Kuti Mwaba Abakankaala!

1. Mulandu nshi mwingatontonkanishisha pali bupainiya bwa nshita yonse?

¹ Bushe mulafwaya ukuba sana ne nsansa no kumona ukuti ifyo mulebomba fileenda bwino? Bushe mwalitemwa ukwafwa abantu? Bushe mulafwaya ukulundako inshita ya kubomba umulimo wa kwa Yehova? Nga ca kuti icasuko cenu kuli ifi fipusho ca kuti ee, ninshi mulingile ukulatontonkanya pa kubombako bupainiya bwa nshita yonse. Lelo kwena, ilyo umo talalembesha bupainiya alingile ukutontonkanya pa mulimo wa kusunga ulupwa lwakwe e lyo na pa fyo aba nampo nga alalwalilila nangu iyo.

2. Lumbulenipo ifyuma fimo fimo ifya mampalanya ifyo bapainiya banonka.

² Ifyebo fyafumine kuli Lesa ifyo Solomone alembele, fitulangilila ukuti ipaalo lya kwa Yehova ne fyuma fyalyampana. (Amapi. 10:22) Mu nshiku shesu, ipaalo lya kwa Yehova kuti lyalenga twaba abakankaala, maka maka lwa ku mupashi. Amapaalo ya musango uyu yengi nga nshi kuli bapainiya ba nshita yonse. Ica kumwenako fye, ilyo balebomfya bwino inshita iyo bakwata, balaba ne nsansa ishingi pa mulandu wa kupeela ubupe ku bantu bambi. (Kol. 4:5; Imil. 20:35) Yehova alamona iyi milimo iyo babombela bambi pa mulandu wa kutemwa kwabo ku bantu bambi, kabili no kutasha alatasha. Ifyuma fya musango uyu ifyo ‘baitutilila mu muulu’ tafipwa nakalya. (Mat. 6:20; Heb. 6:10) E lyo kabili, nga ca kuti bapainiya batekanya no kucetekela Yehova ukuti akulabasakamana, bucibusa bwabo nankwe bulakoselako.—Mat. 6:22, 25, 32; Heb. 13:5, 6.

3. Bupusano nshi ubwaba pa kufwaisha ukunonka ifyuma fya ku mupashi no kunonka ifyuma fya muli cino calo?

³ Abafwaisha ukuba ne fyuma, ilingi line balaba no “lunkumbwa ulwingi ulwa kutumpa.” (1 Tim. 6:9, 10; Yako. 5:1-3) Nomba nga ca kuti tuli ne paalo lya kwa Yehova te fyo ciba iyo. Pa mulandu wa kuti bapainiya ba nshita yonse balapoosa inshita ikalamba mu butumikishi, cilabaafwa ukutwalilila abakosa mu kupepa no kubika amano ku fintu fyacilapo ukucindama. (Fil. 1:10) Munyinefwe umo alilekele incito iyalemupwila sana inshita iya buinjiniya no kutampa bupainiya. Atile: “Incito nalebomba yalenenga ukunaka nga nshi. Nomba bupainiya bwena, tabunasha iyo. Pali ino nshita ndaafwa abantu no kubasambilisha icine. Ifi momba pali ino nshita fyalinenga ukuba ne nsansa icine cine.”

4. Bushe bapainiya ba nshita yonse bapaalwa shani ilyo baleafwilisha abantu bambi?

⁴ Amapaalo na ku Bantu Bambi: Muno nshiku, abantu fye bonse balakwata amafya pantu tuli mu “nshiku shayafya.” (2 Tim. 3:1) Abantu konse konse balefwaya sana uwa kubasansamusha. Bakabila ba mbila nsuma balasekelela nga baimwena na menso ukuti abantu abali abapelelwa kale kuti ba-aluka, baaba ne subilo lyakosa pa mulandu wa mbila nsuma. Ala bapainiya ba nshita yonse bena balakwata insansa ishingi nga nshi, pantu bena cila mwaka balabomba umulimo wa kupususha abantu ama-awala 800 ne mpusho!—1 Tim. 4:16.

5, 6. Finshi fingamwafwa pa kuti mube bapainiya ba nshita yonse?

⁵ Bushe mulatontonkanya pa kuba painiya wa nshita yonse? Nalimo mulingile ‘ukuilubwila inshita mwe bene’ ku fintu ifishacindama sana. (Efes. 5:15, 16) Abengi e fyo baacita kabili balicefyanyako ne mitabotabo, balicefyako inshita babomba incito ya malipilo pa kuti balebomba inshita ikalamba imilimo ya Bufumu. Bushe imwe te kuti mucite nge fi aba bambi baacita pa kuti mulebombela pamo na bo?

⁶ Lombeni amano kuli Yehova pa kuti ifyo mwingapanga ukubomba fingabomba bwino. (Yako. 1:5) Mapaalo nshi mwingapokelela nga mwacite fi? Fyuma fya mampalanya ukufuma kuli Lesa! Kabili Yehova akamupaala na mu fyo mukabila. (Mat. 6:33) Bonse abesha Yehova muli ifi bali no kupokelela “ipaalo kukasuka kukabule incende ya kubapo.”—Mal. 3:10.