Branch Letter

Kuli Bakasabankanya ba Mbila ya Bufumu:

Ala kwena muli uyu mwaka wa Mulimo uwapwile twalibombele bwino sana ica kuti mwalifumine ifisuma ifingi! (Esa. 3:10) Mu March, twakwete impendwa ipya mu mbali shibili: Twashiliile abantu ifitabo ukucila pali 47,000 kabili twatungulwile amasambililo ya Baibolo mupepi na 250,000. Ukwabula no kutwishika, icitabo ca kuti Ico Baibolo Isambilisha cileafwa bakasabankanya bonse fye, abanono na bakalamba, nga fintu icacitike icili mu paragrafu ikonkelepo cilelangilila:

Lweendo, alikwete ishuko lya kusambilisha kafundisha wakwe na bana be sukulu banankwe ifyo Baibolo isambilisha. Ilyo umwana we sukulu umo aipwishe icipusho pa kubomfya umusalaba, kafundisha aloleshe Lweendo pa kuti asuke ici cipusho. Lweendo atila: “Apo lyonse pa kuya ku sukulu ndasenda Baibolo ne citabo ca kuti Ico Baibolo Isambilisha, nalicifumishe mu cola candi no kukupukula ku mpela ya citabo pa cisontelelo ca fyebo na fimbi pa mutwe wa kuti: Ico Abena Kristu Bene Bene Bashibomfesha Musalaba. Twalibelengele amaparagrafu na malembo. Kafundisha alitemenwe kabili nalitendeka ukusambilila nankwe Baibolo ukubikako na bana be sukulu banandi babili.”

Apo kuli ubuyantanshi, kuli umulimo wa kuwamya Amayanda ya Bufumu ne fifulo fya kulonganinapo ukulongana kukalamba. Ku Chingola, ku Kabwe na ku Mufulira, baliwamya kale ififulo fya kulonganinapo ukulongana kukalamba. Pa kuwamya ififulo fya mu mishi ifya kulonganinapo ukulongana kukalamba, palapooswa inshita iikalamba, amaka, ne ndalama. Ilyo tuletendeka umwaka upya uwa mulimo, tulepepa ukuti umupashi wa kwa Lesa utwalilile ukulatucincisha pa kuti tuletungilila umulimo wa kubila pa Bufumu mu nshila shalekanalekana.—Mat. 6:33; 10:41.

Ni fwe bamunyinenwe,

Iofeshi lya mu Zambia