Ukwaluka mu Kulongana kwa Cilonganino
1, 2. Kwaluka nshi kuli no kucitika ku kulongana ukutendeka mu January, 2009?
1 Mu mulungu wa April 21 ukushinta ku 27, 2008, aba bwananyina isonde lyonse balikutike ku ca kubilisha icisuma nga nshi. Ici ca kubilisha catile, “Ukutendeka pa 1 January, 2009, Isambililo lya Citabo ilya Cilonganino likalabako pa bushiku bumo bwine no kulongana kwe Sukulu lya Butumikishi Ilya Bulesa e lyo no Kulongana kwa Mulimo. Ishina lya Kulongana kwe Sambililo lya Citabo lili no kwaluka, tukalalita ukuti Isambililo lya Baibolo ilya Cilonganino.”
2 Ifyo Uku Kulongana kwa Cilonganino Kukalaba: Inshita tukalapoosa pali uku kulongana, ukubikako ne nshita ya nyimbo ne pepo, ili no kuba iawala limo na mamineti 45. Ukulongana kukalatendeka no lwimbo ne pepo (5 min.), e lyo pakonka Isambililo lya Baibolo ilya Cilonganino (25 min.). Lyena pakalakonka Isukulu lya Butumikishi Ilya Bulesa (30 min.). Pa kutendeka Ukulongana kwa Mulimo (35 min.) tukalaimba ulwimbo (5 min.). Ukulongana kukalapwa no lwimbo ne pepo (5 min.). Pa kumwafwa ukupekanya uku kulongana, cila mweshi mu Ubutumikishi Bwesu Ubwa Bufumu mukalaba ukutantika kwe Sambililo lya Baibolo ilya Cilonganino, ukutantika kwe Sukulu lya Butumikishi Ilya Bulesa e lyo no kutantika kwa Kulongana kwa Mulimo.
3. Bushe Isambililo lya Baibolo ilya Cilonganino likalatungululwa shani?
3 Isambililo lya Baibolo Ilya Cilonganino: Uku kulongana kukalatungululwa nga filya Isambililo lya Ulupungu lwa kwa Kalinda litungululwa. Tamufwile ukupituluka mu fyo mwasambilile umulungu wafumako. Lelo, mufwile ukulanda amashiwi ya kubalilapo ayanono fye. Ici cikalenga ukuti mukalekwata inshita iikalamba iya kuti bonse abalongene ba-asukapo mu kwipifya. Kangalila wa kutangilila akalatantika baeluda abalekanalekana aba kutungulula uku kulongana, pa kuti bakalelekanina ukutungulula cila mulungu.
4. Bushe Ukulongana kwa Mulimo kukaluka shani?
4 Ukulongana kwa Mulimo: Ukulongana kwa Mulimo kwena kukaba ifi fine kwaba ino nshita lelo amalyashi e yakalaba ayepi. Ifya kubilisha ilingi fikalaba fye amamineti 5. Aya mamineti yengi aya kubilishamo fye ifintu ificindeme no kubelenga amakalata yamo ayafumine ku Ofeshi. Ifya kubilisha pamo nga ukutantika kwa kuya mu mulimo wa mwi bala, ukuwamya Ing’anda ya Bufumu, lipoti ya ndalama, na makalata ayo mupokelela lyonse ukufuma ku Ofeshi tamulingile ukubilisha pa cisebele, lelo mukalebika pa cipampa ca fyebo pa kuti aba bwananyina e po bakalebelenga. Abakwete amalyashi bafwile ukupekanya bwino, ukukonka ifyo bebelwe ukucita kabili bafwile no kusunga inshita.
5. Bushe ukulongana kukalaba shani mu mulungu wa kutandala kwa kwa kangalila wa muputule?
5 Ukutandala kwa kwa Kangalila wa Muputule: Ukulongana kwa mu mulungu wa kutandala kwa kwa kangalila wa muputule takwakaluke. Pali Cibili, tukalalongana Isukulu lya Butumikishi Ilya Bulesa no Kulongana kwa Mulimo, lyena pakalakonka ulwimbo. Pa numa ya lwimbo, kangalila wa muputule akalalanda ilyashi lya mamineti 30. Nga fintu tucita pali ino nshita mu mulungu wa kutandala kwa kwa kangalila wa muputule, kukalaba ukulongana pa bushiku na bumbi, e kutila ukulongana kwe Sambililo lya Baibolo ilya Cilonganino, e lyo pakalakonka ulwimbo ne lyashi lya mulimo ilya kwa kangalila wa muputule. Ukulongana kukalapwa no lwimbo ne pepo.
6. Mulimo nshi uo kangalila we bumba akalabomba?
6 Ukukumana kwa Mulimo wa Mwi Bala: Ibumba lya baeluda likapeela bakangalila be bumba umulimo wa kusakamana amabumba ya mulimo wa mwi bala, no kulacema bonse abali muli ilyo ibumba. Nga ca kutila umubomfi utumikila e ulebomba uyu mulimo, afwile ukulaitwa ukuti “umubomfi we bumba.”
7. Finshi tuleenekela pa lwa uku kulongana?
7 Nga fintu fye twamona, naciilanga fye apabuuta tuutu ukuti pali uku kulongana, tukalaipakisha nga nshi ifyebo ifisuma ifya kukoselesha ifikatwafwa ukuba na bucibusa bwakosa na Yehova. Ici cikalenga ukuti tukabe bakashimikila kabili bakasambilisha bafikapo, abakanshiwa ukubomba bwino sana umulimo wa kushimikila imbila nsuma.—Efes. 4:13, 14; 2 Tim. 3:17.
8. Bushe ukupekanishisha kabela ukulongana kukatwafwa shani, kabili kukafwa shani bambi?
8 Ukupekanishisha kabela ukulongana kukatwafwa ukubika sana amano ku fishinka ifilelandwapo pa kulongana kumo na kumo. Bonse tukalaba ne shuko lya kwasukapo, e kutila ukukoseleshanya umo no munankwe. (Rom. 1:11, 12; Heb. 10:24) Ubuyo bwesu bufwile ukuba bwa kulenga abantu ‘ukumona ukulunduluka kwesu’ ilyo ‘tulelungika pa kusambilisha icebo ca cine.’—1 Tim. 4:15; 2 Tim. 2:15.
9. Cinshi tulefwaisha ukucita, kabili mulandu nshi?
9 Tulesekelela nga nshi pali uku kwaluka kukalamba ukucitike ku kulongana kwesu ukwa cilonganino. Shi ifwe bonse natutwalilile ukulakonka ubutungulushi ubo “umusha wa cishinka kabili uwashilimuka” aletupeela no kulapalama kuli Kacema Mukalamba ilyo aletupangasha ukupusuka “ubucushi” bukalamba ubupaleme nga nshi.—Mat. 24:21, 45; Heb. 13:20, 21; Ukus. 7:14.