu bamagazini ba Ulupungu lwa kwa Kalinda na Loleni! Nangu cibe ifyo, iyi te nshila fye yeka iyo tubomfya ukusambilisha abalefwaya ukusambilila icine. Kuti twabomfya ifi fyebo fyakonkapo pa kushalika icitabo ca Ico Baibolo Isambilisha lintu twaya ku cipempu ca kubelelamo no kutendeka isambililo lya Baibolo. Kuti mwayalula ifi fyebo pa kutila abantu bekala mu cifulo mubombela batemwa ukumfwa imbila nsuma. Kuti mwabomfya ifyo mupekenye nga mwasanga ukutila e fingabomba bwino sana.
2. Kuti twabomfya shani ifyaba pa mabula ya kutendekelako mu citabo ca Ico Baibolo Isambilisha ukutendeka isambililo lya Baibolo?
2 Bomfyeni Amabula ya Kutendekelako: Ilyo mwabwelelako kuti mwatila: “Bamagazini namushilile balanda pali Baibolo. Moneni umulandu ukubenga Baibolo kwacindamina.” Belengeni Esaya 48:17, 18; Yohane 17:3; nelyo ilembo limbi ilingalinga. Lyena pa numa ya kulanga umwine wa ng’anda icitabo ca Ico Baibolo Isambilisha no kumupeela icitabo, kuti mwatwalilila ukulanda ifi:
◼ “Baibolo ilatweba ifikacitika ku ntanshi.” Langeni umwine wa ng’anda amabula 4 na 5 kabili mwipusheni ukuti, “Pali ifi Lesa alaya, ni cisa ico mwingatemwa cacitika?” Mulangeni icipandwa icilanda pe Lembo asala, kabili lanshanyeni mu kwipifya paragrafu imo nelyo yabili nga asumina.
◼ Limbi kuti mwatila, “Baibolo ilasuka ifipusho ifyacindama.” Mulangeni pe bula 6, no kumwipusha nga ca kutila ali-ipushapo icipusho cimo pali filya ifyaba pe samba lye bula. Kupukuleni icipandwa icileyasuka ico cipusho, kabili lanshanyeni mu kwipifya paragrafu imo nelyo yabili.
◼ Nelyo kuti mwamulanga imitwe iyapusanapusana iyaba mu citabo no ku mwipusha umutwe uo atemwapo. Isuleni pali ico cipandwa, no kumulanga mu kwipifya ifyo tusambilila Baibolo.
3. Bushe kuti twatendeka shani isambililo lya Baibolo ilyo twashalika bamagazini abalelanda pa (a) fyo ifintu filebipilako pa calo? (b) lupwa? (c) mulandu Baibolo yabela iya cine?
3 Ipusheni Icipusho pa Muku wa Kubalilapo Mwatandala ico Mukalanshanyapo: Na cimbi ico mwingacita pa muku wa kubalilapo fye mwatandalila umuntu kufwaya apo mwingesatendekela ukulanshanya ilyo mukabwelelako. Umwine wa ng’anda nga apoka bamagazini, mwipusheni icipusho, no kumulaya ukuti mukesayasuka ilyo mukatandala umuku uukakonkapo. Panganeni inshita mukabwelelako, kabili shininkisheni ukusunga icipangano. (Mat. 5:37) Ilyo mwabwelelako, pitulukeni mu cipusho mwaipwishe, kabili mu kwipifya belengeni icasuko mu citabo ca Ico Baibolo Isambilisha no kulanshanya. Mupeeleni icitabo pa kuti alekonkamo ilyo mulebelenga. Natulangilile ifyo twingacita:
◼ Nga ca kuti mwashilile umuntu magazini iilelanda pa fyo ifintu filebipilako pa calo, kuti mwatila, “Ilyo nkabwela tukesalanshanya pa fyo Baibolo yasuka ici cipusho ca kuti, Bushe Lesa akalula shani ifintu pa calo?” Balangeni amabula 4 na 5 ilyo mwabwelelako. Nangu kuti mwaipusha cipusho ca kuti, “Bushe Lesa e ulenga ukuti ifyabipa filecitika?” Ilyo mwabwelelako, langeni umwine wa ng’anda amaparagrafu 7 na 8 mu cipandwa 1.
◼ Nga ca kuti magazini mwashalike yalelanda pa lupwa, ilyo tamulaya ipusheni uyo muntu ici cipusho, “Bushe umuntu umo na umo kuti acita shani pa kuti mu lupwa mube insansa?” Ilyo mwabwelelako lanshanyeni paragrafu 4 mu cipandwa 14.
◼ Nga ca kuti mwashalike magazini iilelanda pa mulandu Baibolo yabela iya cine, kuti mwaipusha ici cipusho ico mukesalanshanya nga mwabwela, “Bushe ifyo Baibolo ilanda pali sayansi fya cine?” Ilyo mwabwelelako, lanshanyeni paragrafu 8 mu cipandwa 2.
4. Bushe kuti twacita shani nga ca kuti umwine wa ng’anda akaana icitabo ca Ico Baibolo Isambilisha?
4 Ilyo mwapwa ukulanshanya kumo na kumo, ipusheni icipusho na cimbi ico mukesalandapo nga mwabwelelako. Nga mwapangana ukulasambilila Baibolo na uyu muntu, tendekeni ukusambilila icitabo ukufuma ku ntendekelo ukufika ku mpela ukwabula ukucilauka. Kuti mwacita shani nga ca kuti umwine wa ng’anda akaana icitabo ca Ico Baibolo Isambilisha? Na lyo line te kuti muleke ukumutwalila bamagazini no kulalanshanya nankwe ukubomfya fye Baibolo. Mu kuya kwa nshita nalimo kuti asuka afwaya isambililo lya Baibolo.
5. Mulandu nshi tulingile ukubombesha ukutendeka amasambililo ya Baibolo ukucila ukulashalika fye bamagazini?
5 Bamagazini ba Ulupungu lwa kwa Kalinda na Loleni kuti balenga umuntu afwaya ukusambilila ico Baibolo isambilisha. E ico, bombesheni ukutendeka amasambililo ya Baibolo na bantu abapokako bamagazini. Nga tulecita ifi, tukalaumfwila ifyo Yesu atwebele ukuti tulingile ‘ukulenga abasambi . . . , ukulabasambilisha.’—Mat. 28:19, 20.