Inshita ya Mutebeto wa fya ku Mupashi no Kusangalala
1. Bushe Yehova asakamana shani ababomfi bakwe mu fya ku mupashi?
1 Yehova mu kutemwa alasakamana ababomfi bakwe mu fyo bakabila ku mupashi. Nangu ca kutila abantu abengi muno calo baliba ne nsala ya ku mupashi, ifwe twalikwata ifya kulya ifingi nga nshi. (Esa. 65:13) Inshila imo iyo Yehova atusakamaninamo mu fya ku mupashi kupitila mu kulongana kwa citungu ukubako cila mwaka. Bushe muleipekanya ukusangwako inshiku shonse shitatu ku Kulongana kwa Citungu ukuleisa, ukukwete umutwe wa kuti “Ukutungululwa no Mupashi wa kwa Lesa”? Yehova natupekanishisha umutebeto wa fya mabwenge.
2. Finshi tufwile ukupekanya pa kuti tukasangwe ku kulongana kwa citungu?
2 Pekanishisheni Libela: “Amapange ya wacincila yatwala ku kutuntumika.” (Amapi. 21:5) E ico, ifyo mulingile ukuipekanya pa kuti mukasangwe ku kulongana kwa citungu inshiku shonse shitatu, kupoka ulusa ku bamwingisha incito ili line. Nga ca kutila mukakabila ukwa kwikala, bushe mwalipekanya kale uko mukekala? Na kabili mufwile ukupekanya ifya kulya ifya kusenda pa kuti mukaleba pamo na bamunyinenwe pa cifulo ca kulonganinapo. Pekanyeni ukuti cila bushiku mukalefika bwangu pa cifulo ca kulonganinapo no kufwaya apa kwikala, ukwimbako ulwimbo lwa kwiswila no kupepako ipepo lya kubalilapo.
3. Fya kufwala fya musango nshi tulingile ukupekanya ukufwala ku kulongana kwa citungu?
3 Tufwile ukushininkisha ukuti ifya kufwala tukafwala pa kulongana kwa citungu fikaba ifyalinga kabili ifya mucinshi. (1 Tim. 2:9, 10) Ukulongana kwa citungu kulalenga twaba ne shuko lya kushimikila ku bantu ba mu bwikashi. Nga twafwala ifya kufwala fya mucinshi no kufwala amabaji, tulapusanako na bantu abashili baNte kabili abaletumona baleshiba ukuti tuli bantu basuma.
4. Finshi fikatwafwa pamo ne ndupwa shesu ukunonkelamo sana mu kulongana kwa citungu?
4 Mukalekutikisha: Tatulefwaya tukapuswe ku fyebo ifili fyonse ifyo Lesa atupekanishishe pali uyu mutebeto wa ku mupashi! (Amapi. 22:17, 18) Ukukonkamo muli Baibolo yesu ilyo kalanda alebelenga amalembo no kulemba ifyebo ifipi kukalenga tukalekutikisha no kukanapumfyanishiwa. E lyo icungulo, kuti twalanshanya na bambi ifishinka ifyo twacitemwa sana ifyo twacilemba. Mu myaka ya nomba line, cisangilwe ukuti abana imisepela balekala pamo beka, kabili ilyo tulelongana balatemwa ukushimika ilyashi nelyo ukulembeshanya ifyebo pali foni ya kwenda na yo nangu ukulacita fye ifintu fimbi. Nga twalikwata abana, ukubikako fye na bana imisepela, kuti cawama sana ukwikala pamo na bo no kulakutikila pamo na bo ku malyashi ukucila ukuleka baikala beka na banabo.
5. Kuti twacita shani pa kuti tuipakishe sana ukulongana?
5 Ukuba Pamo na ba Bwananyina: Tulaipakisha sana ukulya ifya kulya ifisuma nga tuleliila pamo ne fibusa. (Amapi. 15:17) E fyo ciba na pa kulongana kwa citungu, nga tuli pamo na bamunyinefwe na bankashi tulaipakisha nga nshi ukulongana. E ico, ilyo tatulatendeka ukulongana nelyo pa nshita ya kutuusha, kuti cawama nga nshi ukuitendekelako ukuposha abeshile ku kulongana, ukuilondolola kuli bena no kuba pamo na bo! (Amalu. 133:1) Ceyamani nga atweba ukwikala mu fipuna ilyo inyimbo tashilatendeka, tufwile twaleka ukushimika ilyashi bwangu bwangu no kwikala pa kuti ukulongana kutendeke.
6. Shimikeni icamucitikile icilelanga ifyo twingashimika ubunte ku bantu ba mu ncende umubelele ukulongana.
6 Shukileni Ishuko lya Kushimika Ubunte: Ukulongana kwa citungu kulatupeela ishuko ilya kushimika ubunte. Bamunyinefwe abengi balibepusha pa mutwe uuba pali baji ya kulongana kwa citungu. Ici calilenga batendeke ukulanshanya no kushimika icine ku bantu. Bamo abalefwaya ukwishiba pa fyebo fyali pali baji balibetile ku kulongana kwa citungu kabili balisangilwe na ko.
7. Mulandu nshi tufwile ukusangilwa ku kulongana kwa citungu ukuleisa?
7 Pa kuti uku kulongana kupekanishiwe, kulaba ukubombesha sana, ukupekanya apa kulonganina, amadipartimenti ya kulongana no kupekanya amalyashi. Umulimo onse uubombwa pa kupekanya uyu mutebeto wa ku mupashi ulanga ukutemwa uko Yehova atemwa abantu bakwe. Shi ifwe bonse tukasangwe kuli uku kulongana kwa citungu no kusambilila ifintu ifingi ifyo Yehova atupekanishishe! Nga twasangwako, tatwakabe nga ba mu calo abaloosha pa mulandu wa kubulwa ifya kulya, lelo ‘tukaanga ku kubuuta kwa mutima.’—Esa. 65:14.
[Akabokoshi pe bula 4]
Ifya Kutucinkulako pa Kulongana kwa Citungu
◼ Inshita ya Kulongana: Ukulongana kukalatendeka pa 8:20 hrs inshiku shonse shitatu. (Ku Assembly Hall, ifiibi bakalaisula ne nshita ya 7:00 hrs.) Ilyo inyimbo ishikalatangilila ukulongana shatendeka ukulila, ifwe bonse tufwile ukwikalako pa kuti ukulongana kukaletendeka bwino. Pa bushiku bwa Kubalilapo e lyo no bwa Cibili ukulongana kukapwa ne nshita ya 15:55 hrs e lyo pa bushiku bwa Citatu kukapwa na 15:00 hrs.
◼ Ukusungila Bambi Ifipuna: Kuti mwasungila fye ifipuna abo muleenda na bo mu motoka nelyo abo mwikala na bo ing’anda imo.
◼ Ica Kulya ca Kasuba: Mukwai kuti cawama nga ca kutila mwaisa ne fya kulya ukucila ukulafuma pa cifulo ca kulonganinapo no kuyaliila kumbi. Icipe icinono icitalalika ifya kunwa ico mwingabika na mu nshi ya cipuna e co mwingabomfya. Tamulingile ukuya mu cifulo ca kulonganinamo ne fipe ifikalamba ifya kutalalikilamo ifya kunwa, amakontena ya mabotolo, no bwalwa.
◼ Ubupe: Kuti twalanga ukuti tulatasha nga tulesangwilako imisangulo ya kuitemenwa ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Nga mwafwaya ukupeela ceke pa kulongana kwa citungu, mulingile ukulemba ukuti mwapeela “Watch Tower Society.”
◼ Amasanso ne Ficitika Ukwabula Ukwenekela: Nga ca kuti kwaba umuntu uwalwalisha ukwabula ukwenekela pa kulongana, mukwai ebeni kapyunga, na o akeba dipartimenti ya First Aid pa kuti abaishiba ukundapa abalipo pa kulongana bese bamone ifili ubulwele no kumwafwa.
◼ Amafuta ya Kuisansa pa Mubili: Kuti twalangulukilako bambi nga tatubomfeshe sana amafuta ya kuisansa pa mubili pantu bambi abalwala amalwele pamo nga icifuba, kuti yakoselako.—1 Kor. 10:24.
◼ Amaformu ya Kulondwelapo Abantu: Formu wa Mukwai Fwayeni Uyu Muntu (S-43) e o twingabomfya pa kulemba ifyebo pa bantu abalefwaya ukusambilila. Aba bantu kuti baba ni balya twashimikile mu lyashi fye mu nshita ya kulongana kwa citungu. Ilyo bakasabankanya baleisa ku kulongana, bafwile ukukwata formu imo nelyo yabili aya kulondwelapo abantu abalefwaya ukusambilila. Nga mwalembapo pali formu kuti mwatwala ku Muputule wa Fitabo pa kuti baitume nelyo kuti mwapeela kalemba wa cilonganino cenu ilyo mwabwelela ku cilonganino ku mwenu.—Moneni Ubutumikishi Bwesu Ubwa Bufumu ubwa February 2005 ibu. 7.
◼ Ukupoosa Ifisooso: Tulefwaya apo tukalalonganina pakabe apa busaka. Tulanga ifyo tufwaisha ukulakonka ifyo Lesa atweba ukupitila mu kulangulukilako bambi lintu twapoosa ifya kulya fisheleko, amapepala ne fipe fimbi umwa kupoosa ifisooso nelyo mu mikanda iili pa cifulo ca kulonganinapo. Pa kulongana kwa citungu ukuleisa, ifwe bonse tukasunge icifulo cesu ica kupepelapo ica busaka pa kuti ‘tukapuulamike isambilisho lya kwa Lesa, Umupusushi wesu, muli fyonse.’—Tito 2:10.
◼ Ifimbusu: Abafyashi nelyo umuntu umbi umukalamba e bafwile ukushindika abana abanono ku mipompi nelyo ku cimbusu. Ilyo tuli pa kulongana limo limo abana balatendwa ukwikala, limbi pa numa fye ya maawala ayanono. Kanshi ifyo abana bacita pa kulongana pa kutila baleendauka, ilingi line balabepekesha ukuya ku cimbusu imiku iingi. Icibipako fye ca kuti abantu bambi abalekutika kuli programu balapumfyanishiwa. Kanshi ico abafyashi bengalacita kulatwalila limo abana ku cimbusu ilyo tatulatendeka ukulongana. Nga balecite fi te kuti kube ukulapumfyanya bambi lintu ukulongana kwatendeka fye. Ukushindika abana abanono ku cimbusu na ku mipompi, kulacingilila abana na ku masanso.