Mufwile Ukushipikisha pa Kushimikila
1 Pa myaka ukucila pali 30, umutumwa Paulo alibombele ne nsansa umulimo wa kushimikila. Lelo nga filya fine ciba ku mulimo onse uwacindama, Paulo alekwata amafya ilyo alebomba uyu mulimo. (2 Kor. 11:23-29) Nalyo line, tanenwike. (2 Kor. 4:1) Alishibe ukuti Yehova ali no kumwafwa ukushipikisha ilyo alebomba uyu mulimo. (Fil. 4:13) Paulo abombele uyu mulimo ukwabula ukunenuka, e mulandu wine asosele ukuti: “Mulempashanya, ifyo na ine mpashanya Kristu.”—1 Kor. 11:1.
2 Ukushipikisha ku Mesho Muno Nshiku: Cila bushiku, bamunyinefwe abengi balabatumfya no kubalwisha. E lyo kabili balupwa wabo, na bantu abo babomba nabo, na bo basambilila nabo, balisuula ubukombe bashimikila abantu. (Mat. 10:35; Yoh. 15:20) Napamo na imwe ifi fine e fimucitikila. Limbi kuti mulalwalilila, atemwa cila bushiku mulashomboka pa kuti mwingacimfya ifingalenga mwaleka ukubombela Lesa nelyo limbi kulaba amatunko ayesha icitetekelo no kwesha amaka yenu aya kushipikisha. Kuti twakwata amaka ya kushipikisha nga tuletontonkanya pa babomfi ba cishinka aba ku kale e lyo na pa Bena Kristu banensu aba muno nshiku abaeshiwapo lelo abashanenuka.—1 Pet. 5:9.
3 Kuti twaba na maka yengatwafwa ukutwalilila ukushimikila abantu nga ca kuti tatulelaba ‘ukufwala ifya bulwi fyonse ifya kwa Lesa.’ (Efes. 6:10-13, 15) Cimbi icacindama sana, kupepa kuli Lesa ukuti aletwafwa ukushipikisha. Lesa alatupeela umupashi wa mushilo pa kuti tuleshipikisha. (2 Kor. 6:4-7) Nga tulefwaya ukucimfya Satana na bantu bakwe, tufwile ukulacita ifyo Lesa atwibukishako pa kuti tulekosha bukapepa bwesu. (Amalu. 119:24, 85-88) Nga filya fine umwana engalabelenga libili libili kalata bawishi abamutemwa bamulembeele, no kulabelenga Baibolo cila bushiku kuti kwakosha bucibusa bwesu na Yehova. Nga tuleisambilisha lyonse, twakulakwata amano aya kulatwafwa ukushipikisha ilyo tule-eshiwa, na ya mano yakulalenga tuletontonkanya pa fyo Lesa afwaya ilyo tulefwaya ukucita icili conse e lyo kabili yakulatwafwa ukutwalilila ukubombela Yehova.—Amapi. 2:10, 11.
4 Tukapaalwa nga Tuleshipikisha: Nga filya cali kuli Paulo, na ifwe nga tuleshipikisha ilyo tulebomba umulimo twapeelwa, tukalalenga umutima wa kwa Yehova ukusekelela ne cikafumamo, Yehova akatupaala no kupaala abantu bambi. (Amapi. 27:11) E ico natukose no kutwalilila ukulashimikila abantu. Nga twacita ifi icitetekelo cesu cikamoneka ukuti calikosa, kabili “cacila na pali golde ukucindama” iyonaika iyo beshibila ukukosa ku mulilo.—1 Pet. 1:6, 7.